Panaguray

 

Adtoyak, saanak a mauma

A mangur-uray iti ipapanawmo.

Danggayanka a mangkanta

Kadagiti naliday a duayya.

 

Bambantayanka

Tunggal an-andingayenka.

Atiddog unay ti aldaw

A mangbalbaliw maris ken langam.

 

Idi damo,

Napusasaw a kiaw

Kalpasanna, lumabaga

Santo umasul ken ngumisit.

 

No mangngeg koma ti sipnget

Dagiti kararag ken un-unnoymo,

Saannakan a padanonen

Iti maris ti tagainep.

 

Ngem adtoyak latta

A mangur-uray maudi a pakada

Dagiti agsayasay a lua,

Ti nakalidliday a sonata.

 

JOSEPH R. SERMONIA

Epifanio Road, Tuddingan

Naguilian, La Union

 

 

 

Naipablaak iti Rimat

Agosto  2004