iluko.com - website a magustoan a pagpalpallailangan dagiti pada a nangisit ti sikona.

Articles

 

Skip Navigation LinksHome > Articles Main Page > Article


AUTHOR

leonardo rosqueta agunoy
iCom page



Salaysay


Dumngegka iti patigmaan (umuna iti uppat a paset)

01/18/2018


NARUAY a nagannak ti agladladingit gapu iti kinaadu ti pakabuongan ti ulo nga ar-aramiden dagitoy iti inaldaw. Wen, nagsakit a panunoten ti ama/ina, kalpasan ti adu a sakripisio a nagpatanor ken nangdamili iti panunot dagiti annak, maaramid pay laeng dagitoy ti agaramid ti di nasayaat: nalabes a panagaliwaksay ken panagbusbos ti adu a kuarta ken panangdadael iti panawen. Adda pay dagiti managulbod nga annak. Ipaneknekda iti napaypayso ti aramidda a di maiparbeng. Bagina ikalasagna. Bagina pabangluenna. Dayta ti lab-ay ken pait ti panagulbod ti anak ken dadduma pay.


Kaaduanna ita ti agad-adal kadagitoy nga agtutubo. Agrubuat a masapa iti aldaw ti klase. Nakalukat a dakulap, anian ta di mamingga no di maapinan iti Roxas wenno Osmena, kdpy. Pambar: adu ti paggastosanda iti pagadalan: proyekto, contribution iti masungad a pasken ti pagadalan, kdpy. Saan a nabatad nga ibaga ti anak ti sabali a paggastosanda: arak, sigarilio, pagpusta kadagiti pagpapallotan, jueteng, kdpy. Ta di mailimed ti agdadata a kinapudno kas pagduyosan ti kaaduan ti agsugal. Wen, makigasanggasat iti panagpuligos dagiti numero tapno agkakuarta. Adu. Di mapulsot dagiti maparnuay a bisio a tarigagay ti maseknan tapno masupusopan.


Naigamer dagiti annak iti nagkaadu a rupa ti panagbiag. Ti pelles ti gimong iti agdama a panawen. Maitukit iti panunotda. Uray maipatigmaan iti dida panangpadas kadagiti aramid a maibalakad a liklikan, aramiden. Adda dita ti gagar. No ania ti dakes/naimbag nga ibungana dayta a panagpadas.


Dika agsugal (kas iti panagpusta iti jueteng ken pallot), kuna ti ama iti anakna. “Wen,” kuna ti ubing. Ngem, dayta a ‘wen’, paliwaWENg. Aleng-aleng. Patigmaan ti ama a di pagduyosan ti ubing/agtutubo. Naigamer ngamin dagiti agtutubo ita iti imatangda dagiti nadumaduma a kita ti bisio ti tao. Makairarem amin dagitoy iti panagbiag. Kuna dagiti moralista nga immoral dagita a sugal. Ngem, agtultuloy gapu iti bileg ti dadduma a turayen ken dagiti managimbubukod a kapitalista.


Di ngamin maiyatur daydiay kapanunotan a gagangay dagitan nga aramid iti gimong. Gagangay dagiti sugal a naparnuay gapu iti pagpalpaliwaan. Pakigasanggasatan ta amangan no pagkakuartaan no maitiamba. Agsugal. Isugal ti kuarta a nailipit iti bulsito wenno iti wallet.


Dika agkusit. Ngem, adu ti agkusit gapu iti tarigagay a kayumkomen ti adu a kuarta ken tagikuaen ti gundaway nga agaliwaksay. No agpakada ti agtutubo iti nagannak kenkuana a mapan makiragragsak iti panagkasangay ti kaadalanna, sabali met gayam ti turongenda. Iti pagiinuman ti nasanger. Saan laeng a ti arak ti pakabartekan dagitoy; ti pay ayamuom dagiti agukrad a sabong iti babaen ti nadumaduma ti rimatna a bombilia. Pagammuan, nairagupda iti naparnuay a riribuk iti uneg ti balay-pagliwliwaan. Bagina ikalasagna kadakuada. Adda nadesgrasia kadakuada. Buong ti ulo. Dagiti annak a di dumngeg iti patigmaan dagiti nataengan.





Rate this Article
Low <---------------------------------> High



Please login to rate this Article