iluko.com - website a magustoan a pagpalpallailangan dagiti pada a nangisit ti sikona.

Ania, rangtay wenno calangtayan?

 

Skip Navigation LinksHome > Blogs >



Sumrec cayo ditoy abongco
10/27/2006 12:51:57 PM

Mabalin saan la a sisiac ti adda padasna a castoy: Parbangon ti Sabado. Gapu ta ammoc a diac sumrec nga agtrabajo, cayatco coma met a naladaw ti panagriingco. Tay cunada a pa-lazy-lazy sacbay a bumangon a mangtempla iti café ken mangipapudot iti pagalmosar saacto aglaba iti namurengan tay napalabas a lawas. Ngem casano a di matucay ti uray casanot’ irutna a turog ket diay uroc ni Lacay... Apo, no dadduma daytay cayatco a casla accidente tay gulpi a panagbal-likidco ket medio napigsa ti panangiwasawasco iti cannigid a tackiagco a pumanalpaac ti panangtimamna iti ngiwngiw ni Lacay… Ngamin ta no mangegmo laeng daytay nautoyan nga uroc ni Lacay, ayna ta casla addaan iti bucodna a percussion section a danggayan ken, no dadduma, casalisal ti reed section.

Maysa ngamin ni Lacay cadagitay no dimo cuddoten iti uray la nga umsiag nga agpaigid iti cama, pagam-ammuan naca-first gear manen diay urocnan. Ngem imbes nga intuloyna ti maturog iti daytoy nga agsapa, bimmaringcuas ni Lacay. Intapayana ti maysa a bangir ti timidna iti cannawan a daculapna sana inyarcos ti cannigid a tackiagna iti barucongco, ditay lugar a maapirasna dagitay “hot buttons” co, dagitay aabucayen, cunadan sattay? Immapay ti naalicuteg a bangbangir nga isem iti rupa ni Lacay ket impatoc nga adda “post-marital” a gandatna ket diac nagawidan ti casla pimmigsa a panagpitic toy puso ken ti rimmasuc a darang a casla kimmalupcop caniac…

“Baket, 'niattayen ti Ilocano ti ‘bridge’?” inimtuodna.

Bridge? Hmmm... Adda casla naggilap a bombilla iti utecco.

“Rangtay,” inyesngawco.

“No cas pagarigan Insic ca, Baket, wenno napusi amin dagita ngipenmo, ania ti Ilocano ti ‘bridge’?”

Napilitan a nagmalangaac. No ririingmo, naginad met ngamin ti panagwerret dagiti cararet ti utec.

“Sumuco can, Baket?”

“Aha,” intung-edco.

“Calangtayan, di ngamin?” Limmucay ti panagangesco...

Dagitoy man a clase/parte ti Literatura Ilocana—caaduanna tay macuna nga ‘oral literature’ wenno ‘folklore’ ti intay lagipen ken urnongen ditoy tapno dida mapucaw iti panagtulid ti panawen ken mataginayon ti rangtay wenno calangtayan iti napalabas—rangtay toy caputotantayo ken dagiti masanguanan a caputotan. Dagitay cuna ni Merriam-Webster a “traditional customs, tales, sayings, dances, or art forms preserved among a people” wenno “an often unsupported notion, story, or saying that is widely circulated”.

Nabacnang tayo nga Ilocano cadagitoy a folklore. Uray no dimo painumen iti basi ni Tatang, Nanang, Apo Lacay, Apo Baket, wenno ni Apot’ tuod ket nalabit adda aglemlemmeng a napintas a folklore wenno naisangsangayan a padas wenno lagipda nga agur-uray iti panangawis wenno panangud-udmo iti panangistoriada kenca.

