iluko.com - website a magustoan a pagpalpallailangan dagiti pada a nangisit ti sikona.

Dagiti overseas filipino (ilokano) workers

 

Skip Navigation LinksHome > Blogs >



NAKARAMAN WENNO KINASADUT?
11/29/2005 2:22:45 AM

Manipud pay nangrugin a mapan mang-ged dagiti Pilipino idiay Hawaii, nakita tayon no kasano a makatulong ti doliar. Nalaing dagidi pioneers ta adu kadakuada ti nanakem ket tinulonganda ti naggapuanda.

Ngem idi bumayag, idi mangrugin dagiti dadduma a mapan iti sabali a country of destination, nagbalin metten nga over-dependent dagiti umili. Adu pay dagitay dida kayat ti agtalonen.

Asino ti akinbasol, tay OFW, tay nabati a nakaraman wenno ti gobierno?

Ikkatek ita ti tulbekna daytoy while the Philippines is under "STATE OF EMERGENCY" ta tapno makakumentar tayo a mangusar iti pen name tayo. Idawatko laeng kakabsat a saan tayo koma narasaw and avoid personal attacks to fellow participants!

Pagyamanan!



Comments



Eduardo Padaoan
12/18/2005 7:21:00 PM

Daytoy nga agpayso ti kamali tayo, Clifton. Ti nalabes a panagayattayo nagbalinen nga over-dependent dagiti ay-ayatentayo ti biag. Dida la ammo ti pudno a sacrificiotayo nga adda ditoy abroad. No asino ti akinbasol? Basoltayo amin.

Ti pangkoreher ditoy daytay man Chinese Proverb: "Do not give the man a fish but teach him how to fish."

Ti OFW nalabes nga ayat.

Ti nabati a nakaraman, agdepdepende.

Ti gobierno, patpatiray-okanna dagiti tattao. OFW ket heroes kano. ngem no agkaproblema, makaammon no di aglaing. Mapanunot koma no kasano nga rumang-ay ti tattao a saanen a kasapulan nga ag-abroad pay.




Clifton Pascua
12/20/2005 12:11:50 PM

Atanud Ed, basoltayo amin a kas kinunam. Ket agpayso dayta. NGEM AWAN KADIN TI REMEDIONA?

Kitaentayo ti angulo iti sektor ti agrikultura. Ti Pilipinas wenno dagiti agtaltalon tayo ket saanda payen nga mapakan dagiti bukodda nga umili ken pamilia. Saan unay siguro iti banda ti Ilocos ngem nalawag nga ti Pilipinas ket gumatgatang manipud iti sabali nga pagilian iti nayon a taraon dagiti umili, mairaman ditan ti bagas (rice).

Ti adatna ket we are a rice farming country yet we import rice! Apay?

The bad role we play as overseas Filipino workers are the following:

1 –PANAGINKUKONA -Kaadduan a balikbayan ti agpam-pamarang nga nalaka ti agsapul iti doliar resulting to careless spending, both by the balikbayan himself and the dependent family (or families?), not to mention gratuities for parasitic friends and predating local politicians.

2 –BAD INVESTMENT –No agawid tayo, napalalo iti ayat tayo nga mapadpadayawan. Itulong tayo kano ti kuarta tayo para iti ka-adduan. Ka-adduan nga ania? School buildings maybe, street lamps and welcome arcs with our names written in bold –donated by....Ngem kaadduan kadagiti agbalikbayan ket pamisa ditoy, blow out idiay, pasarabo kenni konsehal and in the end, all those gifts will be more than the value of a simple school library. Kumita ngata tay kuarta nga nagrigatan iti makatawen iti kastoy nga pamayan? Then we go back abroad to start anew?

3 – THE FORGOTTEN SOURCE OF LIVELIHOOD. Ti panagtalon ti kasimplean nga pangiyablatan tay kinita ditoy abroad. Mapakanmo ti pamiliam uray no saan nga kimmita iti dakkel. And better and scientific farming management ket napaneknekanen nga saan nga mapukaw tay puonan. Ngem masapul nga ‘gaitam’ nga nalaing tay mangistimar. No nasadut, uray pay no mapanka iti ‘high street business’ no batugan ken rinuam mo iti easy money from abroad ayna atanud... awan!
Ti rigatna ket datayon sa met laeng nga ‘balikbayan’ ti mangiyun-una iti kinasadut no pinadayawan datayon dagitay opisyales ti ili! ("agbakasion ngarud" kunatayo!)

Bato bato sa langit but this is a challenge. You ever worked FOR a distressed OFW? And distressed because of his stupidity! Do not get me wrong atanud... Pilipino pay laeng isuna...

Dayta man ngaruden ti adatna. Paibaludko? Pai-deportko? Saanko nga maaramid atanud!

Ituloymo atanud ken umawis ka man ti padata nga nalaing. Ammok nga daytoy nga topiko ket para laeng kadagiti tao nga saan nga “NAKARAMAN” ket manmano ti aginteres –baka MAURINGAN.....

Iraman mo tay NAKA-ADAL (not necessarily educated but learned) nga kumontra atanud ta isu ti kasapulan tapno maka-adal tayo!




Eduardo Padaoan
12/25/2005 8:41:03 AM

Atanud Clifton,

Daytoy topicmo wenno topicota ket riingenna manen ti mabatbatibat a riknak iti ina a daga. Ta ibilangko la koman a paset ti adulterated a kultura ti Filipino. A dagitoy mangal-alia kaniak a mangpalidem laeng ti nasin-aw wenno natalingenngen koman a sasaadek. Ta addadtoyakon abroad ket awanen ti maaramidak a mangpadas a mangalaw wenno mangirupir koma ti kalintegan dagiti agkasapulan idiay ti ayuda, kangrunaan dagiti adda iti
rural areas a makunkuna, dagiti mannalon. Ti makipagbiag koma a makikibin kadagiti taga-away tapno maidur-as met ti panagbiagda. Lipatek la koman dagitoy ket pagtalinaedkon ti kinamnesiak.

Iti experienciak, adda ammok a gapuna, dagiti inlanadmo a kas itoy: a rice farming country yet we import rice. (Ituloykonto)




Clifton Pascua
12/25/2005 11:38:59 AM

Atanud Ed,

Kumusta Atanud? Sapay koma ta naragsak ti Paskuam ken tarigagayak ti narangay nga idadateng ti Baro a Tawen 2006 para kenka ken ti pamiliam!

‘We are a rice farming country, yet we import rice!’. Ania ti pakainaiganna ti rice production kadatayo nga migrant workers wenno balikbayan saludsodem ngata atanud? Dagitoy man ti makunak atanud:

Umuna atanud ket aminek a kaadduan kadatayo a balikbayan, kas kaniak, ket kayat tayo a pumintas met ti biagtayo isu ngarud dagitoy nga sakripisio. Saan a mababalaw dayta atanud. Manipud iti doliar ket mapakan tayo dagiti annak tayo iti mamitlo iti inaldaw. Maibaon tayo ida iti nasayaat nga iskuelaan, mabaduan iti husto, komportable a pagtaengan ken adu a bambanag a saan a maaramid koma no ordinaryo ka laeng nga empleado idiay Pilipinas!

Ti adatna atanud ket kastoy:
No nagbalikbayanen tay maysa nga OFW ket nakalipat metten. Isangpet na amin agraman tay kababalin manipud tay naggapuanna nga pagilian! Alahas, designer clothes ken tay panaginkukuna! Dida pulos nga ibaga a narigat ti sumapul iti doliar. Puera de los buenos atanud ngem adu ti am-ammok nga abakda pay tay baka ni Tatangko ti kina-atiddog tay kuentasda no sumangpetda! Pamisa ditoy, pamisa idiay!

