Ramut

 

Ammok nga awan ti kaitutopam, malaksid

Kadagiti amin nga agkarayam nga umuneg

Iti ibabatokmo iti dam-eg ti daga a nadungngo

A pangrugyan ti datdatlag a mangarkos iti ngato.

 

No maawatam la koma ti kaipapanan

A saan laeng a ramut a mapurpurporan

Wenno nalaad a rungdaw  iti saklot ti kalgaw

Ammo koma a ti sabong ti puso ti law-ang.

 

Ngem natikag ti isip a saan a makapanunot

A ti biag, timmakder manipud iti ramut

A makisalip iti panawen ti aplat ken kirang

Dagiti tarigagay a di pay nagawagaw…

 

A ti puso ti dugo a natibker ken nabaked

A pagramutan ti amin a kinasalindeg.

Ti sabong ti puso a masay-up iti isem

Ti palimed ti ramut a saan a mailemmeng.

 

 

*Aamin a letra C  iti naipablaak  a daniw, nasukatan iti letra K  para iti daytoy nga  antolohia

 

 

CRESCENCIA R. ALCANTARA

Flora, Sto. Domingo, Ilocos Sur

(Agnaed itan ti autor iti Namnama Village

San Fernando City, La Union)

 

 

 

 

Naipablaak iti Bannawag

Mayo 16, 1955