Gasat ken Kayat

 

Itoy a kanito, itoy a disso

Yumanko saning-i ‘toy puso

Ta apay a kastoy metten nagbanagan

Gapu laeng iti pakapilawan?

Pengdam piwis a paludip ken isem

Pangngaasim dinak liklikan, dinak laisen

Agkakamakam dagiti saibbek iti nasipnget a rabii

Gaput’ sao, aramid agsusupadi

Basolko kadi no kastoy ti galad ken langak

Dimon baliksen, dimon irakurak.

Nagbiddutka iti inka insawang kaniak

Naipasngayak a tinartarabay ti gasat

Gasat  a nasayaat ta dinak insagmak

Ta nagkuykuyog da gasat ken kayat.

 

 

MILAGROS L. RENON

Busel-Busel, Luna

La Union

 

 

 

 

Naipablaak iti Bannawag

Pebrero 09, 2004