iluko.com - website a magustoan a pagpalpallailangan dagiti pada a nangisit ti sikona.

Burburtya dagiti ilokano.

 

Skip Navigation LinksHome > Blogs >



Burburtya dagiti Ilokano!!
2/4/2006 3:46:31 AM

Ala kakabsat awisen kay met nga umay makitabo ditoy nanomo nga kallapaw ko ket padasen yo nga sunbatan toy burburtya toy nomo.

1: Apay nga tomapwak tay manok no malpas nga makit-log?

2: Adda maysa nga sinan pitaka bookan ti rabawna nalabbagit ti uneg na ken adda pay bukelbukelna?

3: Ania ti maaramid mo ti rabii nga saan mo nga maaramid ti aldaw?

4: kasano ti pannagtorog ti kubbo?

5: Balay ni Sto:Tomas saan mo nga mauli no awan armas?

6: No malagip ko saan ko nga maala no diak malagip maalak?

7: Ania nga parswa ti akinsango ti mokodna?

PLS. Take note!!!

Saan kay koma nga agungunget no naipablaak dagitoyen ta kabarbarok ditoy. Umay konto ibaga ti sungbatna no adda sangok Palobos ti Apo.

Palobos ti Apo!! Malagip ko manen di estorya daydi dios ti alwadna nga apong ko.
Adda agassawa ket ti pagsapulan tay lakay ket agananup diay bantay. Maysa nga malem kunna tay lakay.

Lakay:Baket no bigat innakto diay bantay aganup.
Baket. Palobos ti Apo kunam pay ah lakay.
Lakay: Ipalobos naman ken saan inakto latta.

Immay ti bigat idi umolog koma tay lakay daiy agdanda ket natinnag sa nalapig-os tay sakana.
Baket: Gungunam dayta ta tinto met la madaldalawitwit dayta dilam.
Lakay: Ammokton baket ipalobos ti APO.

Ket naimbagan tay lakay.
Lakay: Baket innak diay Bantay no bigat ipalobos Ti Apo. Ket no makitam nga agasuk diay parti ti Bantay ket nangala ni lakayen konam lattan.

Ti met nagawatan tay Baket Ket " no agasuk diay bantayen natay ni Lakayen" Ket ti malem agas-asok diay Bantay ket tay Baket nagbuteng la unay.

Baket: oh!! natay ni lakayen ket siguro napigsa ti alalyana.
Ket nagluto nga nasapa sa napan naglemmeng diay bubung ti balayda.

Rumabii simmang pet tay lakay ket pukawanna tay baket na.

Lakay: Baket ayan mo.
Baket: apo ti pigergerna, "ay Apo nagpigsa ket ti alalya ni lakayen.Kasla agsasao nga idi sibibiag

Gapu ta nabannog tay lakay isu ti nangloto tay karne nga naanupannan ken gapu ta dina mauray ni baket na nanganen sa napan natorog.

Idi nakatorog tay lakay nagininayad tay baket nga immolog diay paglemlemmenganna ket napan diay kosina idi lukatanna koma tay kaserola ket natinnag tay kalobna (KLANG!!!!)ket nakariing tay lakay.

Lakay: SALALKI!!! ( ti ammona ket tay aso da)
Baket: GRRRRRRRRR!! (isungbat tay baket)
Lakay: Naglokokaket nga ason..naginayad ngarud nga nang pidot tay binalsig nga kayo ket sana Impokkaw(SALAKI!!!!)
Baket: GRRRRRRRRRR!!! (isungbat latta tay baket)

Ket panang-or ngarud tay lakay sana sinegdan tay silawda ket nakitana nga ni Baketna. Apo ti sangitnan.

Lakay . Ay baket salaki konak ket grrrrr konammet ania ita ti aramidek?

Binongon ngarud tay lakay ti ikkamen tay natay nga baketna ket inpanna dia siruk ti sagumbi (sarusar ) tay kaarrubana ket nakita me dagitay dwa nga tulisan.

Tulisan no.1 : Pare sigurado daydiayen.
Tulisan No.2 : Wen pare.

Ket napanda idi nakapanaw tay lakay. Ket naginnasiwanda.

Tulisan No 1: pare no adda tao nga makitam ket tao kunam ta itaray ta.
Tulisan no 2: (akinlikod) wen pare.

Idi nakaadayoda nawarwaran tay galot ti ikkamen ket rimwar tay saka tay baket.

Tulisan no 2: PARE! TAO!!
Tulisan no 1: ITRAYTA PARE!!

Gapu ta maibaotbaot met tay saka tay baket diay rupa tay tulisan no 2ton Inibbatannan ket isuda ti nagririn agingga nga nagpinnatayda nga dwa.....



