iluko.com - website a magustoan a pagpalpallailangan dagiti pada a nangisit ti sikona.

Balitok nga aldaw

 

Skip Navigation LinksHome > Blogs >


 Johnnyric Domingo

 Entries:
28
 Comments: 4933

iCom Page
ArchivesDateStamp
Lagip Ti Paskua12/25/2013 5:34:28 PM
Dagidi aldaw a di agkupas_1912/25/2010 6:50:17 PM
Dagidi aldaw a di agkupas_eighteen.12/24/2008 2:47:53 PM
Dagidi aldaw a di agkupas_eighteen.22/24/2008 2:44:29 PM
Dagidi aldaw a di agkupas_seventeen.112/4/2007 6:06:30 PM
Dagidi aldaw a di agkupas_seventeen.212/4/2007 6:05:16 PM
Dagidi aldaw a di agkupas_sixteen.15/27/2007 11:48:49 AM
Dagidi aldaw a di agkupas_sixteen.25/27/2007 11:44:54 AM
Dagidi aldaw a di agkupas_fifteen1/1/2007 6:04:53 PM
Dagidi aldaw a di agkupas_fourteen.112/23/2006 6:12:44 PM
Dagidi aldaw a di agkupas_fourteen.212/23/2006 6:12:12 PM
Dagidi aldaw a di agkupas_thirteen12/16/2006 3:46:39 PM
Dagidi aldaw a di agkupas_twelve.110/7/2006 4:59:59 PM
Dagidi aldaw a di agkupas_twelve.210/7/2006 4:59:37 PM
Dagidi aldaw a di agkupas_eleven7/15/2006 3:41:13 AM
Dagidi aldaw a di agkupas_ten6/5/2006 3:15:46 AM
Dagidi aldaw a di agkupas_nine3/26/2006 4:33:22 PM
Virtual Life...Virtual World. Real Life? Please Put It Aside...3/4/2006 6:50:58 PM
Dagidi aldaw a di agkupas_eight1/26/2006 9:06:24 PM
Dagidi aldaw a di agkupas_seven12/31/2005 5:07:58 PM
Malaglagipko Laeng!12/17/2005 2:37:07 AM
Dagidi aldaw a di agkupas_six12/11/2005 2:26:34 AM
Halo-Halo Bumbaan Express11/26/2005 11:16:12 PM
Dagidi aldaw a di agkupas_five11/12/2005 11:36:25 PM
Dagidi aldaw a di agkupas_four11/12/2005 12:49:57 PM
Dagidi aldaw a di agkupas_three11/11/2005 10:46:28 PM
Dagidi aldaw a di agkupas_two11/3/2005 10:59:43 PM
Dagidi aldaw a di agkupas_one10/30/2005 2:32:05 PM






 Lagip Ti Paskua
12/25/2013 5:34:28 PM

Agsublisubli latta daydi nga imas
Iti panunot ikarayona latta di agpabatubat
Daytanto ket ngatan ta di agmawmaw

Idi, daw-as-daw-asen a bakasionan
Itan, di metten masarungkaran
Ti bulan ti December-
Ingganat’ dinan malasudan

Daydi a kinalibnus napalabas
Agayuyang manen ti iliw a napenpen
Iti kaunggan, gutigutenna a yaon
Sudi di naisangsangayan a panawen

Kuna idi ni nanang
Kadaydi nakaadayon a paskua:
Jeric, sapaemto't agriing no bigat, a?
Saan a mapan agtaraytaray
Runway dita airport (Laoag)

Punasamto dagiti bulong ti saba
A laneten ni manongmo Elmer
Iti karaang nga ar-aramiden
Ni manongmo a Fermin

Sikantot’ kadduak nga agbungon
Iti bella-ay a lebbekekton parbangon
A gamayekto’t tagapulot

Hapo aya!
Namak payen a gasgasatko
Aganninaw la ket ngarud
Dagidi December
A panangdildilakutkot’ sangapalanggana a nagamay

