Kanto II

 

Kaar-arngin ni Kalla a nagawan, Ading Kandi.

Mairuboak manen iti nakain-inaka a gargari.

Surotenka ti kunak, nupay narasit’ pammagi.

Kas pangasaan iti buneng, masapul taot’ babai.

 

Tumilmonak man iti linugaw nga impadigom.

Nalabnaw no idi kaub-ubingak. Ay, ta saom ….

Minesmesanna ti sangik. Nabatin ‘toy aklom….

Subliemto, wen. Aprosamto man ‘toy tarindanum.

 

No lumalaing bassit ti karabukob, inkanto awagan

Tapno saanda nga ipagpagarup a sika ti maganatan.

Ayabanka a napigpigsa nupay maltotanak …

Ti agasko a nagan.

 

Adda dita nga agbirbirri dagiti langka,

Kasta met rimas, ken dagiti ruar ti bukelda

A kasuy. Ikiwarmonto man nga isagana

Tapno maammuanda amin a kadagitoy sikat’ mangilala.

 

Kandi, Ading Kandi, kinalupoyko sikat’ mamatibker.

Kas pinangpaludot ti kimat ti pus-ong ti kuter

Ket rumsua dagiti uong iti apagdarikmat a taer …

No saanda a maala a dagus aglusdoyda a sisisidduker.

 

Awan adu a palutpot, nakapadungalngal

Laeng ni ayat, kas makaep-ep a busel

Iti saong ti kabalyo a nakapadel pay. Naipalpalapal

No saan a maiparikna. Agragrag-on a sumukal.

 

ALEJANDRINO G. HUFANA

Siudad ti San Fernando

La Union

 

GUMIL Yearbook,  Hunio 30,  1973