MANUEL ESTABILLO ARGUILLA

(Hunio 1911 - Oktubre 1944)

 

       MANNURAT iti sarita iti Ingles, patriota ken martir.  Naipasngay iti barangay Naguilian, Bauang, La Union kada Crisanto Arguilla ken sigud a Margarita Estabillo. Nagadal ni MEA iti eskuelaan ti Brgy. Calumbaya a kabangibangda, a nangisuruan kenkuana daydi Alfredo Abuan, ti umuna a maestrona nga agbasa ken agsurat iti kartilia. Nagturpos iti elementaria idi 1926 iti Bauang Elementary School. Nagadal iti sekundaria iti San Fernando a naglatakanna a nasapa idi nageditor iti La Union Tabloid, ti pagiwarnak ti pagadalanna. Rinugianna ti nagsurat iti salaysay, ket babaen iti panangendorso daydi Angel Anden kenkuana, nakaipablaak iti Graphic, Free Press ken iti Sunday Tribune magazine.  Inleppasna ti haiskul iti tallo a tawen ket nagturpos a salutatorian.  Nagenrol iti Unibersidad ti Pilipinas, Kolehio ti Edukasion, idi 1929. Nagtrabaho iti Carmelo & Bauermann, kas mannurat, ken timmulong iti imprenta. Nagkameng iti U.P. Writers’ Club, ket idi 1932-1933, nagpresidente iti daytoy nga asosasion dagiti mannurat nga estudiante ti UP. Nageditor iti Literary Apprentice ket tinurposna ti B.S.E. idi 1933. Inkallaysana daydi sigud a Lydia Villanueva. Adu ti naawatna a pammadayaw a pakairamanan dagiti saritana a “Midsummer” ken “Heat” nga agpada a naipablaak iti Prairie Schooner. Naawis ti atension daydi Edward J. O’Brien ket inramanna dagitoy a sarita ni Arguilla iti tinawen a panagpilina iti sarita iti Amerika. Idi panawen ti Japon iti Filipinas, naibalud ni MEA iti Fort Santiago, ket idi Oktubre 1944, kinettel dagiti Hapon ti agkabanuag a biagna.glu 

(Naadaw dagitoy nga impormasion manipud iti Rimat Magasin, Oktubre 2004)