Cas pagarigan:

1. No natibbin, Nanang, badon…?

2. Daydi balassitang a masicuran idi madlawna a mangrugi nga agtubo ti buoc iti ngatuen ti nagbaetan ti sellangna, iti pangunegen a babaen ti pusegna. Isu nga imbalunetna ti ridaw sana inyidda iti licud daytoy, impaulina dagiti sacana/gurongna iti ridaw sana rinuggian a sinaggaysa a pag-uten dagiti buoc a nabudo ti ramutda. Imasna/Pagdacsanna ket diay batog ti ‘cuana’ adda sara ti ugsa a peligro ti pannacaibitinna iti licud ti ridaw…

Adu pay sabali nga anecdotal a sarsarita, burburtia, proverbs wenno fables a parte ti folklore ti pulitayo nga Ilocano. Adda inurnong ni Isidora Blancaflor a napauluan iti “Philippine Folklore Among the Ilocanos” a naipablaac iti “Western Folklore” [Vol. 15, No. 3 (Jul., 1956), pp. 159-167]. Dagitoy ti sumagmamano:

1. Perdicion bagas agraman tuyo.

2. Uray naata tay tungo no maisungrod sumgedto.

3. Uray isubsubomon mateppayto pay laeng.

4. No awan ti anus awan ti lamut.

5. Agincucua sapay no di.

6. Mabiag ti calcalsada matay ti coscosina.

Nalabit adda met nangegmo a castoy a no mabalin pangngaasim ta ibatim ditoy nga inayon iti sanicua ti literaturatayo. Ket uray no awan, awisenca a sumarungcar ditoy a makidigo. Mabalin adda met maadalmo ditoy nga aramatem a pasacalla diay istoriam iti sumaruno a pannakitungtung wenno pannakipatpatangmo. Ket yamanec no mangicur-itca uray sangcabassit laeng maipanggep iti ania man a magustuam a pirgis ti Ilocano folklore, wenno dagiti padpadasmo a nalabit naisangal iti maysa wenno sumagmamano cadagitoy.



Comments



Anonymous
10/27/2006 10:44:30 PM

Daytoy man ti maysa:

Cusip, cusip culanit
Agbitbitin langit...

Ooops, diac met malagip tay tuloynan...




Jose
10/28/2006 7:25:24 AM

Cunam, Comare, ket agsipud ta pinanaganandac iti Jose wenno Cusi iti siroc ti latoc iti ubingac, dayta 'Cusip, Cusip culanit' pay ket ti naki-ap-apaan wenno nacapicpiconan idin. Salbaje!




Edmund Salvador
10/28/2006 10:03:59 AM

Uray maratrat ti puklo no dayaw ti di malagto.

Ti makaturog makamukat, ti nasalukag agbiag.

No masapa ti ururirem awan tudo iti malem.

Siasinoman nga agiggem iti banga mauringan.

Napalpalet ti dara ngem iti danum.

Tured sipit.

Agsakbay pay, maarus pay.






Zeny Padre
10/29/2006 3:39:35 AM

Very much honored, Edmund, for dropping by and leaving some beautiful nuggets.

Cunac ngaruden nga adu ti aglemlemmeng a cacastoy nga agur-uray iti pananglagip ken panangurnostayo tapno di malipatan.

Manen, Dios ti agngina kenca Edmund ken dacay amin amin.




Vanidad
10/29/2006 2:19:02 PM

Ti kukua masapulan ngem ti pintas saan. (Malaksid no adda pinagpa-cosmetic surgery na!)



Jerico Ray
10/29/2006 3:09:26 PM

Mabalin daytoy Mrs Zeny?

Ritritemon kayong
Rupa ti aramid
Nalaka no sao
Malaes ti tukak a mapayatan
Kumleb a tumiro




Zeny Padre
10/30/2006 12:46:23 PM

Jerico: Diac sa pay nangeg dagiti dadduma nga imbatim ditoy, Ading. Thanks. And please come back and leave some more.

Dayta malaes ti tucac a mapayatanna, nalabit isu daytay cunada a dina maunnaan ti libegna...




Edmund Salvador
10/30/2006 5:05:01 PM

Dadakkel ti lapayagna napaut ti biagna

Nagtengnan ti pagpatinggaan ti lubid

Saan a mabalin nga agtakkub ti ungot ken pino

Agsapsapoka iti suka tapnon dika mabalsan.

