iluko.com - website a magustoan a pagpalpallailangan dagiti pada a nangisit ti sikona.

Parmata

 

Skip Navigation LinksHome > Blogs >


 Mighty Castillo Rasing

 Entries:
1
 Comments: 3

iCom Page
ArchivesDateStamp
Tudo10/3/2010 7:59:26 PM






 Tudo
10/3/2010 7:59:26 PM

Dimsaagak manipud iti abay ti drayber

Ti dyipni ket intinnag ti ulep ti tudo a kasla

Adda panagkitakitda. Dinardarasko ti nagna

Idinto a lislisiak dagiti bukel ti tudo a matmatnag.



Iti kaawan payongko, naglemmengak iti sirok

Ti nangisit a samrak. Kasla sangaribu nga arimpadek

Ti panagtinnag ti tudo ti abbongko a dimmagsenen.

Nagturongak iti sirok ti flyover ti EDSA-Quezon Avenue.



Binallasiwko ti highway— diak pulos marigatan

Iti kalgaw man wenno panagtutudo— ket agmaymaysaak.

Iti dalan dagiti bumallasiw, ingatok la ti makanigid nga imak

Ket agsardeng dagiti kotse ken dyipni

Agingga a madanonko ti bangir ti kalsada.



Iti kinaawan ti payongko, nakikaduaak iti ummong

Dagiti tattao nga agdardaras a mapan iti pagtrabahuanda

Iti daytoy a bigat ti Lunes. Immuliak iti escalator

Ti Quezon Avenue MRT Station ket napukawak

Iti tengnga ti adu a tattao.



Iti uneg ti tren, nakatakderak ket nabara ti riknak

Iti danggay dagiti tattao a diak am-ammo.

Iggem ti makanawan nga imak ti nabasa a samrak

Ket ti makanigid nakakapet iti landok

A pagkapetan tapno diak matuang…



Malagipko ti panagkapetmo iti sikok

Idi magmagnata a dua nga iggemko

Ti payongmo iti tengnga ti napigsa a tudo

Iti maysa a malem ti Lunes ti Hunio

Dua a tawenen ti napalabas idi addata pay

Iti Unibersidad.



Ita, awankan iti daytoy pinagmaga-ti-init, binasa-ti-tudo a pagilian.

Dita ballasiw-taaw, nalabit

Makikitamon ti in-inut a pannakatungpal dagiti arapaapmo. Ket siak

Ditoy uneg ti tren ita a matutudo a bigat ti Hunio, malaglagipko



Ti babai nga adda payongna iti tengnga ti tudo ti Hunio.



Sapsapliten ti tudo dagiti tawa ti tren,

Nupa nalam-ek ita, nabara ti riknak

Iti danggay dagiti tattao a diak am-ammo.


Comment(s): 3  | Lastupdate: 10/4/2010 7:28:58 PM