Daniw

Agyamanka latta 05/08/2012 Agyamanka latta Mother's Day ni inam nalipatam Pinatangkenmo lattan dayta riknam Ta sumsumged ngamin dayta guram Kunam kamali ti pannakaiparsuam. Agyamanka ketdi ta uray kasano Rigat panangtagibi dina inkaskaso Biniagnaka, inayatnaka a napudno Saanna imbain kaniam nagpasuso. Daytoy kinapudno ti inka laglagipen Nagdandanag idi innaka in-inawen Kaaduanna, aglulua, maimaymayeng Ta ti advice gagayyem innaka-pis-eten. Ngem pinatibkerna ti naknakemna Biniagnaka, pannakaiparsuam inlabanna Adu a remedyo kenka inar-aramidna Ayatna laeng a sika ti mapadakkelna. Apay nga itan ta dakkelkan inmo guraen Ti panagkamalina ti inka idaydayengdeng Ti pannakaisikogmo kunam saan a rumbeng Pannakailaw-anna maysa a naasawaanen? Daytoy ti laglagipem, imulam ta pusom Adu ti misterio a maar-aramid ditoy lubong Agyamanka latta ketdi ti pannakaitaom Ta ti kamali ket saan koma nga agnanayon. Sapulem/birokem rumbeng nga aramidem Dika agpanunot banbanag a mangted lidem Ni inam dimo baybay-an inka arakupen Ipariknam a napateg kenka, isuna ay-ayatem.