JOVEN FLORESCA COSTALES

 

 

      NI Judge Joven F. Costales ti kaunaan a nagpresidente iti GUMIL La Union idi mabukel daytoy iti tawen 1966-1967. Nagsekretario-Heneral ti GUMIL Filipinas idi 1993-1995. Iti panagbinnuligda ken ni daydi Dios-ti-aluadna a Pelagio Alcantara, sinuratda ti pakasaritaan ti GUMIL La Union iti uneg ti tallopulo a tawen, ket naipablaak daytoy a pakasaritaan iti GUMIL Filipinas: 25 a Tawen nga inedit da Apo Reynaldo A. Duque ken Associate Editor Cles B. Rambaud ti Bannawag. Adun dagiti naipablaak a sinurat ni Judge Costales kadagiti nadumaduma a nasional ken lokal a pagiwarnak iti probinsia. Nadutokan a hues iti Regional Trial Court Branch 45  iti Urdaneta, Pangasinan idi 1995. Napadayawan nga Outstanding Senior Citizen idi 2004. Nayanak ni JFC, buridek iti 14 nga agkakabsat, iti Naguilian, La Union, idi Nobiembre 21, 1937 kada Cecilio Costales ken Micaela Floresca (agpada a pimmusayen).  Ni Perla Florendo Costales, nagkonsehal ti Naguilian ken nagboard member ti La Union, ti kaingungotna. Addaanda iti bugbugtong nga anak, ni Jove Michael.glu