Sarita

Sangkatedted a dara (umuna a paset) 09/18/2011 NAKASUKATAKON. Ti laengen mangbagkat iti traveling bagko a nangikargaan ni Naty kadagiti bado, pantalon ken dadduma pay a personal nga alikamek nga agpa-Cebu. Ti ammo ni Baket, adda seminar ti kompaniami nga atendarak. Dina ammo nga innak sarungkaran ni Maui, ti dandani agmaysa a tawenen nga ikabkabbalayko iti nasao a siudad. “Dimo baybay-an ni Jonathan Angelo, ha, Baket?” Iniggamak iti timid ni Naty. Ti uppat ti tawenna nga amponmi ti kayatko a sawen. Inawidko nga inarakup. Inagkak. Napaut. Kinamat ni Naty ti angesna. Nagalikuno ti bangbangir a kallidna iti kanawan a nalinis a pingpingna. “Agsingsingpetka, a? Amangan no tsiks ti papanam sadiay. Isarsarakmo ketdin! Tadtadek sa iplatitok!” kineddelna ti pus-ongko. “Siksikanto laeng!” nairuamak pay ketdin a mangibagbaga. Walo a tawenmin nga agassawa ken Naty. Iti tawenna a tallopulo ket uppat, kasla awan pay ti nagbaliwan ti pammagina. Napintas ken seksi latta. Siak, adun ti nagbaliwan ti bagik. Iti tawenko nga uppat a pulo, rimmakabak. Awanen daydi sigud a pammagik a natubay iti gym sipud pay idi baroak. Manipud ngamin idi naital-oak a manedier ti dakkel nga opisina ti telepono iti Makati City, makumikomak iti trabahok. Pannakabalayko ti opisina. No dadduma, rabiin no agawidak. Nagangayanna, limmukmegak ta awanen a pulos ti ehersisiok. “Daddy! Daddy!” Nakariingen ni Jonathan Angelo. Daddy man la a daddyn iti kuartomi iti maikadua a kadsaaran ti kongkreto a balaymi iti maysa kadagiti baro a subdibision ditoy Bulacan. Inagawaan ni Baket ti immuli. “Addaak ditoy salas!” kinunak. Agkibkibin dagiti aginak nga immulog iti agdan. “Good morning!” sinabatko a kinuso ti panguloten a buokna. “Good morning, Daddy!” inarakupna ti siketko. “May pasok ka, Daddy?” Inawidko nga inturong iti sopa. Sinaklotko. “Awan, anak. Adda seminarko ‘diay Cebu.” “Saan ‘yon? Sa malayo?” Nagtung-edak. “Umayak, Daddy.” “’Ton maminsan.” Agalburuto koma manen no saan nga inay-ayo ni Baket. Iti inaldaw nga inaramid ni Apo Dios, kastoy kami a kanayon nga agama. Kada rimmuar-rak iti balay, kumarayo a sumurot. No agkuti, daddy. No makalagip, daddy. Awan ti rabii a dina sangkadamag no adda kano serrekko iti kabigatanna. No maammuanna nga awan, ipalakpakna pay ti ragsakna. “’Nia ket dagitoy nga agaman,” inyisem ni Naty. “Ne, ‘ta barom ti rumbeng a pampanunotem, Dad, tapno dika agar-aramid iti linoloko!” Kiniddayak laeng ni Naty. “Kanayonnak la nga ibatbati, Daddy!” agpapa-uyo ni Jonathan Angelo. “Di mo ko love!” “Anak, masapul nga agtrabaho ni Daddy. Tapno adda igatangtayo iti ay-ayammo. No awan ti kuarta ni daddy., awan ti pagbuyatayo iti sine. Ken igatangmo iti Chicken Joy idiay Jollibee.” Inay-ayok nga addanto pasarabok kenkuana no sumangpetak. Inkarik pay nga inton Domingo, agpasiar ken agbuyakaminto iti sine idiay Glorietta. “’Niat’ kayatmo a buyaen?” “Spiderman!” “Promise, Daddy?” “Promise!” Idi agpakadaak kadakuada nga agina, naisemen. Inrakusna pay dagiti babassit a takiagna iti tengngedko. Sa binisongbisongnak. “Bye, Daddy!” “Bye, anak!” “Ingat!” Idi lumuganak iti traysikel a pinara ti