iluko.com - website a magustoan a pagpalpallailangan dagiti pada a nangisit ti sikona.

Articles

 

Skip Navigation LinksHome > Articles Main Page > Article


AUTHOR

leonardo rosqueta agunoy
iCom page



Salaysay


Managbasaka kadi ti libro?

01/28/2017


NO dika managbasa iti nadumaduma a libro, misuotam la ketdi daydiay kapanunotan ni Erasmus, maysa nga scholar. Managayat nga agbasa iti nadumaduma a libro. Kastoy man ti kapanunotanna: “No adda bassit kuartak, iyunak ti gumatang kadagiti libro; no adda pay nabati, igatangko iti taraon ken lupot.”

No dika managbasa ti libro a kunak, misuotam ti kapanunotan ni Erasmus. Kasanon no agkaradukod ti boksitmo gapu iti kaawan ti taraon nga ipaunegmo? Kasanon no bin-ig a lussok aminen a lupotmo? Agparang aminen a di mangan-ano?

Saan met ketdi a kasta ti pagtalimudokan ti kapanunotan ni Erasmus. No adda igatangmo iti taraon ken lupotmo, adda met mailatang nga igatangmo iti basaem a libro. No kasta ti mapasamak, nasayaat; dika maawanan ti basaem a libro.

Idi panawen ti panagadalmi, nasadutkami nga agbasa ti libro. No panagseserra ti klase, nabaro pay laeng ti isublimi a libromi. Adda ketdi saggaysa a nagatangmi idi ket dagitoy ti insangpet, indulinmi iti pagtaenganmi. Idi maawisen ti imatangmi a basaenmin dagitoy, kinalupkopanmin. Inannadanmin ta dimi pay kulpien dagiti panidna. Dimi pay palipitan iti panid a nagpatinggaan ti nabasami. Iti abbaba a pannao, mabukbukelen iti panunotmi ti kinapateg dagiti libro iti biag ti maysa a tao. Dagitoy ita ti angkla (anchor) ti kas kaniak a di nakaagpang iti nangatngato nga adal. Dagiti mabasak ita ti mainayon a kupikopan ti nanumo a panunot.

Ti utek gayam, agur-urnong ti nadumaduma nga impormasion. Kasla biblioteca a pakaipempenan ti nadumaduma a libro ti utek.

Pagsasao daytoy: ang isang tahanang walang aklat ay tulad sa bahay na walang bintana at isang katawang walang kaluluwa. Mamatika man wenno saan, adda kenka. Ngem, no pumasiarka iti maysa a pagtaengan, uray napapateg dagiti alikamen ti makitam, no awan libro a makitam, ipagarupmo nga awan ti managbasa a kameng ti kaamaan iti dayta a pagtaengan. Wenno awan panagduyos dagiti akin-pagtaengan kadagiti libro.

Kasla bubon a di maatianan ti ubbogna dagiti libro a no kasapulan, iti ania man nga oras, mabalin a sakduen dagiti impormasion a sinaguday dagiti libro. Ket, ti naparkagan a panunot, padam-egenna babaen ti nadumaduma nga impormasion.

Dakkel ti naipaayna a pagimbagak ita ti kaadda dagiti libro a paset ti pagliwliwaak iti panagbasak kadagitoy iti inaldaw. Mainanaan met ti naturtoran iti trabaho a bagi no adda ti libro a pagpalabasan iti oras. Wen, pagpalabasan ti oras iti panagbasa. No adda masagang dagiti mata a nakapatpateg a balikas wenno datdatlag pay ketdi, ikur-it met iti papel. Inayon a kas bukabolario ti panunot.

Saan laeng a siak ita ti mairanranud kadagitoy ilalaek a libro ta dagiti colegio ken sekundaria nga estudiante a kaannakak, ditoy met bassit a bibliotecac ti kaasitgan a tarusenda.

Pagsisinnublatanda dagiti librok. Daanton nga agsubli…
Sakbay a gibusak ‘toy kolumko, malagipko daydi panagdugol ti ulok ta gapu iti suron ti maestrami iti maikanem iti kaawan ti makasungbat kadakami nga adalanna iti saludsodna, pinangtednakami ketdin a tinuktokan iti libro!

Nariing sa ketdi ti utekmi ta adda kadakami ti simmungbat kalpasan ti panangulit ti maestrami ti saludsodna. Ket, natumpongan ti kaadalanmi ti umno a sungbat.
Adal. No agad-adalka, masapul nga ipasnekmo ti agadal. Adalem a sipapasnek ti leksionmo. Resulta: makaay-ayo ‘ta gradom ta nangato ngarud. Maragsakanka, ni maestram/maestrom agraman nagannak ken kakabsatmo.

Maipanggep pay iti libro!

Kastoy ti balakad ni Richard de Bury: “If you approach the books, they are never asleep; if you seek them, do not play hide and seek; if you blunder, they do not scold; and if you are ignorant, they do not laugh at you. They are your bestfriends.”





Rate this Article
Low <---------------------------------> High



Please login to rate this Article