PELAGIO AGBISIT ALCANTARA

(Marso 23, 1930 Nobiembre 16, 1999)

     PAGTAMDAN a mannurat iti Iloko ken Ingles, nagrimat ti bituenna iti adu a tawen kas mannaniw, mannarita, mannalaysay ken dramaturgo.  Maysa kadagiti kaaduan iti inabak a premio kadagiti agtinawen a salip iti sarita iti Iloko idi panawenna. Kas nalaing a mannurat, rimmuar dagiti sinuratna iti Philippine Free Press, Graphic, Sunday Times Magazine, Saturday Mirror Magazine, Philippine-Asia Leader, Focus Philippines, Who,  MOD, Journal of Education, The Modern Teacher, PPSTA Herald, Ilocos Tribune, Bannawag, kdpy. Kinatipkelna ni Ilokandia poet laureate Dr. Godofredo S. Reyes a nangedit iti umuna a libro ti GUMIL Ballatinaw I. Ken ineditda met ken Manuel S. Diaz ti libro nga Ilokano Harvest, maysa a koleksion dagiti sarita iti Ingles a gapuanan dagiti Ilokano a mannurat. Impablaak daytoy ti New Day Publishers. Naisangsangayan ti liderato a naipamatmatna kas pundador ken umuna a presidente ti GUMIL Ilocos Sur (1964), Presidente ti Ilokano Heritage Foundation, Inc. (1995) ken Presidente ti GUMIL Filipinas (1993-1995). Dagiti kangrunaan a pammadayaw a nagun-odna:  Isabelo de los Reyes Award (medalia a balitok ken citation) manipud iti Ilocos Sur Historical Society;  Plaque of Merit manipud iti NSDB-HPS Region I, plata ken bronse a medalion iti scouting, maikadua ken maikatlo a premio iti literary and playwriting-directing competitions (Iloko ken Ingles), College Poet of the Year and Short Story Editor of the Year (1955), Don Cornelio N. Valdez Award (1992) ken Pedro Bucaneg Award (medallion ken plake) idi 1993 manipud iti GUMIL Filipinas. Maid-idolo pay a kas teddek ti edukasion ni PAA. Idi kabambannuaganna, napadasanna ti nagprinsipal iti Flora Elementary School iti Sto. Domingo, Ilocos Sur a nakayanakanna idi Marso 23, 1930. Idi nagpa-Manila, naipuesto a kas media coordinator iti Bureau of Education iti Arroceros, Manila. Pito ti annakda ken ni sigud a Crescencia Robianes ti Pagudpud, Ilocos Norte. Pimmusay ni PAA idi Nobiembre 16, 1999, uppat a tawen kalpasan ti panagretirona a Regional Director ti Philippine Information Agency, Region I.glu