Kuton ken Tao

Ni kuton maysa a kabassitan a parsua ti Dios;

     Ni tao kalalainganna iti tayag, putar ti Namarsua.

Ni kuton nagaget, kanayon a naalibtak

     nga agbirok iti kanenna

     para iti tiempo ti gawat;

Ni tao nasaet, ngem no maminsan awan

     ganaygayanna nga agsapul pagbiagna.

Ni kuton, no iti kalgaw, agalimbadaw

     Nga agurnong kanenna para iti tiempo ti gawat;

Ni tao adda man ken awan mabirokanna

     Dios ti agaluad laengen kenkuana.

Ni kuton awan parikut ken ririna;

     Ni tao napnuan problema sipud pay

     Pannakayanakna inggana’t ipupusayna.

Ni kuton no masabatna kabsatna,

     Aginnabrasa ken aginnagekda;

Ni tao no masirmatana kaburikna

     Kusilap ken ngernger pangablaawna.

Ni kuton uray no kasla puling

     Ipasimudaagna kinagaget,

     Kinaanep, kinasingpet;

     Awanan parikut, ngem

Ni tao adda amin pakakitaan

     Kenkuana: nagaget, nadayaw,

     Managuyaw, managparabur

     Ken amin ditan.

Kuton ken tao agsinnupadi!

Siasinnoka? Kuton wenno tao?

JOVEN F. COSTALES

Naguilian, La Union

Naipablaak iti Sirmata 

Abril 2006