Ispantar birabid met ti aramidmo

Awan ngata't layana?

Malunagto pay ta landok.

Manilawkayon ket sumipngeten.

Alluadam dagiti saan a makitkita.

Pimmamulinawen a puso.

Kasla naisab-it nga "hanger".

Dimo unay....Kaka.

Sikanto met ngamin....




Ruby Abad
10/31/2006 4:58:44 AM

Wow nanang very interesting atoy inaramid mo ket innak man la namurmurayan kadagiti nadakamat ditoy nakunkunakon nga very different encountered blog. Keep the good work nana. DATOY MET NI AGKABANWAG KUAK MAN LAENG NGA RUBY TONG-ALAN ABAD nga taga Alfonso, Gregorio Del Pilar, Ilcos Sur iti nariingak lugar ko nga upland municipality.WEN KUMUSTA KAYO DITA SABALI NGA PAGILIAN. ANUSAM NI TATANG NUPAY NAPIGSA TI UROK NA TUTAL NAIRMAM KAN DIBA?nAKUNAKON PAGYAMNAK TA NAAM-AMOKA NUPAY DITOY bLOG MO KET SLUDWAN KA MAN NANA ITI ANET MO/ NAANUS KA MAN A TALAGA.aDDA MET DAGITI SUMAGMAMANU NGA NAIPUBLISHED KO DITOY KE PANGAASIM TA SURSURWANNAK PAY NGA MANGLAGALAGA ITI ADU NGA PIDDAS,LABBA, BIGAO NI DANIW, DAMDAMAG,SALAYSAY,SARITA KEN DADDUMA PAY A KAS SUBAD ITI PANAGAM-AMMOTAYO KENNI TATA.aDU DAGITI PEN NAME KO NGA NAGAMIT KO KADAGIT NAIPUBLISHED KO A KAS KADAGITI SUMAGANAD: ART,LUVY.MR.U.BOUY,JEROME. aL A KASTAN NANA KEN TATA.ADDAAK DITOY SIUDAD TI CANDON ITA NGA GUNDAWAY NGA AGTRATRABAHO ITI BOOKKEEPING AND ACCOUNTING FIRM ITI OISINA NI SIR SANTOS CORTEZ SANCHEZ (ENROLLED AGENT WENNO ACCREDITED TAX PRACTITIONER DITOY PINAS)ITI OAIG DAYA, CANDON CITY. Napansin ko nana nagadu met ti sabong nga rose mo dita background mo a nagpapicturan no mabalin koma nana ket dumawatak tapno adda man maited ko nga sabong iti birbirukek nga dayag ta ngay baro pay to agkabanwag nga baro ditoy Tirad Pass-Gregorio Del Pilar, Ilocos Sur.K



Zeny Padre
10/31/2006 7:34:59 AM

Napateg a Cabsatco, Edmund, cunadan sattay a ti utang mabayadan, ngem dayta naimbag a nakem saan.

Uray pay no casta, Cabsat, 'ut-utangly' ngarud cadagita ayat, tallugod ken gagar a mangibati cadagiti pacalaglagipan a nabalitocan a pampanunot ditoy.





Zeny Padre
10/31/2006 9:08:30 AM

Ruby, Baroc, cunada a no adda sabsabong, araken dagití culibangbang.

Ala wen, Baroc, awisenca a dumagas a mangkettel iti paggugustom a rosas ditoy jardin bareng macatulong a mangparucma iti andingay dagita un-unnoy...

Ket no macasair ti imas ta longganisam a mangpedped ti essem dayta ing-ingungotem... (Nagadalca iti meat processing, cunam sattay, Baroc, isu a 'coscosme, no "other" meaning intended!)




Anonymous
10/31/2006 9:27:45 AM

The following is pretty universal. However, it is downright stereotypical Ilocanoish:


"NO AMMOM TI AGIDULIN, ADAYO TI INCA PANAGBISIN."