Ket malipatanda metten tay naggapuanda a talon. Kayat ko a sawen atanud ket manmano metten tay mayat a mangiyablat tay doliarna ta tapno matulonganna tay naggapuanna a talon kas koma tay puonan a para abuno, insektisidio ken dadduma pay. Agpayso a saan unay a kumita ngem saan kadi a makatulong koma iti food production no tay sangkabassit a parte tay walo riwriw (8 billion dollars) a doliar a tinawen nga ipaw-it tayo ket mausar para iti rice production? Uray maysa billion laeng atanud, mabalinen!

Diak mamati kunam siguro atanud ngem padaskon dayta ket kaasi ni Apo Dios ket saan met a makurkurangan iti bagas dagitay nabati nga kakabagian idiay Pilipinas. Aglakoda pay ketdin, banag a saanko a nakita idi addaak pay laeng diay Pilipinas. Saanda a nabaknang ngem nalulukmeg da atanud!

Nayonakto atanud intono agsublika. No kunam ket lukatak toy tay lebbenko nga basi ta tapno naimas ti saritaan. Naimas siguron ta tallo a tawennan a nakakali! Sobra man atanud tay nasayaat nga apitko di binangkagko tallo a tawenen ti napalabas! he he he






Eduardo Padaoan
12/25/2005 1:22:05 PM

Hi! Atanud Clif,

Naragsak a Paskua ken Narang-ay met a Baro a Tawen kenka kasta met dagiti ingungotem ti biag. Kaasin Apo Dios nasayaat kami met latta Atanud.

Ala ket diak mapagkedkedan dayta idiayam a liliduken. Ngem agurayka ta saanak nga imin-inom Atanud. Ta amangan no agkamaliak ngamin ti sarsaritaek no sumiploten ti ispiritu ta liliduken. Ngem uray kasta paggayyemanta tumimtimak ta agua pataranta, murmuray ti rikna. Sapay koma ta mapan ti bituka ket saan nga umulo tapno di agbalin a agua patarantado.

Medyo naimasak sa metten ta basi ket i-basi-ngkawelnan ti saritaan. he he he.

Husto dayta observationmo Atanud. Adu kadatayo ti di metten tumulong kadagiti nabati idiay no di ketdi agawidda ta mapanda agpaambing. Ipakitada a saanda nga agrigrigat ditoy abroad. Isu nga maimpluensiaan met dagiti adda idiay nga imbes a gamuluenda a naimbag dagiti dagdaga idiay, saanen ta isaldada metten wenno ilakodan tapno adda gastuenda met nga ag-abroad. Apay ngay no diay agbitbitin diay tengnged ni balikbayan ket impuunanna laengen nga abono ti daga, ngarud nakatulong koma. Ngem adda met ngamin selfish motive wenno negativo a panunuten ni OFW. Kas koma amangan no saan nga agbisar ti apit. Pangabrotanto pay ngata? ngem ibagak nga adda ti remedyona no daytoy ti mapanunot. No kas pay laeng iti napanawak, idi adda-ak idiay Filipinas. Masapul laeng ti Crop Insurance. No agtalonka i-insuremo metten ti talonmo wenno raepmo. Ket no bilang agkibaltang ti tiempo, kas ti bagyo, layus, tungro, tikag ken dadduma pay, sigurado nga maabrot diay puunan.

Sakbay nga ituloyko Atanud ibagam man no sadino ti ayanmo itan. Addaka pay la iti abroad wenno nag-for goodkan?




Clifton Pascua
12/26/2005 2:19:20 AM

Atanud Ed,

Itag-ayko man toy ungotko ti basi a mangsaludo kadagiti kapanunotam atanud! Ramanam pay toy pulotan a kalding a bingayko a pinatarakenko tay nagaget nga ka-arrubak idiay Ilokos! Ammom kadi atanud ket immanay kano a pinagmatrikula tay barona daydi bingayna ket urayak la a napaisem iti ragsakko idi adda pay sanga-pakbetan nga natnateng idi umayna ited diay bagik a dua nga agkabannuag a kalding! Kunana pay a nasayaat kano met ti apitna a pagay ta nagkurri kano tay certified seeds nga impautangko ken saan unay a nagastusan iti abono ta pinatina tay insuro dagitay teknisian a saanna a puoran dagitay garami no di ketdi palungtotenna!

Pinartik tay bumaro sako insubli diay kabay-an Atanud. “Paganakem manen Pari” kunak ta imbagto laeng nga pagsanguanta intono pumasiarka idiay nanumo nga kalapawmi! Ayna Atanud, mabalinton a burasen dagitay mulak nga agbunga a kayo intono bumisitaka! Awitem to ni Kumare ta adu ti diket ket agaramid tayon to iti kankanen!

Saanka nga madanagan atanud ta saanko nga style ti agpadayaw kadagitay lastog nga pulitiko. Dagitinto laeng teknisian nga nalaing ti awisek nga kasarsarita ta. Mabain dagitay ‘parek’ nga umarubayan no kasdiay nga agbalikbayanak. Kaadduan nga padpadayawak ket dagitay nagaget nga mannalon atanud! Kunam pay atanud no agawidak ta agsasarunoda nga umay, saan nga dumawat ti sarabo no di ketdi mangted iti no ania ditan nga makan nga produkto ti talon.

Malagipda kano atanud idi kanayon a pagungtak ida no umayda dumawat iti bulong ti marunggay ken sabong ti katuday. Ti pamay-ak idi atanud ket pa-adek diay sanga ti marungay ket ibagak to metten nga idarekdek da diay sanga idiay pagayusan ti kusinada! Itan atanud, adda amin marungayen dagiti karrubak!

Malagipko pay atanud idi naminsan nga nagbakasionak nga permi ti panangellek ko tay asawa ti maysa nga “abroad” ken eskribiente diay munisipio nga padak nga taga-barrio! Nagudong naminsan nga naka-Nike ken nakakuentas ket nakitak nga mangtaw-tawar tay sanga-reppet a saluyot! Ung-ong kunak kenkuana ta naglawa tay bangkag diay likudan ti balayda! “Ket no naladaw ita pari, tay allowance nga impawit ni Kumare” insungbatna kaniak.

Napawingiwingak laengen atanud ta malagipko tay ka-adu ti saluyot diay likudan ti balay. Ngamin ket inturongko a nasayaat tay danum nga maibelleng idiay bangkag no kasdiay nga aginnawak!No agaw-awidak atanud ket ti kinapudnona ket diay laeng pagpletek ti major nga gastosek. Tay kanek atanud ket umanayen dagitay ‘bunga’ nga itden tay bangkag nga nasayaat ti pannakatarakenna!

Addaak ita ditoy Belgium Atanud ket tinawenak nga agawid. Iranak no kasdiay nga panagbibirhinia ta kaykayatko ti sumalog idiay talon. Lastog kunam ngata atanud ngem umubing ti tao no kasdiay nga sarunnek tay arado, pamrayan nga pangwatwatan kadagitoy agsi-sikkilen a ramayko nga tudok nga tudok itoy teklado! Sikreto ta atanud ngem ti awagda kaniak idiay ayanmi ket milionario nga mannalon ket uray la nga tumangar dagitoy lapayagko no sumalogak nga nakasakay tay dakkel nga nuangko! he he he

Sige atanud ta innak pay mangkulisip iti nayon ti basi ta barbareng no kontraem dagiti imbagak ket maka-adalak para kadaytoy isursuratko nga kabibiag tayo...




