iluko.com - website a magustoan a pagpalpallailangan dagiti pada a nangisit ti sikona.

Dulang ni derick thor

 

Skip Navigation LinksHome > Blogs >


 Derick Marcel Fillomena Yabes

 Entries:
8
 Comments: 11

iCom Page
ArchivesDateStamp
Ti Manokko: Daniw a Para Ubbing11/19/2011 5:47:41 PM
Sakanto la Manen Agpakita iti Mayo11/19/2011 5:37:46 PM
Ay, Agsalata man, Baket11/19/2011 5:08:57 PM
Dalan nga Agpa-Tuguegarao 11/19/2011 3:04:07 AM
Timel iti Barukong 11/19/2011 2:55:49 AM
Ad'toyak Sanguanam 11/19/2011 2:35:59 AM
DITOY PUSOK AGAYAMUOMKA9/16/2011 2:11:36 AM
DULANG NI DERICK THOR9/16/2011 12:04:57 AM






 Ti Manokko: Daniw a Para Ubbing
11/19/2011 5:47:41 PM





*****imbagkatko manipud iti blog-ko a DULANG iti URL nga http://derickthor.blogspot.com/




PADASENTAYO MAN MET TI AGIBASA ITI DANIW, GAGAYYEM:





TI MANOKKO


Adda manokko a puraw

Ginalutak iti rutrot

Inggalutko 'diay sirok

Pallot a pallot!







Kastoy met iti panangidaniw ti maysa nga ubing:


TI MANUKKO

Adda manukko a puyaw

Ginayutak ti yutyut

Inggayutko 'diay siyuk

Payyut a payyut!






(ita, padasenyo man met nga ibasa iti napigsa aglalo 'ta maikadua... hehe!)


Comment(s): 0  | Lastupdate:



 Sakanto la Manen Agpakita iti Mayo
11/19/2011 5:37:46 PM





Malagipmo pay kadi daydi naudi?
Inay-ayonak kadayta banglom
Dimmanonka ket indiayaannak
Iti kappuros a sabsabong
Binussognak kadagiti agkakaimas a sapatam
Binarteknak iti kasla diro nga isemmo
Pinarmekmo amin a panagduaduak
A nangkullaap iti amin-amin kaniak…

Dinak ininggaan
Agingga nga intalekko kenka ti masakbayak
Nasangal dagiti babassit nga arapaap
Ta pinampandagak ti karim a salaknibannak
Ken yaonnak iti nakailumlomak a rigat
Ngem kasla asuk a nagpukawka
Maysaka met gayam a bulbullagaw
A sa la agbisti maminsan iti tunggal tallo a Mayo…

Ket ita, agpadlawka manen
Apoka nga apo iti arsadanan ti agdan
Kayatmo a luktak ti ruangan, paulienka
Tapno baliwannak a digaan
Ngem iti likudan dayta maskaram, ammok
Umaynak laeng ulawen a kasla birabid
Inton magun-odmo manen ti tung-edko
Sakanto la manen agpakita iti Mayo.




(naipablaak iti Bannawag idi Mayo 10, 2010)


Comment(s): 0  | Lastupdate:



 Ay, Agsalata man, Baket
11/19/2011 5:08:57 PM







Ay, agsalata man, Baket

Sublianta imnas ni karayo

Watwatenta langenlangen a kimbet...


Wagwagem a nalaing kimmuribot a siket

Bareng matnag nagapon dita buy-ongmo

Ay, agsalata man, Baket!


Bay-am nga agarubos apgad ti ling-et

Bareng umimas naalsem nga angotmo

Watwatenta langenlangen a kimbet...


Iling-i-ling-im, umisemka iti nakilnet

Bareng lumtaw 'tay limned a timidmo

Ay, agsalata man, Baket!


Ikuyegyegmo 'ta kutit a nakset

Bareng maregreg 'ta an-anek-ekmo

Watwatenta langenlangen a kimbet...


Umaykan, iwallagesta parikut a dimket

Kumpasanta ‘toy Dungdunguenkanto, Biagko

Ay, agsalata man, Baket

Watwatenta langenlangen a kimbet!