Purrrty beautiful inspiration for the incorrigible, yet hopelessly optimistic, spendthrifts like me!




MARIA MATHILDA
10/31/2006 9:46:52 AM

I saw the first posting!

"AGICULIN"

What you said is true indeed, ulitek man apo...NO AMMOM TI AGIDULIN, ADAYO TI INCA PANAGBISIN."

Dagiti addaan saan a mabisinan.




Anonymous
10/31/2006 10:53:47 AM

Salayusoyen
Tay agidda iti butbot nga icamen.


Nangegcon sa dayta iti daydi Apo Baket.




Lelang
10/31/2006 11:09:39 AM

Kuna met daydi Lelangko:

"No dika agkuti awan maani"




Edmund Salvador
10/31/2006 4:07:57 PM

Agpurawton a ti uwak Kabsat...

Yaman pay Apo ta immayka....

Inkayo ta kababain ket immayda idi datayo....

Patiem, masapulna ti kabinnukotna dayta..

Nadawi ita ti lames ta asideg ti bituen iti murdong ta bulan.

Nasapaka a timmao ngem naladawka a nagsao..

Manmano a kumagat ti nataul nga aso..

Kasla sumpeg nga alumpipinig kunam sa..

No diak la natangad ti ngato.. Diak ammon....

Kasdiayna ni daydiay...

Biangotka la unay....

Dika man pasalsali ala...

Tandaanam ti kunak...no di pumudno...

Kasla arabas ni daydiay...

Awan ti agbilang a di agpullo...










Zeny Padre
10/31/2006 9:57:02 PM

Edmund, sica gayam ti adut' pupocna. Thanks. Nagsayaaten ta dimo malipatan dagitoy nga expressions/sayings.



Ruby Abad
10/31/2006 10:55:01 PM

Ngarud ngay nanang kumusta ka manen a kadwan ni tata!Ipalayon kon nga isu ti aramatik a pang tawag kanya yo yantangay isu iti mas close nak kaiayo. Kua ngamin iti mismo nga nagtaudak ti awag ko ken ti inak ket NANANG met ngem no ti amak ket PAPA. nGARUD AGSABALI ITI AWAG KO ITI ASAWAYO NANANG kEN TI AMAK ta paga-ammok metten nga lumakayen ni Tata isu nga kasta atta metten. (JOKE ONLY)wEN GAYAM NANANG SAAN LATTA NGA MAGUPGUPED ITI RUGSOK NGA MANG-AP-APRESYAR TI GAPWANAM NUPAY PAREHAS TA PAY LAENG NGA NAGANOS ITI PLUMA NOR BLOG.

Ania ngata aya met ti innak ipadigo kenka tapno maibaw-ing met attensiyon mo kanyak nanang iti daytoy man laeng nga gundaway.Kua man gayam nanang ditoy ayan mi nga Gragorio del Pilar ket adda ti historical place ditoy awan sabali ti Tirad pass ditoy nga natay ti kaubingan nga Hrero,Heneral iti inka napanawan nga Pilipinasawan sabali no ni Gregorio del Pilar ngarud ngay isu mettin ti nagbalin nga naGAN ITI MUNICIPYO MI. mAIPANGGEP TAY NAADAL KO NGA MEAT PROCESSING SI TATALLUGOD NAK NGA MANGIBENGLAY KENKA KET NO TAGA DIPPA-AR KA PAY ITI UMAMYANAN DITOY ILOCOS PANGAASIM TA DUMAGAS KA DITOY CANDON CITY TA MANGALA KA ITI CALAMAY MI KEN NU KAYAT YO KENNI TATA NGA SUMUROT SADIAY SURONG-DEL PILAR NGAMIN SADIAY ITI PAGAR-ARAMIDAN MI TI LONGGANISA KEN DADDUMA PAY NGA MEAT PROCESSED. 'til next again nanang but please tel me no adda iti development ti panagurok ni tata...he...he... bay-am nanang tapno agresearch nak pay no kasano nga preventaran ti nalabes nga panagurok ni tata.Agyamanak manen ti maminsan ngamin ta fenedbacam ti umuna-una la unay a messages ko NANANG.




