Daniw

Igaaw 07/19/2012 Idi laeng sardam Natangar dagiti muldotko Nga inapiras aplaw ti angin: Situtugaw a nakadalikepkep Iti abay tungabngab a tawa A mangsipsiput Iti panagtanuprit Dagiti nadagsen nga ulep A tuknuen ti nalayug a niog. Ita, uksobak ti parbangon Ta agkalkalimduosan Dagiti ruot. No agmatuon Dagiti sabong agpugpugrot. Ay, ti dila ti init Dakiwasennan ti nakaparsuaan. --Angeluz Graciano Biz (Nangyalat iti Umuna a Gunggona (Premio Bannawag), On-the-Spot Poetry Writing Contest bayat ti Maika-44 a Komperensia Nasional ti GUMIL Filipinas iti DMMMSU-Bacnotan Campus, La Union idi Abril 22, 2012 nga inesponsoran ni Norberto "Jun" Bumanglag Jr., Adviser, GUMIL Oahu.)