|
Buhay Kalsada
3/18/2007 6:50:22 PM
Pare ang buhay ay parang kalsadang walang hangganan
Lakad, takbo sige ka lang sa paglakbay
Minsan may makipot na eskinitang madaanan
Dapat hinay-hinay lang at baka makabanga ka
Siguro akala mo ‘yon na ang tamang babaan
Pero sa dulo, dun nag-aantay ang mas mabato
Lubak-lubak at maalikabok na kapahamakan
At sasabihin mo ngayon susuko ka na,
Malayo pa ang PARKING AREA
Pare hindi lahat ng RIGHT TURN ay tama
At ang LEFT TURN ay puro mali
Dahil may panahon din na ika’y didiretso
Upang makisabay sa hamon ng buhay
Di ito parang U-TURN na uulit ka at babalik
Para ayusin ang kamalian ng nadaanan
Pero sige lang, bilisan mo pa
Habang puno pa ang tangke
Habang di pa kinakain ng kalawang ang parte ng makina mo
at di pa pudpod ang mga gulong mo
humabol ka hangga’t naka-BERDE ang trapik layt
huminto ka rin minsan pag naka-PULA
para mag-isip at ulit humanda sa DILAW na ilaw
wag kang lang mag-init, wag kang sisingit
dahil walang siorkat ang dulo ng tagumpay.
march 17, 2006
signal village, taguig city
Comment(s):
1
| Lastupdate:
9/25/2011 7:34:36 PM
|
PAGUNIANNAKTO KADI!
2/7/2007 10:57:26 PM
Maysa a daton a daniw iti agpaypayapay a malem!
---------------------------------------------------
Pagunianakto no agkippet dagiti bulong ti katuday
Iti malem nga agpalaud dagiti kannaway
Ket maakas ti lawag iti linged ti kimleb a bantay
no akupenen ti angin ti dapo ti napuoran a garami
ken sibuganton ti arimukamok dagiti nanglaylay a barsanga
ket agukradto metten dagiti sabong ti kabatiti iti minuyongan…
Pagunianakto no diamton masirayan ti isem ti bigat
ti tumangkayag nga init manipud iti daya
tapno lukaisanna ti laladot ti agpatnag
ket no diamto payen matimud ti taraok ti darisayen
a mangririing kenka iti ngayed ti agsapa
tapno sanguem ti nakasaang a kebbakebba.
Pagunianakto no diamton maiyunnat dagita gurong
Tapno makikinnamat kadagiti agbettak a dalluyon
Ket no diamton mailasin dagiti rupa ti appokom
A kinamkamatmo agingga kadagiti tambak ti buyon
Iti pangta ti burrarawit ken laaw ti pungtot.
Pagunianakto no diamton masalidaan ti bukot ni Kalakian
Tapno inka iwayway iti agaw-awis a kapan-awan
Ti katakunaynaymo iti lamiis ken kapudutan
Tapno sukayem ti daga nga agaw-awis
Iti nabuslon nga apit.
Pagunianakto no mariknam a maudin nga angin
Ti mangsiruksirok dita barukongmo
Ket iruknoykonto ti panagyaman kenka
Iti panangpatawidmo’t agur-uray a namnama…
Wen pagunianakto koma Lilong!
September 26, 2006, © jake f. ilac, signal village, taguig city
Comment(s):
2
| Lastupdate:
3/2/2012 9:38:49 PM
|
Burburtia
8/14/2006 2:56:06 AM
Pabatukennak! Wen binaonnak ama!
“Sapulem dagiti sungbat iti puseg ti baybay”
a kas ti perlas a naibingas kadagiti nakaungap a kabibi
gamengda a maiyaon, dalusan ken pasilengen.
Pinagbukkualnak! Wen binaonnak ama!
“Sapulem ti ubbog kadagiti agringringngat a daga”
addanto danum a pumsuak iti tiempo ti igaaw
agasdanto iti tunggal pannakawaw.
Pinagkalinak! Wen binaonnak ama!
“Sapulem ti aglaplapusanan a balitok”
ti katukad ti aglatlati a landok
asaen iti pudot kadagiti tumrem a ling-et.
