Datonko Kenka

 

Karkarna ti isasangbaymo

Iti di napakpakadaan a kanito

Apagdarikmat, dimtengka a kigtot

Gameng ti gimong, ganagan ti panunot.

 

Nagbalinka a kibin ti agdama

Mangted rag-o, baro a namnama

Sika ti saludsod ti napalabas

Sungbat ti agdama a paduyakyak

Nadam-egka a karit ti masakbayan

Naaweng a kanta, pagrukbaban ti kaaduan.

 

Ket iti samiwengmo a napudno, nakapudnon

Nalabit, nakipagkantaka kadagiti anghel  sadi’ langit.

Bay-am, ta iti idadatengmo lapunosennaka

Dagiti binnatog nga isagutko kenka, ditoy daga.

 

Wen, sika ti arasaas ti agdama a paraiso

Naisangsangayan a ragsak, kumalbit iti puso,

Dimtengka a mangituldo iti kinapudno

Kinasupadi, kinakaskasdaaw, kinasiasino

Palubosannak ngarud a mangipeksa ita:

Kaipapanan ‘toy daniwko, ‘datonko kenka.

 

DJUNA R. ALCANTARA

San Fernando City, La Union

 

 

 

Naipablaak iti Sirmata 

Hulio 2004