iluko.com - website a magustoan a pagpalpallailangan dagiti pada a nangisit ti sikona.

Articles

 

Skip Navigation LinksHome > Articles Main Page > Article


AUTHOR

Rogelio Guillermo
iCom page



Sarita


Asug ni sakada

08/05/2016


Nasalemsem ti Disiembre, Koolau
Ket manipud iti kuyakoy a pagtugtugawak
Buybuyaenka a kas man la idi kalman:
pabaruem ti regget a kas di agek
a pinasudi ti nalailo nga aweng
ti Tennessee Waltz;
Pasubliem ti pigsa a namakired
kaniak iti unos iti adu a tawen;
Ti naunday a daliasatko
iti daga dagiti Kanaka,
sika ti namabileg kaniak a nagtabas
kadagiti nalawa a kaunasan.

Iti ililinnek ti init iti likudam, saksiak
ti panagaranaar ti sippukelmo.
Iti ililidem ti aglawlaw, lumtuadka
a kabulon ti naruay a kulintaba
dagiti nabayag a naikupinen
Ngem kas idi kalman la
a linabag ti napalabas.

Kasano a malipatak dagiti lung-aymo?
Dagiti agallon a buokmo a kayarigan
Ti nalapsat a kapagayan idiay Bacarra,
Pumaypayapay no kasta nga amloyen
ti apagapaman a palayupoy.

Malang-abko pay la di Ilang-ilang
nga ayamuom iti aglawlawmo idi kua.
Ket dagiti napino a kudilmo
Kasla da la kalamuyot ti napino a ledda.
Anian a sam-it dagiti nabara a bibigmo,
Dagiti lailo ni ayan-ayatta
a danggayan dagiti babassit nga allon
kadagiti tiempo a palabasenta
Ti agpatnag idiay aplaya ti Paoay.

Wen, Koolau, iti baet ti salemsem
ipagtengmo ti lagip a mangyetnag
Kaniak iti adalem a pannaturog.
Bayat a buy-buyaenka iti kuyakoy,
agindurog ti panawen ket yegna
ti talinaay iti naulimek a sardam.





Rate this Article
Low <---------------------------------> High



Please login to rate this Article