CRESCENCIA ROBIANES-ALCANTARA

 

     MAYSA kadagiti kaunaan a babbai  a mannurat a nangab-abak iti salip ti literatura Iloko ni Crescencia Robianes Alcantara a balo daydi Dios-ti-aluadna a Pelagio A. Alcantara.  Iti pasalip ti Bannawag, dua a saritana ti premiado: “Ket Agtinnagen Dagiti  Tarakitik”,  umuna nga espesial a pammmadayaw idi 1966 ken “Dagiti Lanut Ken Pakalatkat”, maikadua a kangrunaan a pammadayaw idi 1984.  Sumagmamano met ti naapitna a premio manipud iti Gov. Roque Ablan Award for Iluko Literature (GRAAFIL). Maibilang kadagitoy ti saritana, “Dagiti Annak ti Rebolusyon” ken  ti  “Sangapulo a Daniw ti Kamaan” a nakagun-od iti maikadua a kangrunaan a pammadayaw idi 1982. Iti lubong ketdi ti edukasion ti naipangruna a nagrikusan ti biagna. Naisangayan ti pakasaritaanna a nangrugi a kas classroom teacher iti Flora Elementary School iti Sto. Domingo, Ilocos Sur, ket iti panaglabas dagiti tawen, nagbalin nga Associate Profesor IV iti Don Mariano Marcos Memorial State University, College of Engineering and Technology iti San Fernando City, La Union. Ditoy nga unibersidad, nadutokan pay a kas school paper adviser ti “THE TOIL”.   Tubo ni CRA ti Pagudpud, Ilocos Norte a nakaipasngayanna idi Mayo 5, 1933.  Pito ti annakda iti daydi Pel Alcantara – da Omar (pimmusayen), Djuna, Pelagio Jr., Venido, Pearle, Claron ken Dylan.glu