Sarwagam! Wen binaonnak ama!
“Tiliwem dagiti nakanganga nga ikan”
a kas ti gasat a nakasaang
gammatan no tumpaw sakbay a lumned iti langalang.
Sippawem! Wen binaonnak ama!
“Tayaem dagiti binukel ti tudo”
kas ti gundaway nga agdadarandan
ubunem, singdanan agingga a dumardarang.
Pasgedam! Wen binaonak ama!
“Gangtam ti sinulbong iti tengnga ti law-ang”
Bagnosmonto’t pannakigubal no maiyaw-awan
Dana nga inka maasakan.
Binatukko, binukkualko, kinalik, sinarwagak, sinippawko, pinasgedak
Ama tinungpalko ida
Ngem aduda latta diak pay maibaga
Ti biag gayam kasla burburtia.
©august 8, 2006, jake f. ilac, signal village, taguig city
Comment(s):
78
| Lastupdate:
2/16/2007 6:23:28 PM
|
Kulding Ni lagip
7/31/2006 7:02:59 PM
kasla agal-alalangugan pay laeng ti lagip
a naibalkot kadagiti dalluyon a sumagpat ti kadaratan
iti daydi umok a pinanawan dagiti puyaw,
kumanalbuong latta dagiti pinarnuayda a garakgak
nga inyed ti dolyar iti biag dagiti walang a puta
ken dagiti agbirbirok iti narabraber a pagaraban,
ipaspasay-op latta ti angin ti ayamuom dagiti mansanas
ti binilid dagiti kahel a maiwarsi kadagiti agtubtubog a ngiwat
ta kasla man daytoy daydi maikadua a ciudad dagiti agongan
a pangisaknapanda ti agnanayon a langit?
a kas pangkurkor, kurwayanda iti rignas ti rikna dagiti atap
appananda ti imatang iti tedtedda ken agkuskusapo a garet
iti banglo ti isteitsayd, ulawen ken baliknogenda ti gasat,
ta makaallilaw latta ti sabeng dagiti awitda, adu latta ti kummitab iti sima
isuda a kiniwar ti alingaget, isuda nga abalballay,
(dagiti munmunieka a kwinerdasan iti palacio)
ta kasla agpagpaggaak latta dagiti umappingaw a ladawan
ti panangtenggel iti aangsan ti wayawaya nga impabulodda
manipud panangsibbarutda iti ima dagiti sakang iti Adayo a Daya
ken pinanggatangda kadagiti mestiso iti Europa,
kumanabsiit latta ket umaradasto latta ti anniniwanda
iti parbangon a mailibay ni lagip ket agsublidanto (ket nagsublida?)
a kas naamo a karnero, iti sabali a maskara,
ta agal-allia latta daydi imbatida a lunod
dagiti agnunnonog a kinaulbod
ti kunkunada a kinamanaggayyem ti Dua
wen agrunrunoten dagidi a lagip
ngem kumulding latta ti buya.
July 17, 2006
Signal Village, Taguig City
Comment(s):
0
| Lastupdate:
|
Bannog
7/21/2006 6:28:31 PM
mabannogan met ti panunot
ngem ti pusok nga agpitik
a mangaw-awag ti naganmo
ket dinto mautoyan a mangikot
ta sika ti segged ti darak
a mangpaburek ti bimmaaw nga ayat
wen mabannogan met ti panunot
a kas ti makina a maibusan ti gasolina
ngem kasano koma nga agngudo ti essem
no ti rupam ti maiballabalaet kadagiti darepdep
a mangduaduaya kadagiti rabii a nasalemsem
mabannogan met ti panunot
a kas iti agpakada a malem
a mangidatag ti sipnget
ngem apay koma a kabutengko ti kawaw a rabii
no sika ti bagnos nga umis-isem
a mangitunda kaniak dita sadiam
wen mabannogan met ti panunot
ngem diakto mauma nga agbannog
no sika ti gapuna
ta im-imasek pay ti agpaypayapay a kumpay ni patay
ngem tay lipatenka ket mapukawka ditoy sibay.
Comment(s):
7
| Lastupdate:
8/7/2006 7:52:19 PM
|
|