iluko.com - website a magustoan a pagpalpallailangan dagiti pada a nangisit ti sikona.

Agkikinnumusta, agdidinamag, wenno agkikinnatawa.....

 

Skip Navigation LinksHome > Blogs >



MAILIWAK
7/30/2013 5:47:47 PM

Sadino man ti ayanmo, kailiwka

apagapaman man ni lagip, ragsak itdenna iti rikna

iti isisiray ti lawag, iliw ti puso, kayatka a makita.

Malagipko, ti sam-it ta isem, umanayen a liwliwa

ti bara nga adda iti kaunggam, kadagiti paludip, adda latta;

ti irut ta arakup, mailiwak, kumustaka

ket di masbaalan a lailo't agek maimutektekan latta dita rupa.



Sadino man ti ayanmo, addaka latta ditoy isip

tunggal kanito a naglabas-binubosta a dua ket lagip;

perrengmo idi panawannak, anian a nagsakit.

Napalabas man di kalman, uray awanka, addaka latta

Maiparbeng man ken saan wenno iti pannakaidalit ken panagsagaba;

Kadagiti ngatangata ken kinaulbod diak mailibak, ay-ayatenka

Mangipaay man iti sakit a panunoten, addakan sabali a denna.



Sadino kadin' ti ayanmo, kasapulanka;

saanen a maadasan lulua kadagitoy mata

ket iti lubong ni ayat, biangkon ti agmaymaysa.

Kasapulanka, wen, sapay ta agsublika

irut ta arakupmo isu't mangibalikas saannak nga in-sina,

mailiwak kenka, itan, subliannak tapno toy riknak, mapekka

tapno iti kaano man, pannakaulila ket diakton a marikna.

Mailiwak, wen, ay-ayatenka

ket ipatpategka nalablabes pay iti anges nga ikutko ita;

ket diakton ipeksa daytoy nga ayat siasino man a diosa.



Ay-ayatenka, kakibin iti ania man a rigat ken nam-ay,

kasilpo ti anges, liwliwa ken panangan-andingay;

impategka, sika ti lubongko iti pait ken liday a sumangbay,

daytoy ti kinapudno, pannubok wenno sulisog man ti umapay.

Mailiwak, wen, ket pagyamanak

iti laksid ti kinapudno, sallukobannak man ti babak;

angaw ken panagrayo, nagtalinaed ni panagayat,

iti wada ti lubong immayka a nagdakiwas

uray iti naminsan lang, toy biagko, inka pinasantak...



Comments




Agposte

Ag-Loginka pay nga umuna Kailian sakbay nga agposteka.