Edmund Salvador
11/1/2006 10:36:15 AM

Adda ulona dayta nga ubing kunam sa...

Adadu ti nainumko a danum ngem sika...

Lumtak ti ngipenyon dikay pay agriing...

Kasla naipusan nga ullaw...

Kaska la inkalaingan...

Kunam no siasinoka a pulano...

Padasenda a ta kitaenda...

Dimmakkel dayta nga adda balitok a kutsara iti ngiwatna...

Pinanuynoyandanto met ngamin...

Isu ti pannakangiwatda....

Kasla agibuybuyat a malabi...

Mabaybayagkanto met ngamin....

Nagpatingga't anus kenkan!

Kastoy latta dataon, sulaso.....

Marmarabituktok, marmarabituka,Apayapay nga agdillawka ket taoka met
a naruka.....

Diak pati..Diak kita...

Awan timek...Awan dumngngeg....

Bay-am tapnon agnakem...

Awan ti matnag nga agpangato...





Ruby Tong-alan Abad
11/2/2006 12:00:12 PM

Susit ti agassawa masapul nga mailimed kadagiti annak kangrunaan kadagitibbassit nga annak/ubbing.Dakkel ngamin nga mang-apektar iti ugalida iti masungad nga bakal iti biagda. (Ruby Tong-alan Abad Nvember 1,2006 /3:20 pm)



Edmund Salvador
11/2/2006 12:01:27 PM

Isu ti cruz ti biagko.

Isu ti nangisit a karneromi dayta.

Inton diak nakapagteppel ta........

Dimakto met ngamin pinatpati...

Dayta't naalalam...

Mangitka la unay...

Mama's boy dayta..

Ne,Agsingsingpetkayo, Wen..

Ti la adda aya?

Iyawidmo ta adimon ket sumipngeten...

Dua ti dilana dayta a tao,sika..

Uray ditana...




Zeny Padre
11/2/2006 12:16:42 PM

Hello Everybody!

Nalabit nadlawyo a na-delete ti postco nga "Ilocano Folklore--Alphabetically."

Ngamin ta no attidog unay ti post ket maputed met wenno saan pay ket a mai-poste.

Dicay coma maupay no saan a ma-alphabetize ditoy dagiti Ilocano expressions, sarsarita, burburtia, proverbs, dal-lot, cancion, wenno fables nga ibatiyo. Mangaramidac to iti blog iti ruar ti Iluko.com a pangipablaacan cadagiti na-alphabetize a maurnong ditoy.

No adda sabali a pamuspusan nga ammoyo a panangurnos cadagitoy ibatbatiyo tapno saan a masapul ti rummuar ditoy Iluko.com, yamanec unay.




Anonymous
11/2/2006 1:12:58 PM

Shoo, shoo, billit
Awan no panaggagaik
Adda no panaggaapit




Edmund Salvador
11/2/2006 4:29:14 PM

Ti makaturog makamukat
Ti nasalukag agbiag

Ti dina ammo a taliawen ti naggapuanna
Saan a makadanon iti papananna

Ti saan a makasursuro nga agtulnog
Dina namnamaen a makapagpangulo

Igagam ken kaasiam dagiti nataenganen
Ta ti kinamannangaasi ket napatpateg ken nasaysayaat ngem balitok.

Nasaysayaat laengen ti maladaw
Ngem ti awan a pulos

Napia laengen a ngem ti awan....

Adda latta etta....

Atiddog ti imana dayta....

Kasla agbibbibig a kabayo....

Naulimek, ngem dakkel ti natugawanna....

