PAKAUNA

     Maysa a darepdep a pimmudno ti pannakaipasngay ti LABAW,  ti umuna nga antolohia ti GUMIL La Union. Ditoy ti nakatipontiponan dagiti mabigbig a napintas a piesa ti literatura a putar dagiti beterano ken agdadamo a mannurat a mangitantandudo itoy a gunglo. 

     Umuna unay, itdenmi ti naimpusuan a panagyaman kadagiti napusgan nga editor ti LABAW gapu iti aglaplapusanan nga ayatda a nangannong iti natuok a pagrebbenganda, kas kada: Col. Rufino Re. Boadilla, Bise-Presidente ti GLU ken nangbuniag iti paulo ti libro,     Dr. Rogelio Es. Tangalin, Director ti GLU, Prof. Crescencia R. Alcantara ken Herminiano C. Calica, agpada a mamagbaga  ti Gunglo.  Pagyamananmi met ti nangdisenio iti akkub ni tesorero ti GLU Purisimo O. Lazaga.

      Maikadua, agyamankami iti Bannawag ti magasin nga agtultuloy  a mangpasantak iti literatura Iloko  ken nagbalinen a paset ti kultura ni Ilokano iti uneg man wenno ruar ti Filipinas. Kasta met a pagyamananmi ti Sirmata iti anusna a tumultulong  a mangpatanor kadagiti agtutubo nga agdadamo a mannurat kameng man ti GUMIL La Union wenno saan. Nabara a panagyaman iti Iluko.com iti naindaklan a suportana itoy a ganuat.

     Kamaudiananna, lugayanmi dagiti mararaem a mannuratmi a pakairamanan dagiti napanen naginana iti sidong ti Namarsua.   Iti amin a pusomi, tarabayenmi met dagiti nainget nga agdadamo a sumasarita ken dumadaniw ti GLU. Kadagiti nangab-abaken iti pasalip, ipagpannakkeldakayo. Ket kadagiti agtarigagay nga agbalin a pagwadan a mannurat, igaedtayo koma latta iti agsukisok ken agputar kadagiti makuna nga obra maestra. Dakiwasentayo dagiti pasamak iti aglawlaw   iti uneg ken ruar  ti pagilian tapno aramatentayo dagitoy a material kadagiti putarentayo nga ababa a sarita, daniw, salaysay, saribitniw ken dadduma pay a porma ti literatura Iloko. Wen, agsurattayo agingga iti kabaelantayo. Ituloytayo latta a papintasen, paaduen ken saluadan dagiti sinurattayo babaen iti panangilibro wenno panangiraman kadagitoy iti internet nga itden ti bileg ti elektronika ti kabaroan a wagas nga us-usaren ita dagiti mannurat iti nadumaduma a paset ti lubong a tumultulong latta a mangpasantak iti literatura Iloko.

 

 

DJUNA R. ALCANTARA

Presidente

GUMIL La Union

2004-2006