Arko

 

Bisel ken darat, semento ken landok

Nangted iti maris, rimat ken sukog

Idi ken ita, inton bigat a parmata

Natibker a tanda iti kawayan a rugina.

 

Daton ti Purok iti ruangan ti biagna

Bullalayaw iti abagatan a mangriing regta

Nagudua a singsing da ragsak ken lua

Balawbaw dagiti mabati ken agbaniaga.

Awan ti lagip iti ungto ti lipat

No sumken ti iliw dumuko a batibat

Ladawan a naisapit seggaan a surat

Binatog a mangsidir essem nga agrubuat.

 

Awanen ‘di kawayan ken linaga a parupa

Di mapungtil a rabong a naamnot, naemma

Awanen di pambaran ni Ayat a mangarkos

Kidday ti karayo a tapoken, agkalimduos.

 

Arko ti rang-ay da doliar ken rial

Bato a balabala ‘di sabong a rosal

Daeg ken dayaw, saet ken salisal

Ruknoy ti Flora, karit a natungpal.

 

Ridaw ti balligi, tindek a napaay

Tured ti pimmanaw, anus ti agur-uray

Amin dagitoy, naibugas a ngayed ti Arko

Naipasdek a darepdep iti nakem-puso.

 

PELAGIO A. ALCANTARA

 

Naipablaak iti Sirmata

Parupa a Daniw

Pebrero-Marso 2001