iluko.com - website a magustoan a pagpalpallailangan dagiti pada a nangisit ti sikona.

Balitok nga aldaw

 

Skip Navigation LinksHome > Blogs >



Dagidi aldaw a di agkupas_fourteen.2
12/23/2006 6:12:12 PM

Guy-guyoden da Atanud Larry ken Ani ti nasalingsinganen a putek. Naiyadayokon nga inpadaya iti batog ti kinawayananmi ti dua nga immuna a napukan. Pagmmuan ta adda agdisso a parsiak ti natangken a daga iti asideg ti aligusgosko. Tinangadko ti arimuttong ti kawayan a nagpukananmi, timmakderak manipud ti tambak ti talon a nagtugawak.

“Adda agubor dakayo!” inpakdaarko kadagiti kakaduak, inin-innayadko ti immuli iti teppang, iti baet dagiti arimuttong ti kawayan, siniraratak a kitaen no asinno ti agub-ubor kadakami. Ni Apo Pulon! asidegen iti kakawayanan a pagpukpukananmi, agkaratennag dagiti pidutenna a bingkol ta agrunot ket saanen a makapetpet dagiti ramramayna maigapu ti sakit a leprosy.

Nagkaruskusak, “Intayon” intaliawko kadagiti gagayyemko ket intaraykon ti nagpadaya, saak la nagsardeng idi mabatugak ti kakawayananmi. Kimmitaak manen iti bandana ti laud, iti ayan ti nagpukananmi. Nagsipungtuanda a binagkat ti putek: ni Ani, kayatna ti agpalaud, ni atanud kayatna met ti agpadaya. Naganglayanna, inpalaudda ti putek. Saan a basta makita ni Apo Pulon ida ta napuskol ti kakawayanan.

“Kuog daytoy nga i-Cagayan! isu met laeng a kanayon a masalama-annaka ni Apo Pulon ta naginad ka met gayam… Sumangkautro met daytoy nga atanud… di man ket marigatan kayo a mangipakastoy itan kadayta kargayo” agsisilpon ti tanabutobko, diak makita idan ta nailabesdan iti pagpikuran ti laud a gessaadan ti teppang. Urayek ida, nagtugawak ti teppang tapno saannak a makita ni Apo Pulon no bilang sumalog iti taltalon…

Inbaklayko ti sanganayon a putek ket iyulik iti teppang, agpa-amyananak, iti direksion ti balaymi,(awanen di abong-abongmi) subliekto diay maysa no madamdama. Iti katengaan ti bengkagmi, nasabatko dagiti gagayyemko, mayat ti katkatawada. Masur-suronak a nangbaon kadakuada a mapan mangala tay maysa a putek ket kunak pay kadakuada a gupongenda diay putek tapno adda sagaysada a palibbuong. Ngem kuna ni atanud a saanen a masapul a gupongen diay inbatik dita talon, ta, tallo met ti putek a napukanmi. Insutil met ni Ani kaniak a diay kano adda idiay laud ti barsakko, ken siak kano ti mapan mangala. Napikarak! isu da ti nangibati idiay laud! sa siak ti mapan mangala? Saan a mabalin!

“Ania ket ngamin ti nakapanunotanyo nga agpalaud ah!” makasurunak, ket intuloykon ti nagpa-ammianan.

Sinurotdak. Kinilik-kiknak ni Ani, sana kuna; (a nakaigapuan ti panangitupakko ti baklayko) “Dika man, doctor*! no impadayami itay diay putek, di pay nalawag a taga daya ti nagpukan! Ha?”

“Makitanatayo ngarud aya! a nagpadaya ket nagsamek ti kinawayanan!” Indepensak met.

“Her! Her! Her! Puesss! dina tayo met gayam makita ni Apo Pulon! Sapay ngarud a nagtarayka ‘tanud? Hmmm…?” Insutil met ni Atanud Larry.

Ditoy likud ti balaymi a pinermis nga inabaab ti pungto dagiti putek. Dinukdokmi iti barreta dagiti buko ti tunggal putek. Inbatimi ti dua a maudi a buko a dumna iti puonda, nangabut kami iti apagserrek ti tamudo a pangsidian… maysa a pulgada iti ngatuen ti maikadua a buko. Napan limmibas ni atanud iti sangapidaso kadaytay nakagarrapon a carboro ni Manong Eddie (manong na.) Pinalibuongmi dagiti kanyon. Ket nagdadadarison a simmangpet dagiti padami nga ubbing a maay-ayatan.

Simmirip ni nanang iti tawa ti kusina ket kunana: “Ipakadayo annakko tapno saanak a makigtot” “inkaman ibaga kadakuada Elmer ta idiay abagatan ti pangipasanguanda ta palittuogda ala!”

“Ania ti pakakigtotanyooo… aya-aa? Ket no nagkapso-oot!” inyay-ayo met ni manong, ket rimuar iti uneg ti balay. “Hey! iddiay abagatan ti pangipasanguanyo kadagita a kanyon… kababain kaniak… ta nakapsot!” ket iti apagkirem, limagto ti kabagisko sa nagpuligos iti aire a husto-husto ti patongna iti rupa ni Ani a nakatakder, sa immuttot. “PUOOOOT” “kasta koma ah, ti pigsana!”

“ama! agat-sabon ti angotna, yordz!” kuna ni Ani. Ket uray la a nagsaksakit ti buksitmi iti kaka-katawa.(Agkaangawanda kenni manong a kabagisna iti bunniag.)

Itay nagnad-nad ti katkatawami: pinadasmi nga ub-ubbing ti limagto sa agpuligos iti aire, ngem awan makatulad iti talento ni manong, ket isu met ti simmublat nga agay-ayek-ek maigapu iti makitana nga aramidmi.

“Pasig kayo amin a ballusong! Mangitugot kayonto ti saggaysakayo nga itlog no bigat ta isuro kayo dita sirok ti mangga.” Kunana sa bulonnan a pimmanaw… (Adda iti sirok ti mangga dagiti alikamenna nga agensayo iti Kung Fu, ubing pay iti tawenna a kinse, Bruce Lee ti tawagda ditoy Purok mi.) Indalimanekmi dagiti palibuongmi, nakasaganan a pangpasungad ti baro a tawen.


Doctor* - doctor ti tawag ni Ani kaniak idi, ken uray pay idi immaynak sinarungakaran diay Kahului-ditoy Maui met laeng, gapu ta adda tinudokko a partes ti bagik iti siit ti kalamansi nga ap-apalanda unay kenni Atanud Larry

----- Nagasat a Paskuayo Amin Apo! -----


Agyamanak Manen Ka Webby! kadaytoy inlatangmo a pagsursuratak.



Comments



ruby tong-alan abad
12/29/2006 10:46:25 AM

IYUN-UNAKON A PASANGBAYEN KENKA JRIC baro a tawen tapno naynay ti salun-at kenka.Ket ni toy kapatadan umay met makipatpatang nupay agdadamo dita nay saklang makunkunakon dagiti kakabaguesmo ket kakabaguesko met sadiay abongko.Ala nakunamon nagasat a baro a tawen tayo amin a sangapada.



JRIC
12/29/2006 8:22:41 PM

Dika ngarud maum-uama nga umay
Ta datayonto amin ti mangpasangbay
ti baro a tawen nga umay

adu't gagayyem idi umay umal-aliwaksay
ditoy abongmi a rutayrutay
idi dayta ngem ita dida met pay immay

Umaykonto ituloy no kua ket agungetsa ni kumander.
Umaykan Gayyem Ruby ta mangrabbi ta pay.





Agposte

Ag-Loginka pay nga umuna Kailian sakbay nga agposteka.