Ta ti katay di met ngamin mapengdan
Nga a garuyot ditoy barukong
A tandat’ imas bella-ay ti diket a bagas
A magamay iti tagapulot a naparayapay

Apo Hesus, lagipendaka manen kadaydi yaaymo
Kadakami nga aliwegweg nga ubbing
Bengngeg ken narigat nga an-anawaen

Ipaayyo koma iti karadkad salun-atmi a padapada
A mangsarabo kadakayo ita a paskua

Ken Apo Hesus, promise-ko manen
Imak ita saanen a matipaw
Pati ramay a masalamaan a mangdilakut iti nagamay

Ta ti katayko dinto matubeng
Agaruyotto latta iti adda iti palanggana

Ngem anyan
Ta ti nalanet a bulong sapo-sapo iti nagamay
Anattan Apo? Diak sa met latta maramanan
Im-imasek ayamuomna a bella-ay

Jeric, anako, dika a, nga agmulengleng
Diay karaang bumegbeggangen
Damdama da manongmo agkamtuden
Lutuenda a nabungonen

Ala, anakko, alisto ti kuti
Innak biit uneg balay
Da adingmo masumokda manen agsinnutil

“Nalpas! riniritda metten dagitay bulong,”
Kissiim ni manongko Elmer Iti likud nga abagatan ti sarusar
“HaHaHa! Dimo bay-an ta addanto manen maaripuyot no Enero,”
Ni manongko Fermin iti katawa ken paarasaas
Iti nagkatugawanda a pungdol
Iti sakaanan ti karaang

Agur-urayen diay paglutuan, kunak itay anakko
Ita adda met pay dua appo-po
A di met pay nabongon

Ney, apayen annakko, a naggaakikid ririt dagitoy bulong?

Ow, nanang, napigis la ketdi itay laneten da manong
Alisto-alistoda ngamin…. igan-ganatda ketdin
Ita, pangngaldaw met pay laeng

Marabettak isem ti inami
Iti rupa, saanen a maanninawan
Apagapaman itay a pannakaupay

-Iti isasalawatko
a di met mapaspasungbatan

-Ti gunayko
a naibugas kadagiti balikasko

-Ti di mapengpengdan
a katayko iti ayamuom ti nagamay

-Ti ina iti anak nasukainan
Ti palimed
Iti panagayatko unay iti nagamay a bellaay


Naimbag a Paskua-yo!


Comment(s): 0  | Lastupdate:



 Dagidi aldaw a di agkupas_19
12/25/2010 6:50:17 PM

(Nanumo a linia a panglagipko iti kinatiwengmi ken Atanud Larry Salvador. Agatanudkamin manipud pay idi walo ti tawenmi.)

I
Kastoy idi ti apiras ti pul-oy, Atanud
Idi getgetam iti kumpay nga isalugan ti alunan
A nakatakder iti limbang inunasan
Siak espiam. Ayatmo laeng a di matiliwan
Di lakay Dingo nga adenoid ken sul-ot
Dagiti matana saan unayen makaarikap
Iti ayan ti rippiis iti kasamekan

Kunam iti arasaas: “dumawatkami laeng nga inaldaw, lilong…”
Kunak iti paarasaas: “Lilong, dumawatkami nga inaldaw,
Inggat maibus alunan, dikay' koma agung-unget…”

II
Kastoy idi ti apiras ti pul-oy, Atanud
Iti sumuno a tawen
A di buloy taga Tondo
Agpilit gumatang aso di apong Ipa
Nga apostulada a nalaing aglualo Ave Maria
Nga aswa di apong Dingo;
Di ilako di apong ti maymaysa a bugbugtong
Sa pay la madungdungngo…
Ngem nasukir a makagutigot ugali taga-Manila
Nauyotanda nga inam-amluyan ti aso

Kunada iti ayug napakuyogan ayat: “Merry Christmas, Whitey!
Agtalnaka, ha? Ikkatenmi angpas ken timelmo.”
Kunam met a kumaykayakay ken kumudkudilmat:
“’Da ‘ya angpasna. ‘Pipia man pay a dakayo 'da angpasna!”
Kunak met iti panunot:
'Madi tigtignay dagitoy bisita a di am-ammo.'

