Buteg Wenno Duggong

Kas man maulit-ulit ubbaw a kari, kasla buteg

    nga agal-aludoy, alibtak nga asgsubli.  Dillaw

    idi ken ita, isu ta isu latta, awan giddiatna.

Dagidi inda dinillaw a di mikanatad, agdadata

     a nakarkaro met gayam.  Idi isudan ti addaan

     nakawesan turay ken pannakabalin.

Parammag ken bullilikong, adda pay kaduana

     a pammabasol.  Grandstanding a kanayon

     awan man la sarimadeng, alikaka.

Dagidi pammabasolda a babak ti umapo

     kadagiti didiosien, napalaus.  Apal met gayam

     a kimmidkid, manggargari ti kadua a bumusor.

Kadagiti adda iti poder.  Tapno maalada ti simpatya

     dagiti paspasurot.  Tapno isuda ti sumukat, lider

     dagiti bulsek a paspasurot, tukmem, awanan gaway.

Dida ammo a maus-usarda gayam a kalatkatan

     dagiti buklis, buaya ti takdang.  Ngamin ta ni

      babawi ket panay a maudi, maarus.

Ubbaw a kari, maulit-ulit a kas buteg.  Kadagiti

     bibig ni salibadiok.  Lamina a baro, nakarkaro

     met gayam ngen di inda  inum-umsi.

Di pay napudotan ti tugaw di napagasatan

     inrugidan a linuto.  Rali, plakard, manifesto

     sabali pay maiwaras a pardaya ken estoria.

Ania ni didiay, buteg?  Awanan duri, agsublisubli

     dagiti ibagbagana? Inta gayam nalablabesda

     pay iti duggong a timmangken, nakapigpigket.

Ah ... kasta la ti biag, no adda  nam-ay, magna

     ti ublag. Adda kubbo, adda kiad, adda mitir

     adda dagiti agraraman, kasla baed a napagustuan.

ROGELIO ES. TANGALIN

Brgy. San Miguel,  Agoo, La Union

Naipablaak iti Rimat

Oktubre 2003