iluko.com - website a magustoan a pagpalpallailangan dagiti pada a nangisit ti sikona.

Articles

 

Skip Navigation LinksHome > Articles Main Page > Article


AUTHOR

Amado I. Yoro
iCom page



Amado I. Yoro Online


Nasarakak manen ti pusok

03/13/2018


NASARAKAK MANEN TI PUSOK
Daniw ni Amado I. Yoro
Man of the Year in Poetry Awardee 2007-Gumil Filipinas

Kantaak ti agsapa a kakuyog dagiti
agpalangit a sallapingaw
Ti pul-oy, yegna ti iliw uray dagiti segga
A saan a mapakadaan: kinaganus wenno

Kinaagtutubo, agsublida iti yuyeng
iti kapanagan ti Sta. Romana:[Tapao] lagip.
Ti tudo, pinadam-egna ti kinelleng
Tapno mulaak iti bukel, kasilpo ti namnama
ti bin-i
Dagiti kamalig ken sarusar iti kinapudno
Ti arbis, kuldingenna ti lagip, bisibisanna manen

Ti naikupin koman a ladawan
Ti uggot nga agang-anges
Kas iti uggot ti panagdakkel
Dagiti sagibo ti kaputotan: nagan.
(Ne, ti pagaw, bimmanesbes nagumok manen iti sanga ti beattle nut
Napessaan idin ti piekna iti suli ti abong)

Nasarakak manen ti pusok
Iti mata ti kappia
Ti ayat
Iti sakruy ti daan a balay
Nagsinnippit ti singin a pagaw
[ Nagtinnarektekda: lailo ken dungngo.
Adda isasangpet dagiti binatog
kapagayam iti law-ang ni ayat
kasda kalapati nga agdisso iti tawa
nagammalda iti sabong ti pammateg
Kalanglangko ida iti dulang ni ayat
Maputarko manen daytoy a kanta-daniw.
Adtoy ti sabali a panagkasangay tapno
pasungadek manen rimat kas sagut iti
maysa nga agpang: panagyaman daytoy a panagsubli.






Rate this Article
Low <---------------------------------> High



Please login to rate this Article