katulonganmi, pinatayabannak pay ti agek. Saak nakipinnayapay. Nagpaitulodak iti paradaan ti dyip nga agpa-Monumento. Idiayton Camachile nga agluganak iti taksi a mangitulod kaniak idiay domestic airport. Awan ti natangdanak a mangimaneho koma iti kotsek a mangitulod kaniak. Diak maawatan no apay a kasla nadagsen ita ti riknak a nakipinnayapay kadagiti aginak. Makonsensiaak? Namin-adun a naglibakak ken ni Naty gapu ken ni Maui. Masansan nga ibagak a seminar ti gapuna nga innak idiay Cebu. No saan, ipambarko nga adda problema a pakasapulan kaniak ti opisinami. Tallo nga aldaw ken dua a rabii a maipusingak kadagiti aginak. No ammo la koma ni Naty a ti agrennek iti ayat ni Maui ti papanak ita. No maduktalan ngata ni Naty ti palimedko, mabalin a daytoyen ti pakarakrakan ti relasionmi nga agassawa. Kasanon ni Jonathan Angelo no kua? Ti rupak kadagiti nakaikamangak? Dagiti gagayyem ken makaam-ammo kadakami? Kasanon ti biagko no mapukawko ida nga agina? Nalagipko ti kinuna itay ni Naty. Maituredna ngata nga agpayso ti “mangiplatito?” Napagdippitko pay dagiti luppok iti dayta a nalagipko. Kinapudnona, namin-adun nga inkarik a daytoyen ti maudi a panagpa-Cebuk. Ngem no apay ketdi a diak malipatan ni Maui. Naapiangakon iti pintas ken kinabarana nga agayat. Agasem ta disiotsona laeng. Maysa pay, mapampanunotko ti maaddaan ti anak kenkuana a kadardara ken kalaslasagko. Kayatko a paneknekan a saanak a baog. Ket dakkel ti namnamak a maited ni Maui kaniak dayta. Ammok ti mabalin a mapasamak iti daytoy nga arapaapko. No masukalan ni Naty nga adda anakko iti ruar ti kallaysami, mabalin a kaguranakto la ketdi. Ngem makaammo ditan! Maysa a mannala ni Maui. Naam-ammok idi iti naminsan a panaghapihapimi kadagiti kaopisinaak iti maysa kadagiti kadaengan a klab iti Cebu. Inyam-ammo kaniak ni Roger, maysa kadagiti superbisor ti opisinami iti Cebu. No adda sangailienda nga executive manipud iti Manila, ditoy a klab ti aparda no kayat dagiti bossda ti aghapihapi. Naginnisem ken nagpinnerrengkami idi ken Maui. Nabiit kano pay idi iti klab. Idi maalamanok, nadlawko ti kinalamuyot ti dakulapna. Nakabibiag dagiti matana. Kas kalabaga ti kappisi a sandia dagiti narungpi a bibigna. Ken nakabangbanglo. Iti ababa a pannao, iti umuna pay laeng a pannakakitak kenkuana, nabatombalaniakon. Nalipatak nga adda asawak. Agasem ta disisietena laeng idi! Tapno maparukmak, binussogko ni Maui kadagiti material a banag. No adda makursonadaanna a gatangen, itedko a dagus. “Sir” pay laeng ti awagna kaniak idi damo. Ngem idi mapatinnagko, nakasamsam-it a Judie ti awagnan kaniak. Naidumduma ti ragsakko sipud nagelprenko ni Maui. Kasla immubing pay ti riknak. Kasla apiang daytoy a kanayon a sapsapulek ti banglo ken ayatna. Napigsa ti nakemko nga agloko ta manedierak. Kas executive, dakkel ti sueldok. Malaksid laeng kadagiti bunosko. Kabaelak ti mangikabbalay iti sabali a babai. Tunggal agbakasionak iti Cebu, alaek ni Maui iti hotel a pagdagusak. Ditoy nga agpapaskami iti ragsak. Idi agangay, napanunotko nga ibalay laengen. Agupaak iti apartment a pagnaedanna. Nalaklaka no kastoy ti aramidek ngem iti hotel. Mabalin a masolok