Comments



Johnnyric Domingo
2/4/2006 10:29:46 AM

Naimbag a bigatmo gayyem. Ania ti Palileng? Rusil? - JRIC

Daytoy met ti sungbatko diay burburtiam; 1-tapno bumaba, 3-mangrabii(mangan) 4-agkidem, 5-kawayan, 7-manok




Nestor Dupo
2/4/2006 1:05:07 PM

Pareng JRIC,

Agyamanak ti issangbay mo ditoy nanomo nga kallapaw ko.

Diak ammo ta diay sa Provincia ti Abra ti ayan ti kaadwan nga makmakan nga aggpu ti kabakiran ken karkarayan nga di ammo ti dadduma nga pada nga Ilokano. Isu nga no dimo ammo ti Rusil wenno palileng.
Palileng ket maysa nga lames (sida nga kona ti Ilocus, nigay nga kuna ti apo nga Itneg, daytoy nga lames ket masarakan diay karkarayan ti Abra, babassit babbabassit ngem bunog, daddadakel ngem Tang-al maysa met laeng nga lames. Nassagiit ti digona no mailambong nga kunada kasta met no maitono ken makamatisan ay-apo dimo pay ammo ti nagan ni katogangam nga kunada no maramanam ti imasna.

Rusil ket kasla laeng root nga agtubtubo daiy taltalon nalabbaga ti bungana ket tay uggot na isu ti ususaremmi idi nga pagalsem ti lames wenno kapporus nga bunga ti utong.

Tay sungbat mo kadagitay burburtiak.
1: mabalinmet ngem ladingetak ta saan nga isu ti husto nga sungbatna.
3: Mangrabii mabalbalin met negm ladingitek manen saan nga isu ti husto nga sungbatna.
4 & 5 agkidem, kawayan napuntaam a talaga ta isu dagita ti husto nga sungbatda.

7. Manok kitaem manen nga nalaing pare no tay manok mo ket akinsango ti mokodna.

Sann ka nga madanagan ta ibagak to metlat sungbatna..

Padpadsem manen nga sungbatan ta bareng masungbatamton.

Agayamanak manen.




Eduardo Padaoan
2/4/2006 1:44:39 PM

l. tumapuak diay manok no malpas nga agitlog ta no agian idiay maukopan diay itlog.
2. asuete
3. agsilaw ti tukak
4. agkidem
5. kawayan
6. puriket
7. kabayo

Pinadasko laeng Gayyem Nestor. Naimbag nga aldawmo. Kumusta ti Sweden?




Nestor Dupo
2/4/2006 11:46:27 PM

Hello Pareng Eduardo,

Nagiktotak tay nakitak ti nagan mo ta konak no tay ninongkon (Eduardo Pagadoan ti naganna).

Agayamanak ti inka isusunbat pare ken naimbag unay nga uras mo met. Ditoy Sweden nakalamlam-ek ita nga tiempo ta uaray la nga maysa nga metro ti kapuskol ti snow -10 C ditoy Stockholm. Ti summer napintas ta berde amin nga alawlaw ken isu met ti panag piffshing wenno banniit nga kuna tayo nga ilokano ngem sabali ditoy ta flyfishing kuna da ti English, Flugfiske kuna met ti Swedish, atlantic salmon, brown trout ken dadduma pay nga lames ket ti siak ti agararamid ti fishing flies ko wenno appan nga kunada, flyfishing ti magusgustwak nga araramiden no ti summer ditoy. Pia laengen ta nasarakak daytoy nga Homepage ta adda paglinglingayan no awan ti agorder ti fishing flies.

Tay sungbat mo nganganim nasung batan amin nga burburtyak.
1: maukopan hmm mabalbalinen ngem saan nga isu ti husto nga sungbat na.
2: husto ka pare Bunga ti Asuete.
3: sgsilaw ti tukak, nagistayan ta ti agsilaw ti tukak, wenno lames isu ti ramotna ngem ladingitek ta saan nga isu ti sungbatna.
4, 5, husto amin dia sungbat mo.
6: puriket wenno dalukduk isu dayta ti husto nga sungbatna.
7 Kabayo (Kabalayo) siguro tay tugotna ti pinanonot mo. Saan pare tay daytoy nga parswa ket talaga nga akinsango ti mokodna.

Ala pare panonotem a nalaing dagiti dadduma umay konto metla ibaga no ania ti sungbat da. Komusta dita ayan mo no sadinonam nga lugar ti ayan mo ita.




