Sika ken Siak

 

no sika ti sagibsib ni Angalo

siak ti busel ni Aran

no sika ti adigi a pagsanggiran

siak ti gil-ayab a paginuduan

no sika ti takiag a pagbitinan

siak ti dakulap a mangyapros dungngo.

 

no sika ti tangatang, siak ti baybay

no sika ti bantay, siak ti dan-aw

no sika ti gurruod ken kimat

ti bagyo, allawig, alipogpog

siak ti nalailo a pul-oy, ti arbis.

 

no sika ti balangat a mangitan-ok

siak ti sabong ti sampagita iti altar

no sika ti utek a pagtaudan sirib

siak ti puso a pagubbogan ayat.

 

no sika ti napalabas a ladawan

a mangted birtud ken kaipapanan

siak ti sarming ti masakbayan

a mangted talged iti kaibatogan.

 

no sika ti nabileg a rason

siak ti naumbi a daton

no sika ti pagtaudan

ti bileg a mangukom

siak ti mangimet bin-i ti biag.

 

 

DJUNA R. ALCANTARA

Namnama Village

Siudad ti San Fernando

 

 

 

Naipablaak iti Bannawag

Agosto 2, 2004