pay. Idi imbagak ti planok, naragsakan. Kinompletok ngarud iti aplayans ken alikamen ti apartment nga inupaanmi. Aguppat a bulannan iti apartmentmi. Iti umuna pay laeng, nagtulaganmi a no kayatna nga agbayag ti relasionmi, pinagkarik a dina gandaten a riribuken ti biagko. Diak kayat a makita ti aniniwanna iti Manila. Dineretsok nga awan ti planok a mangisina iti asawak. Napateg ti asawak kaniak. Diak kayat a maeskandalo ti biagmi. Iti kanito nga aramidenna dayta, dina metten mauray pay nga agpakitaak kenkuana. Dita metten a mapugsat ti relasionmi. Awan met ngatan ti sapulen ni Maui kaniak. Nanam-ay ti intedko a biagna. Intedko amin a pagragasakanna. Binulan ti sustentona kaniak. Aglaplapusanan. Adda pay katulonganna. Tapno adda komunikasionmi, inggatangak iti selpon. Patulodak a kanayon iti loadna. Awan dumana iti maysa nga abalbalay a siak laeng ti akin-ay-ayam. Awan ti mabalin a makabulod. No addaak iti Cebu, ipapatimi ti aglemmes iti ragsak. Idi pay met kaal-alak ti apartment nga imbagak ken ni Maui a kayatko ti maaddaan iti anak kenkuana. Galingan mo kung ganun! Inkaritna met! Ket dayta ti ar-aramidek no agkitakami. Pudno, awanen ti namnamak a masikogak ni Naty. Nasken nga ipaneknekko a lalakiak. A saanak a bangles. Awan ketdi ti makitak a rason tapno isukatko ni baketko. Disente ken deadal. Maitedna met ti pagragsakak. Naragsak ken mapnekak met iti kinabara ti ayatna kaniak. Isu ngarud a kinunak idi ken ni Maui a diak mapanonot ti agloko no adda koma bukodmi nga anak ken Naty. Kinapudnona,awan ti puonmi nga bangles. Kasta met ken ni Naty. Adda aminen annak dagiti tallo a kakabsatko. Uray ni Naty, adda aminen putot ken annak dagiti kakabsatna. Malaksid iti dentist a kabsatna a di pay nagasawa. Awan ti nakita dagiti doktor a diperensiami nga agassawa. Aguraykami kano latta. Adu kano ti kaso a kasta a narigat nga agsikog ti babai. Ngem no narugiannan ti agsikog, agsasarunonto kanon. Idi awan pay ni Jonathan Angelo iti biagmi, sangkakuna dagiti gagayyemi a saankami a maawanan iti namnama. Addanto latta dumteng nga anghel iti biagmi. Ngem idi agangay, naawananakon iti namnama. Pinangal-alay-ay dagiti gagayyemko nga amangan no dakes nga agsikog ni misis. No aganak, amangan no isu pay ti pakatayanna. Wenno saan, adda diperensia ti agbalin nga anakmi. Denggento latta ni Apo Dios ti kararagyo, kinunkunada. Nagrigat nga awaten ti rikna ti awan putotna a kas kaniak. Makautoy ti agur-uray. Kanayon a napudot ti ulok idi no dumteng ti binulan a bisita ni Naty. Malagipko nga idi indatagko ni Baket iti altar, inkarik nga ay-ayatek agingga iti tungpal biagko. Awan ti kondision ti ayatko kenkuana. Ngem uray no kunak dayta, diak mabalin nga ulboden ti bagik. Adda latta dagiti kanito a rumsua ken mawawak a makaiggem iti ubing kadagiti takiagko. Ammo ken marikna ni Baket dayta a kurang ti biagmi. No adda reunionmi idi a sangapamiliaan, partesko man wenno partes ni Naty, dakami laeng kadagiti naasawaan ti awan ubba wenno kibinna nga ubing. Naawanan met ngatan iti namnama ni Naty. Agingga nga iti maysa a rabii a maturogkami koman, kinunana: “No ngata mangadaptarka laengen iti anakta, Dad?” Idi