Fred Ilac, Jr.
12/26/2005 4:20:14 AM

naimbag a bigatyo appo!
naangotko ti banglo ta basiyo su a diyo kad ibilang a kinadursok ta umayak man makisim-sim.. pambaran a dumngeg ta pagsar-saritaanyo
ti makunak ket diay ayantayo, adun ti nagbaliwan ti ug-ugali dagiti tao ngem imbes koma a kannawidan a makaitag-ay ti kasasaad iti rigat ti biag, saan ta panagkitak, makaidagel pay.
puera de los buenos, adu ti sadut..uray no ibag-bagam ti ammom a nasayaat, saanda a mamati. no inum ti inyayabmo, napas-paspasda pay ngem alas kuatro!
kas idi naminsan a nagawidak..agagalda iti awan a madeng-deng, imbagak nga kaaduan kadagiti nateng, saanen a masapul nga urayen iti panagtudona tapno makaramanka. ta saluyot uray katikagna, mabalin iti agmula, sibugam la ketdi, naglaka nga agrabanga..ta pallang, maminsan laeng nga itukitmo, ton madanon panagtutudo, agtubonto manen, no met kalgaw basta sibugam, agbiag latta met, kasta met ta parda, agbunga, agraraay, ta marunggay, inwalawalmo, self- supporting..agbiagen.
wen kunada met idi..ngem nagsubliak kalpasn makatawen, dagiti bukel nga dinawatko diay amm-ammok nga agrikultor, awan met nakitak a naimula..ti nakakat-katawa, pada a taga barrio, mapanda gumatang diay tiendaan ti natengda!
kasta met laeng..siakon ti nagmula..ingganatta pagnatenganen ti kakarruba no ar-arigenngem adda met ketdi bassit nangananna..ta nagmula metten dagiti dadduma.
imbagak pay, agmulatay ti kayo ta bareng, makatulong a mangtaginayon kadagiti ubbog, awan latta..isu nga siakon mismo ti nagmula..adda met naawis a timmulong. ita ket makitadan, addan linong..sumagmamano pay a tawen, pangananto payen.
ti man ket paglainganda ket tay teks nga teks..uray awan met ti importante..no di ket kin-kinnareng-keng laeng..uray awan igatang bugguong basta adda pang-load ta selpon!
no saan umutang ken ni Bombay..dida makadlaw..idi un-unana, nakamotor la ni Barbasan nga mapan agsingir-singir, ita ket addan badigardna,,de kotse pay!
ngem panagkunak, adu pay la ti mabalin nga aramiden tapno saan nga tuloy-tuloiy ti pannakairaremda/tayo..anus laeng... bassi-bassit nga ipasagepsep kadagiti tao dagiti rebbengna nga aramiden, ipakita ti pagulidanan.
no ta pamisa-pamisa ken panaglastogan dagitay dadduma a nakapan ballasiw taaw, sabagay, isu ti agdadata a kinapudno, sabali a tung-tungan daytan! hehe
ala pay ngarud, appo ket makaaduak sa...salamat kadayta basiyo...ibatik. naimbag a aldawyo amin...




Eduardo Padaoan
12/26/2005 5:32:19 AM

Atanud Clif,

Dimo la koman dildillawen no aduek ti mangraman ta pulutan a kalding! Nagsayaat ket ti panagsaadnan a pangilangdetan 'toy basi. Nagnanamen!
Naglaingka man a nangtimpla. Laeng, despensa ta nayunak atanud ti silina. Pagaayatko ngamin 'tay kumagat ti gasangna. He he he bassit, bassit ta basi ket mayat, patingraenna metten 'toy lapayag!

Nagasatka Atanud ta adda man namnamaememon a bingaymo no bumakasyonka. Agrana la koma ngarud ti bakasyontayo tapno makapagkikinnitatayo. Awisekto ni kumarem tapno agiinnammoda met ken kumare. Kakayatanna ti agaramid ti kankanen. Ngem agurayka man dimo pay met la impalnaad ti desdes nga agturong idiay balayyo. Amangan no agkatangkatangkami metten aglalo no diakto metten ma-contact ta selponmo.

Siak Atanud ket medyo nakapuy sa ti gasat ta main-inut sa metten nga agpukaw dagiti impatpatarakenko a bakbaka, nunuang, kalkalding, babbaboy, kada manmanok. Ne, kaska met la ahensia ti goviernon nga adda animal despersalnan kunam siguro, Atanud. Ngem pakaragsakak ngamin ti mangted ti taraken ti tao. Ta no adda taraken !tay tao ket nasaysayaat a aramidenna ngem 'tay mapan makitong-it. Iti kabayagko ditoyen abroad diak pay ket ammon no ayandan wenno manon dagiti dadduma a patarakenko. Pinusgak la diay adingko a maysa a mangmonitor. Ket no agkasapulan dagiti nagannak ken kakabsatko ti kuarta kunam aya a patulodak ida a dagus. Adda pundo nga imbatik idiay Filipinas. Kunak mangwithdraw kayo pay la dita. Ket kitaenyo man no adda mabalin nga ilako kadagita patarakenen ta ilakoyon ket isu ti isulnitmonto idiay pundo dita. Ngem mabalinda laeng ti mangwithdraw diay pundo a pang-emergency kas koma ti pagpaagasda gapu ti sakit. Uray didan ipakada kaniak. Ngem no kas pangarigan pagpuunanda ti income generating project a ket ikonsultada pay kaniak. Ngamin sinuruak ida ti self-reliance a dida agdepende kadakami nga adda ditoy abroad. Adu met ti risk ti panagpataraknan. Kas iti napalpalabas a tawen dua a bakak ti inagabda. Pagyamanak kenni
Apo Dios ta tallon nga aldaw a nagpukawda ket insublida met laeng. He he he ngamin naammuanda a bakak. Uray siak diak ammo nga adda gayam bakak a pataraken idiay a tao. Ket idi nagpukaw, naggalasuges aminen nga a kakabaggian ken gagayyem a nagbirok. Impakaammoda a bakak ti napukaw. Nagbaliw ti panunot dagidiay nagtakaw. Ammoda met a diak pagan-ano diay baka ta nabalbalor pay met laeng ti biag ti tao. Idi nasapulanda ket kinunak no makasidsidakayo ti baka ibagayo laeng kaniak. Tapno dida makuna idi birthday daydi Tatangko nagpartidan ti kalkalaingan kadakkel a baka. Idi laeng napan a bulan Atanud ket in-text tay kabsatko a natay kano ti maysa manen a baka. Sapay adda anakna a nasurok kano la a maysa a bulan. Nakabulos sa kano ket idi masapulan diay nagtaraken ket naiparnged kano met idiay waigen ket nalmesen. Innalada pay laeng ti desisyonko no ikalida wenno partienda. Gapu ta saan met a sakit ti nakatayanna, makaammokayo ditan kunak no maituredyo a sidaen. Uragaenyon! He he he nalanitan man kanon dagiti sungo dagiti piman a di makaramramanen ti karne ti baka. Libre! Imbag la a pakairanudanda. Ngem mapanpanunotko a kamalin sa ti disesyonko. Impakalik la koman ta amangan no maimasanda ti kudil ti bakan ket addanto manen matayen. Bareng agbiag diay urbon ta binilinko diay kabsatko a paggatasenna ket no mapabiagna, kukuanan. Pumartiakto laengen no agbakasyonak. Ket no agranatanto Atanud sikanyonton ketdin ken kumare ti umay rumaman ti pinapaitan. Dimo met kunaen a mapanak agpamisa! Diak ammo dagidiayen a bakbakak. Kuentana kaniak ket awanen. Hidden asset man a kunada.