Leilanie Adriano
2/5/2006 5:30:20 AM

Hi manong Nestor! Umayak la ag-spy taga-Abra ka gayam. Pasensiyakan diak ammo't sumungbat ti burburtia ngem padpadasek to no maka-enrolak kadagitay beterano!hakhak!

Napanak nagpangngati diay bantay, anusam toy inyalat ko a para kenka--kappukan a karne't ugsa, adda pay pasurot na nga ubog, rangaw parya, pakpako ken uong pagsagpaw mo't natuno a purong, pallileng ken dalag kaka! Gurka, awatem pay toy pakuyog na a gawed ken bua! :-)




Nestor Dupo
2/5/2006 11:13:28 AM

Hello Ading Lei,

Nasayaat man ta nayawawanka ditoy nano mo nga kalapaw toy nanomo nga basat mo. Saan nga balen no dimo sungbatan dagitoy burburtyak basta maikari laket toy nomo nga dagasan yo.

Agyamanak unay tay inka inpadigo nga karne ti ugsa, nasayaat ta adda itapak pulotak konak koma ngem saanak met nga umiinom kaka, tay bwa ken gawed awatek lattan ta pian to la nga ipasagok kadagitay kakabagiak ken ni inangko, ta isuna ket maysa nga bago ngem ti karona ket kakabayanna ket didak met amammo.

Ala ading ko husta daytan nga sunbat ko ta umayak diay balay mo ta umay ko sungbatan tay sungbat mo.;-)




Elsie Talania
2/5/2006 3:59:53 PM

Imbag nga oras mo kabsat Nestor, uray siak ket naiyawawanak, despensar no saan ko nga masungbatan dayta burburtia. Pulos nga saan ko ammo no ania ti sungbat na.

Ngem dumagasak man no maikari toy numo nga pumasiar ditoy abong mo.




Sherma Benosa
2/5/2006 5:44:48 PM

hello! Padasek man met ti sumungbat.

3) Agpuyat (?)







Johnnyric Domingo
2/5/2006 6:56:50 PM

Naglaingkan Sherma! Wen isu dayta ti sungbatna la ketdi gayyem. - JRIC



Reynold Dumapay
2/5/2006 8:58:12 PM

Tumapwak diay manok a ta awan met agdanna, saan kadi manong? :-)



Nestor Dupo
2/5/2006 10:05:29 PM

Gagayemm Rey Ken Sherna,

Husto dagitay sungbat yo nga dwa. Agpuyat ti maaramid mo ti rabii nga saan mo nga maaramid ti aldaw. Tamapwak tay manok gapu ta awan ti agdanna Ha! Ha! nalaing kayo amin nga talaga ngem adda pay maysa nga saan pay nga nasungbatan. Ala padasen yo latta. Ta no malem umay konto ikanta ti sungbat na ta ni lunes manen rugi man ti trabahon.

Kabsat Elsie, Agyamanak unay ta immay kamet dimmagas ditoy nanomo nga kallpaw ko. Uray saan mo nga sinungbatan dagiti Burburtyak pakaragsakak met ti isasangbay mo.

Padaanyo ti sumaro nga burburtya daytoy nomo..... Mangi suratak to pay ti pakpakatawa ta ket bareng no saan yo pay nga naggeg.

Naimabag amin nga oras ken aldawyo.




Nestor Dupo
2/6/2006 5:36:40 AM

Ala Agayamanak ti inkay panang sungbat kadagiti burburtyak.

Sungbat ti maudi ket tay Dodon wenno Koryat ta iso met ti kinsango ti mokodda.

Padasen yo manen nga sungbatan tay Burburtya ti Ilokano nga maikaddwa.

Agyamanak manen ken naimbag nga Oray yo amin nga sanga pada.




Mercedes Deleon
2/6/2006 7:02:44 PM

Nestor dumagasak laeng nga makilinung ditoy abong mo ta naabutanak met ti tudon, baliwak to ti umay agpasyar ton maminsan. naimbag nga aldaw yo amin mga brader ken mga sister.



fzmhvb metrzbq
7/8/2007 8:08:07 AM

wofcsmhvt ldtc twjox znoekl igukbhy igtejruv piaw



jmafozkn gofwjc
9/26/2007 1:26:25 AM

xypmz tvho uwfbctz mjxsr gaop jziy wpmxkiqt



Linda Bulong
10/18/2007 2:00:09 AM

Nestor, dumagasak laeng biit. Taga-Abraka met gayam, balong. Taga-Abraak met. Wen, narigat nga agpayso ti biag idiay yantayo ngem adda ngata panawen ti panagsubli, aya? Apay dimo pay napadasan ti nagbakasion manipud napanka Sweden?




Agposte

Ag-Loginka pay nga umuna Kailian sakbay nga agposteka.