damo, nagpangaduaak. Ngem idi agangay, immanamongak. Idi a napadasanmi ti kinarikut ti pagdalanan. Adu a rikititos ti panagaplaymi iti “bahay ampunan” iti Tayuman. No namin-ano nga ininterbiunakami dagiti madre a mangas- asikaso iti panagadaptar iti ubing. Kaduada dagiti social worker ken family counselor. Impiliandakami iti ubing a mabalinmi nga adaptaren. Idi laeng a naammuanmi a saan gayam a dakami ti masurot a pumili iti adaptarenmi. Isuda ti mangpili iti alaenmi. Kasta kano ti alagadenda. Kalpasan ketdi ti nasurok a tallo a bulan, napatgan ti panagadaparmi. Iti kinatao ni Jonathan Angelo. Malagipko daydi aldaw a panangyawidmi idi kenkuana. Manipud iti bahay ampunan, dimmagaskami iti S.M. North a gimmatang kadagiti aruatenna. Agtudtudo idi. Nakaim-imas ti turogna iti panangilillilik iti mall. Idi makagatangkami, nagtaruskamin iti Sto. Niño, Bulacan a pagtaenganmi. Gapu ta agtudtudo, natrapikkami iti North Expressway. Iti abayko nga agmanmaneho, nakaragragsak ni Baket a mangub-ubba iti ubing. Narnekan ti ubing iti lamiis ti aircon ti lugan. Nayesngawna dagiti adu a planona para iti masakbayan ti ubing. Nakariing ti ubing idi sumangpetkami iti Sto. Niño. “Welcome home, Anak!” kinunami. Apagsangpetmi, impaammalan a dagus ni Naty iti andador ti gatas a kinanawna. Impaidadmi iti kamami nga agassawa. Linuktak met ti aircon tapno mabang-aran. Iniggamak ti mamador. Nagiddaak iti abayna. Binuybuyak ti panagkunnotna. Nakamulagat a mangkitkita kaniak. Idi kuan, nakaturog manen. Umisem-isem a narnekan. Pudno ngata ti kunada nga ay-ayamen ti anghel a kasigudna? Diak maawatan ti pudno a riknak kadagidi a kanito. Idinto a ni Naty, kasta unay ti ragsakna. Tinawaganna pay a dagus dagiti dadakkel, kakabsat ken gagayyemmi. Impasindayagna ti amponmi. “Nagguapo ti anakmi!” kinunana. Impadamagko met kada mamang idiay Lubong ti idadateng ni Jonathan Angelo. Ngem imbes a maragsakan ti inak, immingar ketdi a kasla ampo. “Agbibisinkayo!” inggurruodna. “Kaykayatko ti agadaptar ngem iti agaramid iti bukodyo nga anak!” “Adda nagkakaingasanmi iti maladaga!” panangay-ayok. Ngem medio napugot ti ubing. Idinto ta mestisoak. “Dinak man balbalatongen, Josefino!” inbugtakna la ketdi ngarud. Dayta ti sibubukel a naganko. Judie ti birngasko. “Kasano nga umala kenka ti ubing a pinidpidutmo?” Kinuna pay ti inak nga awan kano ti bibiangna. Saanna kano a pagtatakkonan ti maaddaan iti apoko a naata a putotko! “Kapkapin-anok, aya!” kinunana. Iti panaglabas dagiti aldaw, naamirisko a maysa nga anghel ni Jonathan Angelo iti biagmi nga agassawa. Ta uray ti naganna a Jonathan a dimi ingaggagara ken ni Baket a pinili ket sagut ti Namarsua gayam ti kayatna a sawen. Wen, ta adda naidumduma a rimat kadagiti nabiag a matana ken sam-it ti isemna no makariing iti agsapa a nangkayaw ken nangray-aw iti kaunggak! Kusto ni Naty, naguapo gayam ti barok! Ita, dakkelen. Mabaonko payen. Maituredkon nga ilaban iti pinnatayan no tuntonen dagiti pudno a dadakkelna. Ngem awan kas iti anak a nagtaud iti lasag ken darak. Ket ni Maui ti namnamak a makaited iti dayta kaniak. ***Maituloyto*** (Immuna A Naipablaak iti Bannawag)