Ngem no bilang siakto ti makaumay dita ayanyo. Kayatko man a kapatang dagita teknisian. Bareng adu pay dagiti maadalko met a panglakagan ti panagmulaan ken panagtaraknan ti ayup ket maiburaykonto met idiay awaymi. Painumentanto ida, ket sigurado ibagadanton dagiti secreto nga inadalda idiay universidad. Pagaayatko tay man crop rotation, multi-cropping, small scale animal raising, backyard gardening, green revolution ken dadduma pay a topikoda.

Nay! itagaytan ngarud ta basi Atanud ta amangan ti kabayagnan dita ungot ket agbalin a suka. Umayakto manen bumisita.




Eduardo Padaoan
12/26/2005 5:41:03 AM

Ne pumakpakadaak ket simmangbayka met gayam Ka Fred. Pasipdusipdot ngamin ti panagtudokko ti teklado isu a dika nakita a dagus. Pasensia ta agisturiaakto laengen ti padasko a nangkumpitensia kadagita Bombay nga agpapautang. Ala ket dakay pay la ken Atanud Clif ti agpatang!



Clifton Pascua
12/26/2005 8:01:07 AM

Dumanon ka laeng gayyem Fred.Adu pay toy pulotan ken tay duogan nga basi dita sirok. Kadduaem ni Atanud Ed nga mangpili kadagitoy bin-ik nga bawang -imbag laeng nga pangpatayan iti oras -ta didanto ket kuna nga artek tayo he he he!

No medyo mayengyengkayo ket iyuldagyo laeng dita datar uray ta napariir met.

Ileppasko laeng toy inyawidko nga trabahok.




Clifton Pascua
12/26/2005 12:52:28 PM

Nalpaskon tay trabahok ket makitak ket nakaadu kayo met tay binuksilanyo a bin-i a bawang! Iyawidyonton dagita nagpillian ta nasigu a pagrekado iti langonisa!

Naimbag met a bigatmo Pare Fred. Itugaw mo dita langkapi ta iruarko tay adobo a kalding ken ramanam dayta sinillian ni Atanud Ed nga kilawen ket naimas –apagisunto no agawidka –kuna ni Atanud nga kasla kano ‘bayagra’ ti epektona! he he he! No agpayso diay imbagana ket atanudenkanto met no adda pannakaikari! Uray singin pare ket anakek ida a dua!

Agpa-aramidak met ti kalamansi juice no dimo maibagi dayta basi! Kabungada ita!

Atanud Ed, denggen ta man diay ibagbaga ni Pari Fred! Teks! Teks! Teks... hmmmmm. Awan ti bibiangtayo kunak koma ngem addan sa rason ni Pare, Atanud! No ti pannakisarita tay inay-ayat idiay abrod ket okey laeng ngem no kas ‘tay kuna ni pari Fred nga pang-displey laeng a ket sabali daytan! Pare, diak pay maibtur ti agteks no saan nga importante! Pampanunotek ngamin tay sumaruno a puonan tay kabarbaro a proyektok para iti pannangan dagitay ka-arrubak! Bareng pare kunak no addanto manen mangted kaniak iti kappuros a paria a pakbetek!

Pallang, parda kunam sa itay Pare? Hmm nagimasen! Nagramanen kunak koma (ta utekmo atanud.... baka adda berde dita nga agsisi-im!) Ti rigatna atanud ket awan sa met ti mayat nga agsidan?

Pinadasko met naminsan ti napan diay kun-kunada a Jolibi ken Tsaw-King, pare ken atanud! Ngan-ngani diak matilmon tay dakkel a malukong iti halo-halo kakabsat ta bigla nga nakitak ti nag-guddua a lubong!

-Idiay uneg, ma-angot ko dagitay ‘pisos nga naggapu iti abrod’: –napipintas a kawes, nangingina a selpon, Nike a sapatos, nalalaaw nga estudiante, napasindayag a balikbayan! Ti la pakakitaam atanud nga balikbayanak ket tay pdf nga adda diay bulsak ta isuratko amin nga makitak! (ngan-ngani didak kayat a pastreken atanud ta binulodko ngamin tay spartan a tsinelas ni kabagis ta salimuotenak nga agsapatos)

-Idiay ruar ti Jolibi ken Tsaw-king ket ti maikadua a rupa ti pagilian: -seryoso nga estudiante a mangdumdumog tay kuadernona, pudpod a sapatos ken mabisin a rupa ken dagitay umili nga awan balikbayanna!

Atanud Ed, Pari Fred, itangadtayo man ta basi ta tulungandak a mangibuksil no ania dagita a nakitak a DUA A RUPA TI PILIPINAS!




Fred Ilac, Jr.
12/27/2005 5:38:09 AM

la man ngarud gayyem tagayandak man!
piman kasta a talaga ti biag a makita ita diay ayantayo..kasla singin ngem saan nga agkarup-rupa. tay maysa di pay makadiram-os ket tay kabsatna, nakasensenyorita.
idiay abay ti bakud ni milionario nga addaan iti nalabon, adda barong-barong, agngay-ngay-aw ti rusok ni kabsatna..amnagan no tallo nga aldawen a saan a nakakita iti inapuy..
wen makita ti agsupadi a rupa...tay saanna a kinabalinan ti makagaw-at iti bulong ti doliar, agsiput-siput lattan ah ken ni kabagisna a napagasatan a nakasukdal,,ngem dagitay met ngarud dadduma, no umastada..kasla la ketdin linak-lakada a pinuros piman..la ket no dagitay makaammo no kasano a nagubbog ti ling-et sakbay a nakut-kutmo tay "berde" a bulong, agisem-isem lattan..
la kargaanyo man ngarud ta sinilian a kunayo ken ni ka Ed, no agpayso a ti epektona ket kasla "bayag...." ta bareng agbal-baliw ti ugali tay tarakenko a "diplomat"..saan aya a ti diplomat ket saanna nga ammo iti agunget wenno agpungtot? su a diplomat kunak man hehehe..mayat ta basi gayyem kud-kudanna ti panunot..la ket napia la a ling-lingaytayo
dumagasakto manen innak man pay aguma...tenk yo




Eduardo Padaoan
12/28/2005 5:54:48 AM

Saan nga panangpabain ta idiaydiayam a bawang Atanud Cliff ngem ti kinagpaysona ket adu ti bawangko ditoy Toronto. Adda variety ti bawang ditoy nga imulmulak iti backyardko ket umanayen nga abastomi ti makatawen ti maap-apitko. Mamidua ti apitna daytoy. Umuna ti sabongna. Naimas a ma-stir fry ket maudi ti bagasna. Paset daytoy ti backyard gardening ken multi-croppingko kada summer.

Naangawka met Atanud kunam ngata ngem umayka agpasyar ditoy Toronto iti summer. Ibagak ti addressko ket no malipatam ti Street Number tumaliataliawka laeng makitamton dagiti saba a mulak a naipaso, kunam idiayen. Ket agsidata pay ti sabong ti katuday ta adda ti immulak ti paso ket ti summer ti kaado ti sabongda. Inyunegko idan ditoy balay ita a winter tapno agsurviveda. Diay idiaydiayak a karabasa idiay abongko ket bunga pay ti karabasak nga inlebbenko ta adu unay ti bungada.

Ka Fred mayat man ti panangubuksilmo wenno pangiladawam kadagiti dua rupa a nakita ni Atanud Cliff. Maluyaanak man ta naisupadi a rupa ket dumegdeg ngarud manen ti saludsod nga ania ti maaramidantayo kadakuada.
No siak a maysa no addaak la koma ti sibayda ket ammok maiwanwanko ti panglakaganda. Maibinsabinsak ti aramidenda. Ken mabalin a matulungak ida nga mangsolbar kadagiti problemada. Ngem addaak metten ditoy abroad gapu ta isu siguro ti gasat.