Idin ta sardengandan nga amluyan ken ar-arakupen
Di aso nadalusun metten a napugsatan anges
Iti sakaanan dagiti taga-Tondo
A gumalisgalis tao-taoda iti mumukatanda
Kinamat ida ni apong Dingo
Iti samurai nga inggapuna’t Hawaii!

III
Kastoy idi ti apiras ti pul-oy, Atanud
Iti simmaruno pay a tawen
A di agmamanok a banias iti minuyongan da apong Ipa
Iti pinuon agdandaniw iti nakaparsuan a bayog
Bigbigat naalukoynan nasukisok ubing pay a panunot-
Nagargarina laingmo nga agpanday papel de banko

Kunam: “Siputam! Siputam dita karekrekan! Kuarta daydiayen, ‘Tanud!”
Kunak: “Saan a kuarta ta banias nga agmamanok!
Agimukatka man dita pilaw ala, Atanud.”

Ngem hustoka Atanud
Ta ni uncle Orlin magusgustoanna kanot’ adobo a banias
Uray ipatengtengmot’ ngina ti lakom.

Iti apagbiit a pinnapilit naipakaten silo a barut
A balaybayan ti linabaan ni nanangmo
A sinapsapulna a pagibalaybayan!

Iti leppas pangngaldaw
Natiag imas estoriaanta ti paarayat a pukkaw ni apong Dingo:
“Larry! Larry, Kinnam....! Ruk-atannak!
Makaruk-atak lang, sutsutankat’ agkabkabiteg!”

Tinalawatawanta pinuon dagiti bayog
Kunam ken kunak: "Ni Apong, a bitin ti barut!
Iti baur dua a lawi ti bayog!
Akingngato sakana!

Butbuteng ken kigtot- pang-FAMAS Award
Agpatpatulong a linlinniam ken ni tatangmo
Nga isun ti mapan mangruk-at
Karrubayo marigatan unayen nga agkaykayaw-at!

Wen, Atanud, ipalagip nalamiis nga apiras pul-oy dagidi naglunlunnoyanta't lang-ay a napalabas.


Comment(s): 0  | Lastupdate:



 Dagidi aldaw a di agkupas_eighteen.1
2/24/2008 2:47:53 PM

Febrero 25, 1977

Aldaw ti Biernes. Agngalayen ti bulan ti Febrero ngem makakakursing pay laeng ti lamiis ti pamigsaen nga angin nga agpabagatan. Kalkalpasmi laeng a nangaldaw kadagiti kaeskuelaanmi iti high school itay libasanmi ida ken Herman Juan a kasingedan a gayyemko iti pagad-adalanmi nga eskuela. Sinurotmi ti agpalaud a sidewalk nga amianan nga igid ti Rizal Street a sango ti Ilocos Norte Capitol, simrekkami iti nalawa nga arruangan ti Capitol itay mabatuganmi, ket intuloymi ti nagpalaud iti uneg ti inaladan a likudan ti nalawa nga stage agingga a nakadanon kami kadagiti pagtutugawan iti sirok dagiti akasia.

Kas met laeng iti daya ti opisial a pasdek ti probinsia a makaay-ayo ti pannaka landscape ti sirok dagiti kayo agingga iti laud ken abagatan a sidiran ti pasdek, mayat ti pannakkaiyasmang ti maris berde a lawn iti maris kiaw-nalabbaga a diak mainagannan a napipintas a mula, ti laeng dumada ditoy bandana iti laud ket adda sumagmamano a kalkalainganna iti kalawa a fishpond nga aginggat’ barukong ti kaadalem ti danum a kargana. Adda saggaysa a tilapia a makilauklauk kadagiti napipintas-nadumaduma ti kitana nga ikan nga agpaay a mangpangayed ti ruar ti pasdek.

Nagsublikami met laeng iti tugaw a nangiparabawanmi kadagiti knapsackmi kalpasan a natan-awanmi dagiti ikan. Bayat ti panangsaklot ni Herman ti knapsackna- ta iyaunna ti masapsapulmi nga agbanniit, wina-nawanak ti aglawlaw, napnekak itay diak matalawatawan tay lakay a janitor ti capitol nga inggat’ ungetna. Iti pangadaywen iti ayanmi, mayat ti arabna ti ugsa a nagsanga-sanga ti sarana a pataraken ni Governor iti lakay. Adda ugali ti ugsa nga agsangdo kadagiti lumabas a pakagaw-atan ti agtallopulo ngata a kadapan a waywayna.

Naraboy ti isem ni Herman a nangyawat kaniak ti nagarugad-napunas ti simana a banniit nga addaan iti sangadangan a linas, a, ti maysa a pungto ti linas ket naigalut iti kas ngata iti kalukmeg ti tangan-saka, ken agtallo-pulgada ti kaatiddugna nga styrofoam nga agpaay a patapaw ti banniit. Pinunasmi ti sima ti banniit tapno alisto nga ikkatenmi iti mabanniitan nga ikan. Naraboy ti isem ti gayyemko ta mangnamnama manen nga atiwennak iti pinnalumbaan ti ikan a mabanniitan iti uneg ti fishpond. Inatiwnak ngamin idi kalman iti score a 3 – 1.

Inlibasko nga inpamurdong iti patapaw ti nakaigalutan ti linas, ta mamatiak ngamin a nalaklaka nga itaray ti ikan ti patapaw no iti murdongna ti pakaigalutan ti linas; saan ket nga iti katengaanna. Kinautko ti plastic a pagbalunak iti uneg ti knapsackko, linukatak ti pagbalunak ket nagayamuom ti kaay-ayok nga angot-naprito a saba a pinangaldawko. Piniritko ti inparantak nga inbati a sangkabassit nga inapuy, ket inapanak ti banniit. Tay natangken a parte ti bread ti inyapan ni Herman iti baniitna.

(adda tuloyna iti baba) --->>>



Comment(s): 159  | Lastupdate: 3/25/2011 11:30:12 PM



 Dagidi aldaw a di agkupas_eighteen.2
2/24/2008 2:44:29 PM

--->>>(tuloy ti adda iti ngato)

Inparintumengmi ti nagabay nga aggayyem iti ngarab ti diding ti fishpond. Naggidankami a nagbilang, “One… Two… Ready, Set! Goooo!” ket inpatapawmi dagiti banniit.

Ket sinikbab dagiti kasla mabisbisinan nga ikan dagiti naapanan a banniit, ket naray-awkami iti pardasda a mangilangoy ti patapaw a manglikmot ti diding ti fishpond.

3- 2 ti score, siak ti abante. Naupalen dagiti tilapia, ket nagsardengdan a manglikmot ti diding ti fishpond.

Rinugiak ti mangkantiaw ti gayyemko. Timmakderak ket insalak ti nagkumintang, a kas tay sala dagiti babbaket idi fiesta ti Laoag, sako pinasarunnuan iti in-iniin a kas tay sala ni Manong Eddie a kabsat ni Atanud Larry a karrubami no agsalada ken ti girlfriendna iti nagnagananda iti Apple Dance.

Ginaw-at ti masursuron a gayyemko ti sanga ti akasia iti abayna ket pinisawna ti asideg ti nabanniitanna a tilapia ket napakigtutan ti ikan ket sipapardas a nanglikmot ti fispond, pinisawna manen ti danum itay makabatug ti ikan iti ayanmi ket nakaramid pay ti maysa a likmot ti ikan iti uneg ti pagpupukan.

"5 – 3 ti score’n, Maatiwak manen? Saan metten ah!” inagawko ti pagbabautna a sanga ti akasia ket inplastarko nga ipisaw iti abay ti nabanniitak nga ikan ngem addaytan ti ugsa a mangsangdo ken Herman, gapu iti pananglisina iti ugsa, saan a natimbeng ti gayyemko ti bagina- kimmapet kaniak ket nanabsuok kami a dua iti nalamiis a danum ti fishpond. Apo aya, ti lamiisnan! ken langsinan ti danum!

Timakdangkami iti bangir ti fishpond a saan a magaw-at ti ugsa.
Agsulsol-oy kami gapu iti lamiis.

Madamdama addan ti naunget a lakay a janitor. Nakayamanak ta saan a makaunget ti langana. Pinadigusnakami iti danum nga aggapu iti garden hose. Naanus gayam ti lakay nga ipagarupmi a naunget.

Ti lakay ti nakaammon a nangruk-at kadagiti nabanniitanmi. Kuna ti lakay a no agaramidkaminto pay ditoy iti kalukuan ket idiay to kano opisina ti gobernador’en nga ipatuludnakami.

Naimbag ta aldaw ti PE mi ita, ket adda dagiti PE uniform mi a pagsukatanmi. Inbilagmi iti lawn a laud ti Capitol dagiti nabasa nga arwatenmi ngem saanmi a nauray a namagaan, ta oras ti serrekmin iti eskuela.

Nagay-ayam kami iti basketball iti YMCA Gymnasium a dikami unay makakutkuti ken Herman. Maarriek gayam ti tillayon no awan underwear!



Dios Ti Agngina Manen Apo Webby! itoy partuatmo a paglanglangoyan dagiti nanumo a paskilko!


Comment(s): 125  | Lastupdate: 7/1/2009 7:36:40 PM



 Dagidi aldaw a di agkupas_seventeen.1
12/4/2007 6:06:30 PM

Tallo nga aldaw sakbay ti bisperas ti Paskua, 1976

Bakasionen dagiti agbasbasa a kas kadakami.

Simmangpet nga umay mangbakasion ken ni lilangna iti ina ditoy lugar mi ni Gayyem Ani Balanay, manipud Camalanugan, Cagayan idi sangaaldaw. Ngem ad-adda a dakami ken Atanud Larry Salvador a karrubami ti kailiwna unay. Ditoy balaymi ti masansan a pangpalabasanmi iti oras.

Nalamiis latta ti iyap-apiras ti napigsa nga angin iti nabayagen a nakatangkayag nga init. Adda kami iti likud ti sarusarmi a salingedmi iti agpabagatan nga angin. Mayat ti panagsasangumi kadagiti padak a bumarito a nakatugaw iti bangkito nga agsigit iti tallo kaputed a bayog nga aramidenmi a ban-ban. Sag-sangaputed kami a tallo ti sigiten. Nalpaskon ti barsakko, bassit ti napagbalinko a ban-ban ta kanayon met nga maapi (daytay saan nga agbalin a sanganayon a ban-ban). Diak ammo ti agban-ban ta adda idiay Hawaii ti amami, ken dagiti tallo nga in-inauna a kakabsatko a mangisuro koma kaniak, siak ti inaunaan kadakami a tallo ditoy.

“Tulonganka, kayatmo atanud?” inyuprisirko ken Atanud Larry, ket parparikarakon ti pumidot kadagiti nagisla nga adda iti sangona.

“Her her her! diak kayat, ney! tulag a ket tulag!” uray la nga immurat ti tengnged ni atanud iti panaggayemgemna. Makadlaw sa ketdi iti taktikak. Nagtutulaganmi ngamin nga aggagayem, nga ti kaaduan iti mapagbalin a ban-ban ket isu met laeng ti kaaduan ti bingay iti sangapulo a pisos nga inted ni Auntie Sintang, karrubami a pensionada a balo di Uliteg Goyo a Hawayano. Masapolna ti ban-ban a paggalutna iti aramidenna a pala-pala.

“Gayyem Ani, 'gurka ta tulonganka!” diakon inuray ti sungbatna. Pimmidutak ti nayon ti ban-banenna.

Ginuttana ti kapidpidutko a nagisla a bayog, “saan a yordz! kurang pay a ban-banek dagitoy,” nagkubbo a nanggaw-at kadagiti inarikumkumna a nagisgisla a bayog, indissuna iti sangona ket pinandagan dagiti dapanna. “inka ketdi asaen dayta ngudngud a badangmon… mabalin a kalantayen ti kuton ti tademna, hahaha!” inkantiawna.

“HUSSS… Kasano koma met a makalantayna…?” Pimmidutak kadagitay naapi a ban-ban ket inparabawko iti langdet ket ingudagodko ti buneng iti ban-ban. Saan a napessat!

“Kunakto pay… hahaha!” kuna ti Gayyemmi a mangsisiim gayam iti ar-aramidek. Uray ni Atanudko ket imlek.

“Ngem saan a makalantay ti kuton ta natadem met…” indepensak.

“Pustaanta ti binting?” inunnatna ti kannigid a gurongna, kinautna ti bulsa ti sapinna. Nickel ti intaud ti kannigid a dakulapna.

Imlekak ti kasta unay! “HAHAHAHAHAHAHAHA! sabali met ti bintingmon Gayyem!” pilpilit ti isem ti gayyemmi. Nadiskarkulo siguro ti adda iti bulsana.

“Halla! Petetaskonton, Bayaw!” inruar ni Atanud Larry ti dua a diesna.

Itay malpas ti ban-banenda. Kapilitan a napanko innala di teddak iti ingatangko iti Corona a coupon band a nagsuratak iti love letter a para koma ken Rocell Baptista a sabsabongek, agka-section-an kami ken Rocell- natalento a balasitang, iti maikadua a tukad ti high school. Naperdik di tallo a panid. Balbaliakto ti gumatang. Bassit koma met laeng ti isuratko ta kastoy koma laeng: Rocell, I love you, Without preno, I really do… I Honestly love you! Sincerely, JRIC. Ngem nagrigat met ngamin ti agsurat iti ma-foot ruler-an! Kair-rugrugik pay laeng ket maperdi manen! Maisagirad ngamin iti straight edge dagiti dadduma a letra. HUSSS! Dagiti la unay adda ipusna a letra ti mangparigat kaniak ket!

Rimmuarak iti uneg ti balaymi.

Napunnon ni Atanud Larry ti rektangle ti sukogna a tangke ti danum nga ar-aramaten ni nanang no aglaba. Inaramid ni tatang idi naudi a bakasionna ti semento a tangke. Masmasdaawak no apay a masapol ti danum iti aramidenmi a kalukuan.

Apagapaman a pinagtalinaaymi ti danum-gripo nga agkilongkilong iti uneg ti tangke.

“mapanen..?” saludsod ni Gayyem Ani a nakaiggem iti badangko. Saanna a maitangwa ti rupana ta iti kuton nga agkarkarayam iti buneng ti banbantayan dagiti matana.

“Wen, panen! Uray agkaduakayo; maatiwkayooo!” Nakaritak ita. Awan ti aripuyot, ta nasaapa a nagpaili ni nanang.

Inin-innayad ni Gayyem Ani nga intaneb ti putan agingga iti katengaan ti buneng iti uneg ti tangke, inin-innayadna met laeng a pinagdata, daytay ti tademna iti akingato… intanebna pay agingga a bassit laengen a parte ti di mabasa. Makita itan ti maar-arukattot a kuton iti bakrang ti buneng a saan a natinep iti danum … patas nga inpababana pay ti buneng…

“her her her! Bayaw! Nangatiwen tay petetasko!” mangan-kantiawen ni atanud Larry.

(adda tuloyna iti baba) --->>>


Comment(s): 166  | Lastupdate: 2/24/2008 3:54:49 PM