(naipablaak iti Bannawag)


Comment(s): 0  | Lastupdate:



 Dalan nga Agpa-Tuguegarao
11/19/2011 3:04:07 AM




http://derickthor.blogspot.com/
http://mabisinak.blogspot.com/






Agbuttuan ti kutit nga agbibitin iti pingir-pagtugawan
anusan ti agtallo-oras a panagpipinnadigo’t angot
ta nakarkaro pay ngem lata ti sardinas ti mapayapayan
aglalo ‘tay napangina uray simmammisammit’ plakana
ari-ari iti kalsada, basura laeng met idiay naggapuanna…

Mabuak dagiti matmaturog a kabalio iti barukong
no aglangsot ti siliniador ti agteteks a drayber
makiin-innuna nga agpidut iti dalan a dandani sakupen
ti agsumbangir a bilag— bubuoten
nayaplag a ngipen ti mais; lumitlitem tinukel ken presiot’ irik…

Kasla kuton dagiti lugan nga agiinnuray iti batang:
makapaaliaw ti panagpakaasi ti ranitrit ti duduogan a rangtay
a pinaglulok ti lati ngem padpadasen nga ay-aywen ti dilpat
maris-dapo a pinta ngem di mailemmeng ti gapuanan
masirib nga alimatek a nangsusop iti pigsana …

Nupay masulek latta ti mata kadagiti malabsan nga agpingpinggit
iti linong-pagurayan a pagdadanonan pay dagiti nakaiggem papelito,
umisem met ti agong iti naimas nga awis ti matuntuno a tupig
iti nagkikibin a paglakuan a mangtantannawag iti makurkurob
Karayan-Dakkel a nagpanawanen dagiti unnok, bennek ken ludong…

Maabbatan ti balon a pasensia iti agsisipol a pila
numona ta aglulumba pay a sumingit reprep nga scooter
kadagiti naynay a mabukual ken mapabaro a kalsada--
kamaudiananna, iti ungto ti makautoy a biahe, sabtendak
dagiti inglisero a traysikel drayber iti nailet, napudot a siudad.




(Nai-Bannawag, Oktubre 3, 2011)



Comment(s): 0  | Lastupdate:



 Timel iti Barukong
11/19/2011 2:55:49 AM






Nagungar manen ti timel iti barukong iti yiisemmo iti Facebook profile-mo. Diak naaluadan ti kellaat a panagsingir ti lagip iti panangmingmingko kadayta rumimrimat a matam.

Transferee-ak idi iti eskuelaan a nagsadag iti pingping ti karayan nga asideg bassit iti sabangan. Malaglagipko latta ti naulimek a panagayus ti karayan ken ti agintutured a luak a nagtukel laeng iti mumukatak idi lig-isek ti timel a nabayag a nagay-ayam, nangkinkinnit, ken nagtaeng iti managinkukuna a pusok.

Agingga ita, ikalkalintegak a gapu iti kinakurapay isu a natukkol 'toy dilak idi saludsodem no agpayso met laeng a crush-ka. Nagsansanudak agingga a naikornernak iti asideg ti Principal's Office ket indobladam ti saludsodmo a naglulokan dagitoy tumeng ken pakinakemko.

Ikalkalintegak latta a gapu ngata iti kinaubing ti pusok wenno ti panunotko isu a limnek ti lelennekak, natilmonko dagiti balikas a nabayag a nagur-uray a riendaak iti murdong ti dilak. Nagintutulengak. Kaslaak la modelo ti toothpaste a todo ngiit. Kampay saan a timmakder dagiti dutdot ken dadduma pay a tumakder a nakangngeg iti kasla musika nga agtaud dita kasla makopa a bibigmo. Uray no kasla itaytayoknak ti ayamuom ti nainlangitan a sang-awmo, kampay awan bibiangko. Kampay saan a nagrikab ti barukongko iti nalamuyot nga iduduklos ti mangtuktukod, kasla naingel a tsokolate a matam a diak madaeran. Saanak a nagpasulek iti kinatundiris ti cute nga agongmo ken ti makaalino, immalimuken a barukong ken immakut-akot a siket nga ilemlemmeng ti napudaw a t-shirt-mo.

Ay, diakon kayat a sublianan ti kasla dissuor a buokmo a mangpaypayay idi iti panagteppelko tunggal surotek dagiti sumilsilap a linabag nga agtungpal iti nabaknang a likudam!

Ikalkalintegak latta a saanta nga agkabagay. Langitka idinto siak ket uging. Ngem pinalkaannak ti kinapudno a diak a kabaelan a takderan dagiti insawsawang ti utekko a plano. Ket idi nakasaganaakon a sumungbat, inayabannaka ti kaklaseta ket nasiputak ti panangsiketna kenka...


"Thanx 4 d add, m8! Mzta k n?"

--Derick Thor


Comment(s): 0  | Lastupdate: