iluko.com - website a magustoan a pagpalpallailangan dagiti pada a nangisit ti sikona.

Bayengyengko.blogspot.com/2007

 

Skip Navigation LinksHome > Blogs >


 Amado I. Yoro

 Entries:
8
 Comments: 116

iCom Page






 DANIW: PAPA BENEDICTO XVI ABRIL 15, 2008 US PAPAL VISIT
7/11/2008 11:28:17 AM


PAPA BENEDICTO XVI
ABRIL 15, 2008 USA

Kas iti napusaksak a kalapati a nagdisso iti abaga
ti pagayam, ti inyegmo a kappia ken
kaipapanan iti panagkaykaysa,
ngem patiem kadi a masebseban ti apuy
ti gura ken gil-ayab ti barukong

Awitmo ti nasantuan ken
nasagraduan a krusipiho a simbolo
ti pannakasuot ken panagsagaba,
patiem kadi a maitedna ti
panagpapatas iti baet iti pannakailanglangi

Gubat iti amin a panawen, gubat iti amin
nga entablado dagiti agpipinniltak a politiko
gerra iti nakem; iti puso dagiti ilem
ti di agressat a susik ti panunot ken aramid
ta isuda laeng ti agkuna nga isuda dagiti
nadalus ken naugasan, ngem patiem aya
nga adda pay nadaldalus ngem ni Jesus

Ti pug-aw ti ngiwatda, ibagada pay nga ibabada
dagiti presio ti biag, ngem ammom kadi aya a
dagiti sao ti mangitayok ti ngina ti presio ti biag
[lana ken dadduma, anian a ngina]

Agbuggoak man kunada, a ngem ti dapanda ken
dagiti imada nakakawkaw iti pitak ti basol
dagiti nailemlemmeng a panagbasol
dagiti nangina a dekutson a kama iti metropolis

panagabuso kadagiti babassit iti linongda adda met
panagbisinda iti lasag ket manganda, igupenda
ti naglaon iti sabali a kopita iti daradara a parbangon
kadagiti nalingdan a palimed.

Apo, pakawanem ida iti bendision ti kapa
Ti kappia ken krusipiho ti pannakasubok.


====000====
Joseph Ratzinger, 81 bd, celebrated his 81st bd at the Rose Garden.

=====0000====
[I was inspired to write this poem as I watched CNN and Fox News as the Pope Benedict XVI is in USA, first time in Andrews Air Force Base , Maryland a landing port, then hosted by Bush at the White House]



Comment(s): 7  | Lastupdate: 8/19/2008 1:49:49 AM



 Ti Anges ti darikmat a mayurit iti urat ti pluma
7/2/2008 11:07:29 AM

ti Anges ti darikmat a mayurit iti urat ti pluma


Amado I. Yoro
Ewa, Hawaii
9/19/07///////July 2, 2008

Ita nga agsapa luktak ti ridaw
Yegna ti birtud tay parbangon
Sukogan ti pakasaritaan.

Ita nga alas dies sanguek ti merienda
Isamirak nga ubbaen ti ubing
a mangsilpo ti pakasaritaak

Ita nga agmatuon pagilisanan ti sang-atan
kas kadagiti rawis ti balligi
Ken dagiti alimpatok ti pannakapaay
Mailasinda iti umay a panagligsay
A salogan ti biag.

Daytoy ti alas kuatro sabali manen a merienda
isamirak latta a tulnekan teklado daytoy pc
dua, tallo wenno ad-adu man ti mayuritko, isuda
ti mangsuksukog ti umas-asideg a malem

kumiraosak bagas maisaang kasilpo ti anges-inanama
ti biag, pegpeg dagiti darikmat ti aldaw ken rabii
ti ilelennek saan a matawaran

dayta ti sardam: mariknak ti duayya ti giteb ti pagorasan
tanamitim ti panagyaman naimbag a rabiim kasimpungalan

parbangon manen: agyamanak sabali a pannakaipasngayko daytoy
nasarsaranta manen ti pul-oy iti ridaw ti umay a bigat
maibulos ti anges ti darikmat a mangyurit ti kambas ti biag.

{Nasuratko kabayatan ti panagaw-awirko ken ni CJ Yoro Agullana, my grandson]


Comment(s): 4  | Lastupdate: 7/29/2008 2:48:14 PM



 SIKA
6/30/2008 10:17:03 PM







SIKA

[Iti Mata ti Mannaniw]

Inspirational poetry

Daytoy ti sabong: gupitna ti bassit a

tinukel a bin-i kas iti dawa ti panagani

maidulin iti naimeng a taeng

Sibibiag ti pulso ti nainaw a pammateg

Itag-ay ti init ti daeg maipasngay a

Namnama; aglangoyda iti danum

Iti dalluyon ti biag kayaw ti mabukel a

ladawan ti nakaparsuaan a buya:

ti bantay, ti baybay, ti mula, ti tumaytayab

ti dagidagi iti away a nakagsatan ti kurdonmo

ti ina iti pisikal a panagsina…..

[naibartay kadi met laeng ti tangkulong

wenno ti damili a naglaon iti kadkadua

iti sanga ti duog a salamagi?]

Ala denggem, Sika ti

kanta-dayyeng ti ina a nagubba

Kenka: agawaam ti agbiag, kunnotem

Ala, kunnotem pay ti mungay

Ti biag; penkem sakbay ti saraaw

Tipdem ti sangit – maturogka latta

Iti saklolo ti talged ken pammateg.

Dagiti anglem iti laem isuda daeg ti daniw

Dagiti garakgak ken katawa

Isuda daeg ti napusaksak a langit

ngamin ti init tinapayana ti kinarayray

Uray nakapanawen ti linnaaw

Agukrad latta ti sabong ti nasudi nga agsapa

Ket dagiti malem umisem ti bituen

Dagiti sardam a kantaan ti pul-oy

Iti arubayan ti kampanario dagiti

Lagip ken ti kinaagtutubo, Sika iti

pakabuklam iti mata ni mannaniw.

Amado I. Yoro

Ewa, Hawaii, USA

April 9, 2008///June 29, 2008




Comment(s): 0  | Lastupdate:



 NARAGSAK A KASANGAYMO KASIMPUNGALAN: KENKA TI ABRIL GCPY
4/10/2008 8:46:25 PM

NARAGSAK A KASANGAYMO KASIMPUNGALAN
{Kenka Dagiti Abril; Kaniak ti Setiembre]
[ Para ken G. C. P. Y]

Adtoy ti sagut: Ti kari
Iti kinaagnanayon

Naragsak a kasangaymo

Adtoy ti ayat: Ti pammateg
Iti kinaagnanayon

Nagasat nga aldawmo

Adtoy ti pammatalged: Ti nairut
Iti kinaagnanayon

Saluadannaka koma ti Dios Apo

Adtoy ti karit: Ti naun-unday a pannakasubok
Iti kinaagnanayon

Sika-siak agbuligta a mangsango

Adtoy ti sagut: Ti kayaw
Iti kinaagnanayon

Siak-sika kupikopanta a dayaw

Adtoy ti kari: Agbiagta iti kinasimbeng ken kinatalna
Iti kinaagnanayon

Kinaregta ken kinasalun-at ikawesta nga agpada

Adtoy ti daton : Iti kinasiak, siak ken sika
Iti kinaagnanayon

Kadagiti Ima ti Dios a Namarsua.

Ulitek ti kari: “iti dayaw
Iti rag-o ken ragsak;
Iti kinabaknang wenno kinakurapay
Iti man sagubanit ken kinasalun-at”
Daytoy ti panaglantip ti ayan-ayat
A nadarisay

Agbiagka ! Kenka ti Abril. Kaniak ti Setiembre
Agbiagka ! Kenka ken para kenka dagiti Abril !

[I was inspired in writing this poem by the prayer offered by Fr. Randy Albano at St. Paul’s Church during the Novena To Our Mother of Perpetual Help -Wednesday April 9, 2008 [April 7 is Gloria’s birthday] [We had celebrated our 35th Wedding Anniversary on January 2, 2008 at St. Paul’s Church, Honolulu, Hawaii, where we both active as EM and officer of the Church – Diocese of Hawaii]


Comment(s): 24  | Lastupdate: 6/7/2008 7:03:03 PM



 KARARAGLIKAS ITI PASKUA
12/24/2007 2:21:20 PM



KARARAGLIKAS ITI PASKUA

Dawatek Jesusko
Ituloymo a pasin-awen ti puso
kararua ken konsensia
dagiti gagayyem a kas met
kaniak

Ituloynak a patibkeren iti pammati
iti sao ken aramid
Dimo kadi ipalubos a sinaanka
tapno saanak a mayaw-awan
iti pannagnak iti inaldaw
kasta koma met kadakuada

Saan kadi iti kapautko a rukodennak
ngem dagiti kalidad ti aramidko
a patalgedannak iti sabali pay
a gundaway

Sika ti Alpha ken Omega
no maikariak nga agnaed iti nagbaetan
dagitoy iti nasin-aw a Silaw
ngamin Sika a Dalan
ti Biag
ken ti Mannubbot
ti Emmanuel:
adtoy ti pusok
sipapakurang a daton iti amin
nga aldaw
uray ania a darikmat
iti Intedmo nga anges
iti aldaw ken rabii
Ipangpangrunak a yebkas Kenka
ti di agressat a panagyaman
ken pammigbig iti Kinaasinom
ita a Paskua:Sagut !

Amado
12/24/2007


Comment(s): 48  | Lastupdate: 4/11/2008 8:20:22 AM