Sio, Sio
Billo,billo
kitaem ta ipusmo
ket adda sinan-tao





Edmund Salvador
11/2/2006 4:32:58 PM

Sorry Naulitko ti immuna a balikas.Diak malagip ngaminen a nai-postko.
Kumstacayo aminen a gagayyem iti daytoy nga abong. Thanks..




mang banong
11/2/2006 5:55:23 PM

no agin-lalaingka,
adda labitna sultakendaka!

pangas a mannarita,
kasla la ketdin naka-ad-adu ti ammona.

suratka nga surat ngem ti ibag-bagam agsisimparat.

dika unay kayong, ta amangan no ibagada, nakasaraktayon iti agmauyong!

maag la ngaruden dagiti kasasaom
maysaka pay a sangkamauyong.

kitaem ta baddekmo tanud
amangan no inka mailuod.

dillawem ta bag-bagim
saoka a sao, kabul-bulonmo ti angin.

kaslaka la teggaak
nagbatay idiay likud ti nuang kunam la no kukuanan ti tambak.

idi nagpugiit ni lelongmo
isu met nga intarayda ni tiyahin mo...hehehe!




Zeny Padre
11/2/2006 8:12:11 PM




Tunggal patayaben ni Lacay daytoy a cancion casla adda malunag a naisangsangayan a ricna ket ammoyon no sadino ti pagturongan dayta... Isu nga ibatic man ditoy amangan no cayatyo a padasen nga idaton iti dungdunguenyo a caingungotyo:


DAYTOY CARAYO


Nabayagen, O Biagco, nga innac palpaliiwen
No aniat' manggutoc toy pusoc innac metten ar-arapaapen
Anta sica gayam, Biagco, ti dardarepdepco
Apuy ricnac agrucbab kenca, O Laing.

Irucnoyco ngad toy ayat dita nay dayagmo
Nadalus, awan duadua daytoy carayo
Italimengnac dita let-ang ta barucongmo
Angel, Bituenco, pagbiagac dayta ayatmo.




Ruby Abad
11/2/2006 9:05:11 PM

MANEN WOW NANANG KO NAITUYANG KA MAN A SAPUYOT KO ITI KADAALDAW NGA PANAGBIAG, NGARUD UMAY KA MAN ITA ILALAEN TA NANGSIRAY KA MANEN, NANGIYABLAT KA ITI IL-ILWEK NGA PANNAO A KAS PAGGUGUSTUEK NUMAN PAY NI TATA KET PILAWEN NAK TO NGATA YANTANGAY MAIKATLO ITAN NGA INNAK LABSEN ITI PANANG-APRESYAR KO ITI SAGUDAY A GAPWANAM.Makunkunakon nga pagsakduak atoy blog mo um-umno nga ramen a manitunday naprogprogreso nga panangaramat ko iti Literatura Ilukana. Agyamanak Nanang ko, kumusta laingen ni Tata.



Ruby Abad
11/5/2006 3:19:32 AM

nagrigat ti sasaaden ti maysa a lalake akaskanyak ita, yantangay napalaos ti innak panagbabawi iti naaramidak nga basol nanang, awan sabali nga innak kamangan no ni laeng ni nanangko kasta met ni tata ngem saan koma ngarud nga innal iyuman daytoy nga concern ko yantangay lakay ken baket kayon ngem awanen sabali nga innak pagkamangan nga kaasibay to met ti Dios Jehova.Agnanai ngarud iti kastoy nga napagteng ko, addaan nak ngarud iti naan-anay nga edad ngem ta apay nga kastoy panangilikakak koma itan ti napagtengko ngem ania ngarud Nanang nailaw-annakon ti dakes nga galad.It's love making leading to immorality ika nga! Dakel innak panagbabawi ngem ania ngarud anusak Nanang ko ngem adda gundaway nga umay mangsingsinga dgitoy nga napagtengko ket kanayon nga ay-ay-ayeken toy pusok/riknak. Panga-asem Nnanang ta bayabayen nak nupay kas konak nataingannakon ta agtawen nakon iti 28 ngem kaskasdi nga nga diak pay maawid,maurnos gusot ti biagko. Mangnamnamaak Nanang ti anet mo nga nga mangibinglay ti di agsarday nga pammagbagam kaniak. Diakon ammo ti innak aramiden. Kunak ngarud malpaskon iti kursok nga MAEd in Guidance and Counseling ta bassitin ti subjects ko bale dua laengen ngem ben-eg nga diak maiturong ti bukod nga bagik. Mangnamnamaak ti naayat nga sungbat mo toy anak mo ruby nga addaan san tendency nga maigamir iti dana iti kinaawan ragsak ti biag. Agyamanak Nanang ket regards laengen ken Tata.