Malaglagipko dagiti naaramidak idi addaak idiay away. Nagfunfundarak ti Farmers' Classes, Mothers' Classes, ken Skills Activities Program babaen ti pannaki-tie up ti nagduduma nga ahensia ti govierno. Naamuak dagiti parikot dagiti kaaduan. Agingga ti nagbalinak a Farmer Leader ket mabalinko a ibinsa-binsa no apay a ti Filipinas a saan nga umunlad ti panagtalonan. Ngem no iyesplikarko daytoy kattigid ken kannawan, ngato ken baba maluksawda kaniak ket dagiti dadduma ibagada a kumunistaak, ket pakaigapuan kano ti rebelde. Ngem dagiti ibagbagak ket agpayso met. Ti gapuna ti amin ket awan ti incentive a para kadagiti mannalon.

Adu dagiti programa ti gobierno a pagsiaatan koma dagiti taga-ur-urriab ngem ania ngay ti makinkinabang dagiti buklis a politiko.

Adda animal despersal ngem ayanda ngay? Dagiti la asideg kadakuada, dagiti aso-aso isuda ti maikkan ket dagiti dadduma ni metten Apo-apo isu metten ti akinkukua aminen. Addada idiyayen pastonan.

Adda ti certified seeds. Libre wenno sukatanto ni mannalon. Adda met sangkapirit a mairuar. Adda abono a subsidy kano, (no basbasaenyo dayta agrikulture scam dita Filipinas ita baka agpayso) ngem ania ngay no ghost give-away met dagiti adda idiay ngato, ti pundona addan idiay bolsada nga i-cascasino.

Idi diak ammo itan. Ti NFA dumanon koma kadagiti barbario ngem dagiti taga barbario ti dumandanon idiay kabisera. Uray koma no kada ili ket adda opisinada. No aglako ka ti irik masapulmo ti passbook. nasayaat koma a no maalam ti maminsan laeng a papanmo. Ta ni awan ti agpirma, naibusan ti forma, etc. ngem ti kinagpaysona dagiti manen gagayyem a negosyante ti akin-iggem ta negosyo ti irik. Isuda ti gumatang ken aglako ti NFA. Kuarta ta nalaingda nga agregalo! No makaalaka met ti passbookmo. Nangato met ti bayad ngem saanmo met a maala a dagus ta naibusan kano ti pundo wenno ania la ditan a dahilan ket agsublikanto manen a mapan agsingir. Di daytay naituon a ngina tay irik ket mapanto met la ti kapapasahemon. Ilakomto lattan kenni Insik diay irikmo. Uray nalakan ta ni Insik isunton ti makinabang ta panna ilako idiay NFA ket gapu ta nalaing nga agregalo, ayos ti negosyo. Adu ti magasto ti panagtalonan. Adu ti risgo a kalamidad.

Ti saludsodko agpayso kadi nga agkurkurang ti irik wenno bagas ti Filipinas? Babaen ti informationko kasla diak a patien. Ta dagiti apit ket maho-hoardda. Apanka kadagiti dadakkel a bodega dagiti negosyante ti irik ket saludsudem kadagiti kargador idiay (painumem pay nga umuna). Saludsudem no ania a tawen ti lebbendan nga irik a kiskiskisenda. Baka uppat wenno lima tawenen a nakalebben. Sada laengen kisksisen dagitoy no nanginan ti bagas. Ammok dagitoy ta adda dagidi tiempo a naalak ti piar ti maysa a gayyem nga insik ket imbagana ti sekreto. Pinagnegosyonak a ti kuartana ti inusarko. Ibagana ti presio ket ti magatangko uray mano adda ti bagikon ti kada kilo. Ket no magatangko ti nababbaba pay bagikon ti butal.

Dagiti concerned a mannalon kinagpaysona ket op-opposanda dagiti importation ta isuda dagitoy ti mangidaddadanes kadakuada. Apay kunayo?
No addanto pay tiempok ibinsa-binsak ti detalyena.

Daytoy ket ti diak koma paginuman ti basi ta amangan ibagada laeng a bartekko dagitoy ibasbassawangko. Ngem baanyon, kasano ngarud a masao a pulutan ta kalding no di met uminom ti tao!

Ania met dagiti rumbeng nga aramiden met dagiti mannalon tapno dida marigatan? Ania dagiti aramiden met dagiti tattao tapno dida mabiktima ti five six dagiti Bombay?

'Panko man pay sibugan ketdi dagiti mulak. Umayakto manen!




Eduardo Padaoan
12/28/2005 1:58:16 PM

Nay adda kamalin saan nga NFA. NGA = National Grains Authority.



Clifton Pascua
12/28/2005 7:10:32 PM

Pagdispensaranyon atanud Ed ken pari Fred no saanak a nakadaw-as iti nabayag ta karaget ti patagnawa dagitay pada tayo nga Ilokano ditoy!

Patagnawa wenno bayanihan kunadan sa itay iti Tagalog. Daytoy nga kannawidan ket saankon a nakita kadagidi naudi a panagaw-awidko! Panay amin a matangdananen! Ala mayat met kunak ta adda pagsapulan dagitay balliodong nga ubbing. Ti adatna ket napukaw metten tay spirit of camaraderie.

Tagaymo laeng Pari Fred.. “tarakenmo nga diplomat” kunam sa pari? Hmm.. dagita a diplomat pare ket isuda tay maysa met a nakaraman! Ammom kadi pare a “diplomat buster” ti awagda kaniak ditoy ta dua a Filipino diplomats ti pinatalsikmi gapu tay ugalida a nakaraman! Gaasem pare ket ituladna metten idiay Pilipinas, Singapore wenno Middle East ti dakes a panangtratarna kadagitay intugotna a domesticna? “Europa ditoy” kunak nga inlaaw kadagidi imbestigador a naggapu idiay Manila “-ket saan kayo a mangirugi ti pagtuladan dagiti sabali”! Pagsayaatanna pare ket pinatidak ket kaasi ni Apo ket dagidi agkabsat nga inabuso tay pada a Pilipino (a diplomat) ket addaan dan iti nasayaat a pagsapulan.

Atanud Ed, ur-urayek tay estoryam maipuon tay pinangkumpetensiam tay payb/siks tay Bombay diay ayanyo. O pare, baka “five sex dayta atanud ket mangngegnaka ni Kumare he he he!

Bawangmo dita Toronto kunam Pare! Naggasatka ketdin aya pare! Ditoy ket awan a ta ti met laeng tumultulong kadagiti kakaillian tay aramidko no kasta a weekend –mairaman ditan ti panagsuratko manipud apllication letter agingga iti surat para itay kamali a bills ni kaillian! Saan a bale pare ta pakaragsakak ti makatulong?

NGA, subsidized fertilizer ....agpayso dagita kinunam atanud. Diak kayat ti agpabasol ta basol met laeng dayta. Ti ket makunak ket agingga a rinuker dagiti turayentayo ket saanto pulos makalusot ni piman a mannalon manipud iti nakailumlumanna a pitak!

Daytoy ibagak ita ket mabalin a very selfish kunatayo ngem itangad tayo bassit ta basi ta pangpampanunotan tayo no kasano....

MICRO-FINANCING and SELF RELIANCE kakabsat!

