Ti Naitukit a Rimat

 

I.

Dupogennaka man

ti umatiberret nga angin

Wenno alun-unennaka

ti makabulsek a sipnget

Ikarigatam mangikayaw-at

ima ti gasat

Ammuem nga agrusingto

naitukit a rimat

Ket kaliemtotí balitok

ungto ti bullalayaw.

 

II.

Imasem a say-open bang-i

asuk ti matuntuno

A lasag ken kararua

dagiti maabel nga arapaap

Iti tapaw ti turod,

matannawagam kinarimat

Daydi naulsan

iti naan-annongan a batibat

Kukuam itan ti karirimatan

a balangat ti kimat!

 

RONNIE A. NULLAR

Nalvo Norte, Luna

La Union

 

 

 

Naipablaak iti  Bannawag

Marso 1, 2004