Eduardo Padaoan
11/5/2006 3:38:53 PM

Ti agmula ti bato, agapit ti angin.



Edmund Salvador
11/5/2006 5:50:25 PM

Bay-am...agsardengto latta...

Mabalin kad' nga awan met!

Isunto pay ti kunam.....

Agsarakta dita karasayan tugot!

Kasla napausan a baed.....

Inaramidnak a pagpigadan,,tse!

Kabuteng ti kimat ta bulong ti unas ta nakirsang...

No inka't Paoayen a ket innak met Bataken....

Agkimkimat...agpataud uong...






Zeny Padre
11/6/2006 2:24:54 AM

Ruby,

Yantangay nagasgasatca ngem iti siac ta cunam a dandani macalpascan iti MAEd in Guidance and Counseling, nalabit ad-adu nga amang ti ammom ken am-ammom a calificado a mamagbaga wenno tumulong kenca cadagiti nadumaduma nga issues a pacasecnam. Ladingitec, ngem dica matulongan.




Zeny Padre
11/6/2006 2:29:37 AM

Eddie (Padaoan),

Nakitac diay ladawam ken ti catudaymo dita "Jardin", isu a diac magawidan daytoy:

Ti agmula ti catuday nasaguday.




Zeny Padre
11/6/2006 2:46:06 AM

Mang Banong, Edmund, dacay amin amin,

Agyamanac unay cadagitoy nabalitocan a gameng nga ipatawidyo cadacami ditoy.

Edmund, isu met la a Numero Uno ca a mannurat ditoy Iluko.com ta sica gayam ti dackel ti inventory na iti napipintas nga Ilocano expressions nga aramaten a pangsangal iti panggepen nga isurat wenno cayat a sawen.




Ruby Abad
11/6/2006 10:00:21 AM

KAS NANANG NGA TAKLIN KO APAY APAY LATTAN NGA DIMO IPADIGO DAGITI SAGUDAY MO NGA MAGBAGBAGA ITI NAKULAAPANEN NGA BARUC MO.ADAYO NAK NGAMIN KEN NI NANANG KO A LUISA NGA ISU KOMA TI RUMBENG NGA KABADANGAM A MANGSUPORTA KANYAK ITA NGA AGDAMA NGA MANGBAGBAGA NO ANIA TALAGA TI RUMBENG NGA ARAMIDEK. NUPAY TALAGA NGA AD-ADAYO KA NGEM NI NANANGKO A LUISA AWAN MET UMDAS NGA RANGTAY KO KENKUANA NO DI TI INNAK LAENG TANTANAWAGAN NGA PASET TI BANTAY NGA DUMAYA ITI GREGORIO DEL PILAR (TIRAD PASS) MANIPUD AYANKO ITA NGA ILI A CANDON CITY. NGEM NALAKLAKA NANANG KO ITA TI INNAK PANNAKIPATPATANG KENKA DITOY SIDONG MO A BLOG.KAYAT KO MET LAENG NGA AMMUEN ITI KAPANPANUNUTAM TI KASTOY NGA NAGBANAGAK, TI PANUNUTEM KOMA NANANG KET ADDA MAYSA ANAK A MISMO NGA NAGBASOL (THE WORSE KET IMMORALITY) KET NGRUD RUMBENG NGA IGKAM ITI NA-AN-AY NGA PAMMAGBAGA. rEGARDS NA LANG TATANG.kUA TA NI ALAS DOS PASADO TI NASAPA NGA ORAS TI BIGAT. aGYAMANAK UNAY.



Eduardo Padaoan
11/6/2006 10:51:46 AM

Kastoy kunam, ngem aramid pakakitaan.

