|
Adda patingga ti amin
6/29/2009 9:21:00 PM
Idi apagturposko iti elementarya, adda naminsan a malem a naggapukam ken Tatang iti kataltalonanmi iti dati a pagnanaedanmi a barangay (Luzon, Claveria, Cagayan)a masarakan iti bakras wenno puon ti nakapinpintas a bantay a nagnagananmi iti Bantay Kimmallugong (ta kasla kallugong ngamin ti sukogna no matmatam a nalaing) idi naiyesngawko nga insennaay, "Nagpintas ti tiempo ita nga aldaw, ngem dumteng met lattat' ilelennek ti init ket iyegna lattat' rabii..".
Pagarupek a madi naindengan ni Tatang ti inyesngawko ta saan met a dagus a simmungbat, ngem idi agangay ket kinunana, "kasta a talaga anakko, adda pagpatinggaan ti amin. Kas iti maysa a tao adda panungpalanna, isu a kasapulan a nakasagana tay' latta a kanayun a matay ta ditay' ammo no kaanu a pasublien ni Apo ti biag nga inpabulodna kadatayo.." Diak a nakasungbat iti kinuna ni Tatang ngem isu ketdit' nangrugian ti nauneg a panagpanunotko nga uray ita ta addaannakon ti umno a panunot ket panpanunotek pay laeng.
Adda met kinaagpaysona dayta a sao ni Tatang ta idi agtawenakon iti disinuebe, nagayatak iti maysa a dayag a nakaklasek iti kolehiyo ket kaasin Apo ket inawatna met ti ayatko kalpasan ti naunday a panaguray. Tumuknot' langit ti panagayatko kadaytoy a lasbang ket pagarupek nga agnanayunen dayta nga ayat iti nagbaetanmi, ngem kas iti kinuna ni Tatang ket nagpatingga met laeng ket nagsina ti dalanmi. Permit' sakit ti nakemko ngem pinilitko nga inawat ta kasta siguro a talaga ti biag ta naikari a saankayo a para iti maysa ken maysa.
Naglabas ti aldaw ket naipalapalak iti amianan a disso. Naadaywak dagiti naaasideg kaniak ket kaslaak la piman a nayaw-awan a karnero. Ngem kaasin Apo adda nakayasidegak nga inbilangko a nasursurok pay ngem kabsat ngem iti maysa a pasamak ket nagsina manen ti dalanmi ket siak ti inadaywanna.
Puro a sennaay ti agaon kaniak ta pinadasko a tarimaanen daytoy a panagpapagayam ngem piman ta banagko ti napaay ta mismo nga isunan ti nangibaga kaniak a dinan maaramid ti makipagayam pay kaniak gaput' kaawan nga inaramidko iti pannakaikkat iti pwesto ti maysa met laeng nga inbilangmi a kabsat.
Puonay la ket ti gasgasaten kinunkunak lattan ta adda latta met pakabasolam iti kaawan nga ar-aramidem. Konsuelok lattan ti bagik ti panangisensennaayko nga awan met ti ammok a basolko.
Ala kasta a talaga ngata ti BIAG a kas ti kunan Tatang, nga adda pagpatinggaan ti amin.
Comment(s):
0
| Lastupdate:
|
Awisenkayo
3/17/2007 1:29:16 PM
Nu siasinuman Apo ti mairana nga dumap-aw ditoy nga umok ket awisenkayo nga mangibatikay kad met ti tugot nga mangibagbaga nga immay kayo simmarungkar iti daytoy nanumo unay nga umok.
Allungogan ti Puso ti Lawin ti paulo daytoy nga umok ta adu dagiti banag a kayatko nga ipeksa babaen iti panakipagbiag iti lubong ni literatura.
Addada metten dagiti nangpadpadasan a naiyuritkon ngem ad-adu pay dagiti diak pay naipeksa.
Gapu ti kinangato ti aer-arapaapko ket inusarko ti LAWIN a nagan.(Ti LAWIN ket maysa a kita ti tumatayab a nangato ti tayabna ken addaan iti naidumduma a pigsa a pagbutbutngan dagiti babbabassit nga animal. Ti LAWIN ket isu met laeng ti kuna tayo nga AGILA a namunganay iti Sao-Latina AQUILA nga ti kayatna a sawen ket "NABALITOKAN". Iti met Ancient-Egypt ken Babel ti LAWIN ket simbolo ti INIT iti tengnga iti ALDAW a kayatna nga ipasimudaag ti ESPIRITU SANTO.)
Ngem iti laksid dayta a lawin ket adu dagiti banag a kayatko nga ipeksa ngem nagtalinaed a arapaap laeng, isu ti nangguyugoy kaniak a putaren daytoy nga umok ta barbareng isu ti tulbek ti pagtalinaayan ti rikna.
Awisenkayo man ngarud gagayyem ken kakabsat ta bareng maaddaannak met ti pagayam a kas kadakayo ket sapay ta agbalin kayo nga instrumento tapno dagitoy nga allungogan iti barukongko ket innak maipeksa.
Agyamanak unay.
Comment(s):
7
| Lastupdate:
4/25/2007 1:39:16 AM
|
|