No ni balikbayan ket usarenna tay 5 percent tay kuartana a pang-micro financena iti panagtalon with the condition nga usaren ti modern method of farming ket very feasible. Ipalagaytayon a babaen iti modern farming ket maikkat tay ‘tungro’ nga pakalugian isu a tay bagyo laengen ti problema. Crop insurance kunam sa itay atanud? Apay ketdi a saanen?
Tapno bumaba ti magastos, irugi metten nga usaren tay style dagiti Amerikano nga agtalon –compost farming! Crop rotation, bio and integrated farming met tay solution tay peste. Nakit-kitayo met siguro dita ayanyon no kasano nga agtalon dagiti Puraw! Ditoy, makitam nga agkaraiwara idiay pagtatalonan dagitay bunton ti compost!

Marketing and Storage facilities? Dayta ti maysa a dakkel a problema nangruna dagitay adu ti apitna! Mangpanunot tayo man kakabsat no ania ti remediona. Mabalin amin basta la ket saan a tay Bombay wenno Sanglay tay agbalin a middleman!

Saludsoden tayo kenni Pare Andy no kayat ni ti agpuonan iti bodega ti agricultural products idiay Ilokos.....




Eduardo Padaoan
12/29/2005 9:15:52 AM

Bumaybayag, umim-imas ti saritaan Atanud Clif ken Ka Fred. Ta ngamin sumilod met ta basin!

Sigun ti experienceko idiay away adu dagiti scheme ti nawadwad a panagapitan ngem narigat nga iyemplamar gapu ti kinakurang ti panamati. Adda dagiti mangalla-alla ken ni mannalon a kas koma 'diak-pati-diak-kita'. Maysa pay kunada 'no sao permi no aramid takki'. Ta kuna ni Apo Technician kastoy Tata ti aramiden ngem masurotanna aya ni Tata iti panangiwanwanwan laeng iti sumagmamano nga horas? Ti kunak masapul nga mapan agtalon ni Apo Technician a kaduana dagiti mannalon a no rumbeng nga agsakasaka ket aramidenna a saan ketdi a nakasapatos nga adda idiay opisina nga agmalmalem. Masapul ti role model iti maysa a community wenno saan pilot project.

Aniat' naaramidak kunayo, Atanud? Maysaak idi a maestro ngem nagtalonak. Kinaduaak ida a nagpa-soil analysis, certified seeds, ken sinurotko dagiti recommended fertilizers. Sakbay ti klase ken kalpasan ti klase addaak idiay talon. Nanangdanak dagiti diak magebgeban nga aramiden. Naparuarko met ti expected target outcomeko nga apit iti ratio nad proportion. Ratio and proportion kunak a ta tinakawda met ti sumurok siguro a sangapulo a kaban a sipokko. Ta idi agpabunagak ti ginapas ket rabiin. Ituloyonto no bigaten kinunak ket ti kabigatanna ket awan met ti dua kadisson a sipok, dua a kariton siguro. Uray kasta kinuentak amin a gastosko ket naparuarko met.

Dagitoy ti natakkuatak: Dagiti variety a pagay a parpartuatenda ket dependent a talaga iti commercial pesticides and fertilizers. ket no agusar a talaga ni mannalon ti modern farming rumang-ay ket rumang-ay met dagiti multi-nationals nga agparpartuat ti pesticides ken abono. ken adda manen tumaod a problema, umalsem ti daga. Sabali manenton ti solutionna.

Possible recommendation: dagiti koma agparpartuat ti variety ti pagay ket agparnuayda kadagiti saan nga agdepende unay ti ab-abono ken pesticide. Mabalin siguron tay kunamon atanud a compost farming, crop rotation, bio ang integrated farming.

Ania ti naaramidak pay? Babaen ta makitak a dakkel ti maipaspasahe kadagiti abono ken pestisidio, naki-consignmentak ket nagbalin nga outlet diay kalapaw ti (Pang.)AMC = Area Marketing Cooperative. Naglakoak ti abono, herbicide ken pestisidio nga awan puunak. Laway laeng. Isunan laeng ta utangenda met ket no awan laing nga agsingir, probleman! Ania pay dagiti dadduma a parikot nga ammom kunam manen? Ay adu! No sungbatak siguro sumagmamano a chapter no koma libro.

CROP ROTATION, IRRIGATION, ALTERNATIVE CROP. Adda dagiti rain feed a pagtatalonan ket adda lakay a nangisalda kaniak ti dagana ta bassit kano ti maap-apitna gapu ti nakurang a padanom, matikag. Pinamulaak ti aba. Sangapulo ket maysa a sako a bin-i. Agtaka dagiti kaarruba ta apay ngay a saan kano a pagay ti iraepko. Experimento kunak met. Less water, less pesticide, only abono and tangdan ti agdalus, agiyegges. Presto! Expenses minus sales equals twenty thousand pesos (P20,000). Kasta latta ti biag, one cropping. Alaek ngarud metten daytoy a gundaway kadagiti gagayyem sadino man ti ayanda itan a timmultulong a rinabii a nagdaldalus ti ibiahemi nga aba idiay Urdaneta.

SELF RELIANCE. Masapul ni mannalon ti para abono, etc. Agutangda! Ngem ibagak kadakuada nga isardengda laengen ti agsigarilio ta diay sigarilionda ti makatawen umanayen a puonanda iday saggabassit met la a talonda. Bawasanda ti alak singko (kada alas singkon inumen agingga ti rabrabiin) a tungtongan. Disciplina laeng ti kailangan. Maibagak didiay ta diak met agsigsigarilio. Ti panagtalon ket kasla met laeng panangopisina, masapul ti walo nga horas nga addaka idiay talon tapno ammom ti kasapulan ti mulam. No ammoda a nasayaat ti kababalinmo a mannalon agkumpiansa kenka ta OFW a kabagiam a mangfinance ti panagtalonmo.

Ne kasla metten lagip ti napalabas daytoyen. he he he! Naaduak sa manen ti nagpalawag. Agbawbaw san ta ingel ti basi! Ngem apay kunayo ngata a pimmanawak idiay away ket napanak idiay ili a nakikompetensia kadagiti Bombay? (Maituloyto)






Andy Barroga
12/29/2005 10:06:10 AM

Sumagpawak koma ngem medio nauneg toy saritaanyo. Agbasbasaak lattan kakabsat.




Clifton Pascua
12/29/2005 12:38:46 PM

You just hit a lot of sensitive things in your last post Atanud Ed! God, you are a genius! Ti pinaka-importante ti umuna a tiraek kabsat:

Kinunam Atanud: “Possible recommendation: dagiti koma agparpartuat ti variety ti pagay ket agparnuayda kadagiti saan nga agdepende unay iti ab-abono ken pesticide.”

Apay ket koma a saanen? No maaramidda iti ‘wheat’ apay ket koma a saanen iti pagay? If I remember it right, the Interantional Rice Research Institute (IRRI) is based in Los Banos! Idiay Pilipinas!

Ha! Malagip mo Atanud daydi umuna a tawen daydi ‘Green Revolution’ daydi nagawan nga Apo Marcos? Nagkurri di ketdin? Daydi laeng a tawen nga adda ti surplus production iti pagay! Ubingak pay idi atanud ngem napaglasinkon no ania ti pagduma-an daydi RCA daydi presidente D. Macapagal ken daydi Masagana 99 (first two years) daydi Apo Marcos! Those were the Golden Years of Rice Farming no diak mariro!

And mind you, we train Viets, Malaysians and other Southeast Asian nation agriculturists in Los Banos! Ngem asino ita ti agieks –eksport iti bagas! Atanud, ti bagas a kankanenyo dita Toronto, kitaem man no naggappuanna!

... produce of Malaysia, Vietnam etc. but never you will see that the technology was made in the Philippines! Ayna atanud, no ammo la koma dagiti mannalontayo nga ti kalaingan a mannalon ket Pilipino. Ti rigatna, kas nakunamon –sobra ti laing ni Pilipino! And it’s a misplaced intelligence!

Misplaced intelligence, pilosopo wenno under D’! he he he

Sige atanud ta kasla adda mang-mangegko a tawag ti panagawid! Atanud, saanmo nga ibaga nga under D toy atanud mo! he he he

Riingem ni Pari Fred ta medio nairidepnan sa ketdi!




Clifton Pascua
12/29/2005 12:52:26 PM

Hello 'Nong Andy!

Sumrek ka 'nong Andy. Gurayka ta iyalaan ka iti ungot! Ramanam met toy sinilian ni Atanud Ed nga kilawen! Ni Pari Fred ket ipadasnanto kano no kasano ti epektona tay sikreto ni Atanud ket no agbalin ket atanudekto met!

Sika ngay 'Nong Andy, uray manong kunak ket no kayatmo a ninongak iti kasarmo ket mabalin latta! he he he! Adda pay tallo a burnay ti basik dita a maipa-inum no kas pagarigan! Baka dimo ammo ket nalaingak nga 'kabisilia' tay mapan dumanon! Isiguradok nga saan unay adu ti dawaten ni 'abalayan' a sab-ong!

PS. Mabalin manong nga ikkam ti "back to the top" button toy blog tayo tapno al-alisto ti agsubli! he he he

lots of thanks 'Nong Andy!!!




Eduardo Padaoan
12/29/2005 4:21:32 PM

Naimbag ng horasyo kakabsat!

Umayak manen tumammidaw ta kakaisuna a bakasyonko ita a makadomingo.

Belated Merry Christmas and a Happy New Year, Apo Webmaster Andy. Basbasaem met gayam dagitoy reminiscence of the past. he he he. Sus! Reneviewk la ket ngarud ket adda erratana dayta naikur-it. Expenses minus from sales...(tapno agbalin a positive sign) Ken alaek daytoy a gundaway ti agyaman ... kunana pay koma.

Atanud Clif, makasidduker met ta kunamon a genius. Dagitoy ibagbagak a dadduma ket bunga laeng dagiti sirmata ken nasariwawek a panagus-usig. A no dadduma ket nalabes ket katkatawaanda. Ta naibagak pay naminsan nga no siak ti scientist dagiti koma variety ti pagay a kas ti kakired ti ledda ti parnuayek. Impossible Julie kunada met. Kunak met possible ta adda met makuna a plant mutation babaen ti panangdis-arrange dagitay plant chromosomes. Mabalin siguro nga i-transfer ti plant gene ti ledda iti pagay, vice versa, ket mabalin a makaproduce datao ti kunkunak a variety. Agbasabasaak ngamin kadagiti inar-aramid ni Luther Burbank daytay plant wizard.

he he he Misplaced intelligence, pilosopo wenno under D'. Wen sa addan sa agaw-awis nga agawid ngem dida met kayat a sangpetan. Sika ti umay ditoy kunada met. he he he. From Thiland ti kaaduan a bagasmi ditoy Toronto.

Ka Fred agriingkan! Segsegaandakan.




Fred Ilac, Jr.
12/29/2005 10:17:27 PM

nairedepak metten! adu ngamin ti dalusan idiay umaan su a nabannoganak..la man ngarud gagayyem, tay man pasarunson ti basi ket kimraang ti karabukobkon!
ilokano la ti ilokano aya ka Ed, uray siak ket no iti kalgaw, mapunno ti likud abongmi iti nateng..ta karabasa, patangkenem a nalaing samo purosen, maidur-asna ingganat' spring no kua. mailiwak ket ngarud a mapan agpuros iti sabong ti karabasa a binigat. kamote ken balangeg man ti mayat pay ta nagdarasda nga agrabanga.
nagsasayaat ket dagiti mapan-panunotyo a mabalin nga aramidenen para iti pagsayaatan lugartayo! nalak-laka koma pay ngata tay implementasion no saan a natangken ti ulo ti kaaduan, kaaduan kunak ta kasta idiay lugarmi. no madama ti eksplinasion, awan tagarida, inton nakalikudka, ipakamakamdan dita anniniwanmo: pat-patiem!
ngamin, kayatda ket makitada a dagus ti resultana.ti adda iti panunotda ket adda malak-amda a pagsayaatan iti agpatnag. ken uray pay takneng iti katataknengan nga intension, addanto latta dagitay saggaysa nga itta nga agipapan nga ti ar-aramidem ket para iti bukodmo nga interes ken pagsayaatan. masapul ti adu nga anus.
napadasanmi met ti nagpataraken iti an-animal ta nagdealerkam pay iti abono ken pesticides idiay ilimi idi, sakbay a nagtalanggutang datao..ayna, sangon-sango, takawandaka! atiddog nga estoria..amangan no mamagaan dagita basotayo no isu ti pagsasaritaan ta tar-taraken ken ab-abono.
pagay nga immasero, ka Ed..nagmayaten! tay koma ngarud kasla ampibiyan gayyem, mayat iti danum, mayat iti tikag..nasay-sayaat manen! saot nabartek kabsat!
baanyo, tatanud inton agsapulda iti darangidangan a mangga iti katengngaan ti rabii, maamuanyonto..isaganayo met ta "dark glasses" yon, kapilitan nga intay sumango ken ni apo padi...manganakkayonto, wen?
la ngarud manen...




Eduardo Padaoan
12/30/2005 9:53:23 AM

Gistay met gayam agpapada ti experienciatayo Ka Fred. Nasayaat met a maisurat tapno mabasa met dagiti dadduma ket no adda mapidutda a makairanudan nasayaat met latta.

Mapantan san dita bangir ta mangipatpatakder ni Atanud Cliff ti partido ket tulunganta. Bay-anta pay laeng dagiti saritaan ti nakainom.

Ala ket uray ania a simbaan ti pagpabuniagam ket pakaidayawan a ti manganak ti buniag. Atanud kunak ngaruden.




Clifton Pascua
12/30/2005 11:07:19 AM

He he he uray la a naipugsok tay adobo a kalding kakabsat itay basbasaek dagitoy imbagayo:

“Pagay a kas kakired ti ledda” ken “impossible Juli (eee)” ,kunam itay Atanud Ed !

“Baliktad nga interpretasionda iti natakneng a panggep” kuna met ni Pari Fred sana impasaruno tay amphibian a pagay!

Ayna Julieeee apay ketdin a saan! Di met adda wheat (trigo) a maimula iti panawen ti winter? Adda atanud, uray no ribisarem. Ditoy Europe ket usarenda nga fodder wenno pagpakanda kadagiti baka, agraman diay dawada! Ngem siempre saan a kas ledda wenno nalaing nga aglangoy he he he. Ti puntosko ket dagitay scientists tayo ket kitaenda koma amin nga anggulo ta tapno mai-adaptar a nasayaat no ania ti talaga a kasapulan dagiti mannalon tayo!

Diak masigurado ngem aginggan sa met laeng iti “conventional breeding system” ti teknikda. Baka no saanda pay a mausar ti gene manipulation ta panay met laengen nga hybrid ti kangatuan a kalidad ti bukel a mait-ited kadagiti mannalon tayo –good only for one cropping! (Who knows, there maybe some inside policticking again: RP politics plus GATT and WTO agreements, atanud ket very bad mixture) Daytay koma purebreed a kuna man ni Apongko!

Ti rigatna ket nakurang ti will power ti gobierno tayo. No adda magastosda nga agipan iti dadakkel a billboards para iti kampanya ti eleksion ket apay nga awan para iti husto a pannakaitransfer ti teknolohia ti panagtalon! Ken kitaem diay welcome arc diay iliyo kakabsat ket dakdakkel pay siguro ngem diay kalapawko! Dita ayanyo dita abrod, ti kunak ket kasla met laeng ditoy Europa nga standardized: Kadakkelan a nakitak ket 2x6 feet nga nakaisurat iti blue a metal sheet! No ngay ngata koma kasdiay met idiay Pilipinas ket mausar tay sobra a kuarta a para tay pagsayaatan ni mannalon ket mabalin nga “produce of RP” metten ti magatangtayon a bagas dita Toronto!

MAKAHAYBLAD ania Atanud Ed ken Pare Fred! Aguraykayo ta ipasagidko manen tay imbagak itay diay abongyo. Tay man panagkandidatoyo para iti 2007 RP elections! Ibagayo laeng no kayatyo met ti agpetision ta amendaranda diay Constitution tayo ta tapno mabalinyon ti mangbukel iti partylist a partidotayo nga ofw...

I have a dream, you have a dream.... why not? “Partido OFW”? Ngem kuidawka atanud no agbalimbingka! Partenganka kunak ta partenganka! Saludsodem kenni Manong Andy no ania diay styleko nga agparteng no innak agarem!

he he he....Kumonista kunam siguro pare ken atanud ngem saan. Katipunero wen, kas kadakayo. Ti rigatna ngamin ket no apay ketdi nga nag-gaget tayo ditoy abrod a patagtagabo ket intono addatayon idiay Pilipinas ket kunam la no nakabulos nga agmauyongen nga aso!

Uray siak ket Atanud met ti tawagko kenkan Atanud Fred!




Johnnyric Domingo
12/31/2005 7:52:09 PM

Gayyem Cliff, Delikaduak ditoy, nauneg unay dagitoy kapanunutanyo! Agsubliakto bareng addanto maikontribyutko aya?

Nagasat, Naimbag, Naragsak Nga Baro A Tawen Mo, Gayyem!




Clifton Pascua
1/1/2006 4:45:56 AM

Sumrekka laeng gayyem Johnnyric. Kasla naggapuka diay ice cream parlor ni Kakang Lei ania?

Saludsodem man kenni Kakang no mabalin nga aramiden nga ice cream tay 'aba' ni Atanud Ed ta padasek met ti agmula iti aba! Apay ketdi a saanen?

Iyuldagmo dita basar kabsat ta uray siak ket medio immulo tay vodka nga ininummi idi rabii ti treinta uno! Saan siguro a nairuam kakabsat.

Maymayat tay baak a basi ken tay kilawen a kalding!

Nagasat met a Baro a Tawenyo amin gagayyem.




Andy Barroga
1/3/2006 9:02:58 PM

adtoyen tay "back to the top" a kiddawmo gayyem clifton. narigat ti di agtungpal amangan no iramramannak a partengan, hehehehe.



Clifton Pascua
1/4/2006 12:24:58 AM

Thank you Manong Andy. Apagisu ta napan met pinerdin tay pusak tay mouse ko ket nasaksakit toy tammudok a pauyas a pauyasen!he he he

Saan mo pay laeng nga ik-ikkaten diay original nga Xmas songs manong ta agingga ita ket adukami pay laeng a dum-dumngeg! Uray diay trabahok ket isu ti background music ko! -imbag laeng ta dida met ma-awatan kunkunak iti bagik.

Good luck to you and iluko dot com!




Jumbert Domingo
1/28/2006 11:26:44 PM

komosta dita Belgium Clif?



Clifton Pascua
1/29/2006 2:14:03 AM

Nasayaat laeng kabsat. Adda sirsirigek nga Philippine Embassy Official a saan a nasayaat ti aramidna isu medio busy ti tao!

Umayka latta agpasiar ditoy abongtayo no masangom!

Are you by any chance related to J'ric?




Jumbert Domingo
1/29/2006 11:16:12 PM

Awn ti relasionko kenni J'ric ket saanko pay amammo a kas kenka. Immayak laeng ditoy agsapul ti liwliwa, ken mangyebkas met kadagiti obserbasyonko kadagiti padak nga agraraman. Sapay ta welcomak kadaytoy blogmo ta kayatko nga ishare wenno salaysayen ti saanko a nagustuan kadagiti padak a pinoy a nagpa Laoag idi DEc. 23,2005
Sumarungkarakto manen no adda sungbatmo. Kumusta kay amin a kakabsat nga umumay kadaytoy a umok ni apo Clif...




Clifton Pascua
1/31/2006 10:35:54 AM

JUMBERT, WELCOME TO THE BRAVE NEW WORLD OF OFW POLITICS.

Pasensiakan kabsat no saanko a nadlaw iti iserrekmo ditoy a sagumbik. Kas makitam met siguron, maikatlo ka laeng a MALALAKI a simrek ditoy a sagumbik. Pagdayawan.

Apay ngata kunam...hehehe. Ti gapuna kabsat ket awan ti sakit mo nga HEPATITIS!!!

Ania dayta hepatitis kunam?

Dagitay nakaukkor iti duyaw kabsat! Gold kabsat, Gold no agbalikbayanda ! Umapalka laeng kunam siguro! Hehehe. Mabalin kabsat ta natural iti tao ti kayatna ti rumang-ay. Ti laeng pakaiduma-an tayo ket taliawentayo ti rigat a naggapuantayo. Saan a kas dagitay kunkunak a nalipatandan ti lugar a nakayanakanda!

May-mayat kabsat tay gold wenno platinum a karton a nakalemmeng idiay pitaka ta awan adu a makakita! hehehe!

Adu koma pay ti kayat ko nga ibaga ngem bay-an ka man a mangibuksil ti kayatmo met a sawen wenno ipalawag!




Johnnyric Domingo
1/31/2006 11:51:45 PM

Hm... adda sangailim gayyem Cliff, magustuak sa dayta kayatna nga salaysayen.

Jumbert, No adda kaimudingan diay abong mi anosam koma ti sumarungkar.
Tagaano tayo kadi diay Ilocos?

Adda met padas ko diay Laoag idi 1999, nga ingana ita ket malagipko pay laeng! Nakalalaad nga aramid... - JRIC




Clifton Pascua
2/1/2006 2:12:45 AM

... ket iburaymo latta kabsat J'ric ta bareng no mapalag-ananka. Nainaw daytoy a blog a para kadagiti OFW ta tapno maala dagiti comments -positive and or negative ket maisapulan iti solusyon.... no adda!



Johnnyric Domingo
2/1/2006 8:01:50 PM

Gayyem Cliff, paunaenta man pay daytoy sangailim. Adda man met padak nga Domingo a naayat nga immay ditoy Iluko.com - JRIC



Johnnyric Domingo
2/5/2006 10:29:29 PM

Jumbert, kabsat ur-urayendaka kadaytay kayatmo met nga ipadigo ditoy abong ni gayyem Cliff - JRIC



Cliff
2/26/2006 2:26:12 AM

Ikkatek ita ti tulbekna daytoy while the Philippines is under "STATE OF EMERGENCY" ta tapno makakomentar tayo a mangusar iti pen name tayo. Idawatko laeng kakabsat a saan tayo koma narasaw and avoid personal attacks to fellow participants! Please always address to a third person or the moderator!

Pagyamanan!




Eduardo Padaoan
2/27/2010 10:44:48 AM

Uppat a tawenen ti napalabas. Kumustakayon Atanud Cliff, Atanud Fred, Apo Webmaster Andy, Ading Johnnyric ken Jumbert.




Agposte

Ag-Loginka pay nga umuna Kailian sakbay nga agposteka.