Nasaysayaat diay adda maysa a nuang ngem diay sangapulo nga awan.

No nakapukawka ti sentimo, bay-amon, agbirokka ti piso.

No agal-aladka, silpuam idiay nagpatinggaam.

No denggem amin a taol kada dang-ol dagiti aso a malabasam, inton ano pay a makadanonka ti pagturungam?





Edmund Salvador
11/6/2006 2:16:11 PM

Malit-awanto latta ti libeg...

No dika immay, di naawanka...

Dikanto met mangipirpirit...

Ininaunaka laeng ngem siak ket..tano saan...

Awanto met la't mamaayna..uray kitaem..

Siak la ti pagarigamon, Nakkong...

Kasla aglallalat a nuang...

Uray dakkel no tigi
uray bassit no sili

Saankam nga agkaimaan isuna...

Alaem ne, naimbag la a pakalaglagipam....

Awan kasayaatan no di panagpasensia...





Zeny Padre
11/8/2006 5:03:35 PM

Idi ubing Pedring,
idi baro Pedro,
idi lacay, Iddo...

Agsuso pay la ni Fermin,
Agadin to man ni Bernabin...

Ala, baybay-annacon,
Agdamili canto ti...




Ruby Abad
11/9/2006 3:52:52 AM

SAKBAY NGA TULUNGAN DAKA ITI SABALI,
TULUNGAM PAY TA BAGIM.


DIAK PATIEN WENNO SANG-AYUNAN TI DAYTOY NGA PAGSASAO NANANG-
"BLOOD IS THICKER THAN WATER."Ania ti makunayo kakabsat iti daytoy nga angulo ti pagsasao, mamati kayo kadi iti daytoy kakabsat?

Kasapulan iti panakadilaw,
Ngem masapul nga addan iti patinggana ken saan nga nalabes.

Apay ngarud kunak? nangisit ta sikom kunayo ngem...
Kina-agpaysuananna napudaw met!


Ti agsalsalawasaw...
Kapares na ti agut-utek nga alawaaw.

Kapaliiwak ditoy siudad nga ayanmi..
Agkaiwara dagiti mental disorder.
Adda rason nga kunaen tayo nga bulsek ti ahensiya DSWD ken Ama ken ina iti Ili.


Nagrigat ti agbalin a nalinteg,
Ta nakuna sadiay Bibliya awan uray maysa a nalinteg ta isuda(datayo) amin nagbasolda.

No agayat to maysa a baro(lalaki) iti balasang,
Masapul koma nga agpakada iti nagannak iti balasang. (KASTOY ITI INARAMID KO KEN TI NAMINSAN NGA INAYAT KO para iti dadakkel ni Mayuma,ITI KASTA LA UNAY NGEM ania ngarud INAY-AYAM LAENG TI NAULPIT A GASAT TI BIAGKO.Awan pabasulek numan pay ni Ay-ayatek ket addan iti sabali nga AYAT ket wen awanen a naminpinsan ti saket ti nakem ko ngarud addaan dan iti nasayaat nga biag).

Nakadakdakes ti agmula iti sakit ti nakem iti pada a tao,
Ngem nakapinpintas met ti agmula iti pagay ta adunto a rakrakem iti maigemam nga mangted naan-anay a taraon ti pamilya.




Ikko
11/10/2006 7:20:04 AM

Agsaludsodak man Ruby? Kalakianka wenno kabaian?



Ruby Abad
11/10/2006 8:51:58 AM

Naglaka metten nga sungbatan ta saludsod mon kaka IKKO! tOY NUMO WENNO ADINGMO KEt kalalake nupay ti naganko ket naisurat nga kasta-ruby. Thank you for that very very simple ?. Maawis ka man Kaka Ikko nga dumap-aw tay kakaisuna nga Blog ko nga TIRAD PASS TI AYANMI. Regards to Nanang ZENAIDA PADRE GUD DAY.




Agposte

Ag-Loginka pay nga umuna Kailian sakbay nga agposteka.