TI MAUDI NGA   

    ENKUENTRO

 

      Ababa a Sarita ni 

     RUFINO RE. BOADILLA

 

      NAGTAKDER ni Tasan iti tapaw ti Kimmallugong.  Tinangadna ti kabus a bulan.  Madamdama, umayton ni Satanas! Adda manemtemtem a pungtot iti barukong ni Tasan.  Mabusor unayen iti kasasaadna.

      Itay sardam, pinamedpedna ti taraudi ti imbalon ti inana idi kanikatlo nga aldaw.  Ita koma manen a sumang-at ti baket.

      Ngem agparparikna kenkuana a dinanton mauray pay ti inana.

      “Sumukokan, Anak… Marigatanak unayen nga umay mamalon kenka ditoy bantay.  Napeggad.

      Baka natiliwen ti inana.  Wenno natnag iti rangkis gapu iti sipnget.  No saan, sinippit ti karasaen!

      Agiinnuna ngamin dagiti polis a manganup kenkuana.

      Gamgamenda unay ti tallo gasut a ribu a pisos a nailatang para iti ulona.

      Nangmesmes.

      Bigla a dimmikar ti ut-ot iti abagana.  Nairasras ti timmangken a milat ti dara iti diaketna.  No awanen ti agas nga isang-at ti inana, di bumurong nga agimpeksion ti sugatna.

      Gapuanan ti polis a naudi a pinatayna ti sugat iti bukotna.  Maika-66 kadagiti napapataynan.

      Naipasuli ti kaanakan ti polis a nagimpapatay, nupay nakatallikud, pinaltogan a dagus ti polis.

      Inasitgan ti polis.  Idi padataenna koma daytoy, inkawal ni Tasan ti jungle knifena iti luy-ong ti polis.

      “Adu unayen ti basolmo, Anakko… Agsublika koma iti Dios!”

      “Dios? Awan dayta a Dios a kunkunayo, Inang!”

      Kunkunada nga adda anting-antingna.  Dida ammo a nagalis ti biagna gapu iti nangisit a bato nga inted kenkuana ni Satanas idi damoda ti agsarak ditoy Kimmallugong.

      Nagkamang ditoy idi mapatayna ti amana.  Gago ngamin daydi amana.  Bartek ken naulpit unay kadakuada nga agina.  Arigda ti adipen.  Kasla agtaso pay iti nuang ti pamay-an ti lakay kadakuada.

      Idi mapnuan, tinaray ni Tasan ti jungle knife iti diding ket ginay-abna ti bakrang ti amana.

      “No isakmolmo daytoy nangisit a bato, awanto ti makailuges kenka.  Sikanto a kanayon ti bida.  Basta aramidem amin a maikontra iti padam a tao, aggayyemta!”

      Ingarakgak idi kenkuana ni Satanas.

      Nagtakaw, nangrames, nagpuor, pimmatay.  Agpayso! Kinabutbutengda pati anniniwanna.

      Ngem kasano itan?  Agnunogen ti sugatna.  Mabisbisinanen. 

      “Satanas! Agparangka kaniak, Satanas!”

      Adda nangisit nga ulep a nanglinged iti bulan.  Nagpayakpak daytoy a nagpababa.  Nagungor iti nakabutbuteng ti angin.  Rimpaak dagiti kayo iti Kimmallugong.  Idi agkirpa, addadtan ti saraan ken barikawwet a pakabuklan ni Satanas.

      “Awan as-asin ti panangawagmo iti naganko, a.”  nasidunget ni Satanas.  “Aniat’ masapulmo ta kaska la malaglagawan?”

      “Masapul? Dimo makita ti kasasaadko?

      Nasken nga iremediom a mawaswas amin a kasok tapno agbidaak manen!”

      “Bwa-ha-ha-ha!”  nagallangogan ti paggaak ti sairo.

      “Gago ! Matmatayakon, katawaannak pay laeng?”

      “Ta ania komat’ bibiangko no matayka?  Di naimbag ta matagikuakon ‘ta kararuam? Bwa-ha-ha-ha!”

      Nagburek ti dara ni Tasan.  Naasutna ti jungle knife ket pinagdadaraddanna a binagsol ti bukot ni Satanas.

      Ngem kimtat ti tadem iti nakulbet a lalat ti sairo.

      “Tarantado! Gunggong!” Immapuy dagiti mata ni Satanas.  “Sin’ ti nagkuna a kalabanennak!”

      Insakmol ni Tasan ti nangisit a bato ket dinarupna manen ni Satanas.  Ngem awan nagudilan ti igamna.

      “Nalpaskan, Nengneng? Siak met!”  idi pimmulipol ken kimmali ti siitan nga ipus ti sairo iti bagina, napakidem ni Tasan iti ut-ot ti kasla mapirpirsay a lasagna.

      Kinagatna dagiti bibigna ket nayesngawna, “Diosko…Diosko!”  L

_________________

Naipablaak iti Salinong 

Oktubre 1-31, 1999

Nangabak iti Maikatlo a Gungggona

       iti Salip ti Mini-Sarita, 1999